Փաստ ինֆո

Հանրության մեջ հայտնի «Հաց Բերող» անվամբ Արթուր Սարգսյանի դիակի դատաբժշկական փորձաքննությունը քիչ հետո կսկսվի՝ տուժողի իրավահաջորդի ներկայացուցչի ներկայությամբ:

Ինչպես «Փաստինֆո»-ի թղթակցի հետ զրույցում ասաց Քննչական կոմիտեի նախագահի խորհրդական Սոնա Տռուզյանը:

Դիահերձմանը տուժող կողմի միջնորդած միջազգային փորձագետները ներկա չեն գտնվի, թեև տուժողի իրավահաջորդի ներկայացուցիչների միջնորդությունը բավարարվել է, սակայն  տուժող կողմը միջազգային փորձագետների մասնակցությունը չեն կարողացել ժամանակին ապահովվել:

Բացառված չէ, որ հետագա փուլերում միջազգային փորձագետները հնարավորություն ունենա մասնակցելու:

Հիշեցնենք, որ ավելի վաղ «Փաստինֆո»-ի թղթակցի խնդրանքով դիահերձարանի բաժնի վարիչ Շավարշ Գևորգյանը պարզաբանել էր, որ դիահերձում կատարելը նպատակահարմար է մահանալուց 12-ից 48 ժամվա ընթացքում, որպեսզի նորմալ արդյունքներ ստացվեն:

Դիակը հնարավոր է պահել երկար՝ մինչև 48 ժամ, սառնարանային պայմաններում, իսկ դրանից հետո հետզհետե տեղի են ունենում փոփոխություններ՝ բջջային կազմն է վերանում, ձևաբանական փոփոխություններ են տեղի ունենում, ինչն աղավաղում է պատկերը, և չես կարողանում հստակ կողմնորոշում կատարել և դատողություններ անել:

Նշենք, որ Արթուր Սարգսյանը մահացել է մարտի 16-ին, մահվան պատճառը պարզելու համար նշանակվել է դիակի դատաբժշկական փորձաքննություն:

Տուժող կողմը միջնորդել է, որ փորձաքննության կատարմանը մասնակից լինեն միջազգային փորձագետներ։ «Փաստինֆո»-ի հարցմանն ի պատասխան՝ ՔԿ նախագահի խորհրդական Սոնա Տռուզյանը հայտնեց, որ տուժողի իրավահաջորդին և նրա երեք ներկայացուցիչներին պարզաբանվել է ժամկետների սղությունը։

«Տուժողի իրավահաջորդի ներկայացուցիչները ներկայացրել են միջնորդություն՝ փորձաքննության կատարմանը միջազգային փորձագետների ներգրավելու համար, ինչը բավարարվել է։ Թեկնածուներին առաջարկել են իրավահաջորդների ներկայացուցիչները, եւ ներկայումս աշխատանքային կարգով քննարկումներ են ընթանում՝ փաստաբանների հետ նրանցից գոնե մեկի ներկայությունը ապահովելու համար»,- ասաց Ս.Տռուզյանը։

Ըստ նրա՝ դիահերձումը կարող է սկսվել ցանկացած պահի, սակայն դեռ չեն ժամանել տուժողների իրավահաջորդի ներկայացուցիչների առաջարկած փորձագետները կամ նրանցից որևէ մեկը։

Աղբյուր` Փաստինֆո