Փաստ ինֆո

Երևանի Կենտրոն և Նորք-Մարաշ վարչական շրջանների դատարանը՝ դատավոր Արմեն Բեկթաշյանի նախագահությամբ, հանցավոր համագործակցության վերաբերյալ գործով այսօրվա դատական նիստում որոշեց ամբաստանյալ Վահան Շիրխանյանի նկատմամբ հանձնաժողովային դատաբժշկական փորձաքննություն նշանակել:

Այդպիսով դատարանը բավարարեց մեղադրող կողմի միջնորդությունը, որը ներկայացվեց ու բավարարվեց անգամ նախապատրաստական փուլը չսկսած՝ Վահան Շիրխանյանի բացակայությամբ:
Դատախազ Գևորգ Սարգսյանը վրդովմունք հայտնեց, որ երրորդ նիստն է, ինչ նիստը պետք է հետաձգվի պաշտպանների չներկայանալու պատճառով, մինչդեռ ինքը դեռևս նախորդ դատական նիստից շատ կարևոր միջնորդություն ունի անելու, որը բխում է ամբաստանյալների շահերից:

Մեղադրողը միջնորդեց նշանակել հիշյալ փորձաքննությունը՝ Վահան Շիրխանյանի ներկայիս առողջական վիճակը և նրա դատարան ներկայանալու հնարավորությունը պարզելու համար: Նա հիշեցրեց, որ Վահան Շիրխանյանն արդեն վեցերորդ նիստն է չի ներկայանում դատարան:

Մեղադրողը, մասնավորապես, միջնորդում է փորձագետներին առաջադրել հետևալ հարցերը՝ արդյոք Վահան Շիրխանյանը տառապո՞ւմ է դատավարությանը մասնակցելուն խոչընդոտող հիվանդությամբ, եթե այո՝ ի՞նչ հիվանդությամբ, ի՞նչ ընթացք ունի հիվանդությունը, հիվանդությունը ենթակա՞ է բուժման, իսկ ամբաստանյալը՝ առողջացման և ի՞նչ ժամկետներում:

Վ.Շիրխանյանի պաշտպան, փաստաբան Հայկ Ալումյանը նկատեց, որ Վահան Շիրխանյանը ոչ թե չի ներկայանում, այլ չի ներկայացվում դատարան: Պաշտպանը հայտարարեց՝ ապահովեք, որ պատգարակով Վահան Շիրխանյանին հասցնեն մինչև դատարանի դուռը: «Մենք երբևէ չենք ասել, որ Վահան Շիրխանյանը չի կարողանում մասնակցել դատավարությանը, նա չի կարողանում ինքնուրույն գալ դատարան», - ասաց պաշտպանը:

Կալանավորումը փոխելու, հեռախոսային խոսակցությունների ու տեսակցությունների արգելքը վերացնելու կարևոր հարցերը քննարկելու փոխարեն մեղադրող կողմը միջնորդություն է ներկայացնում, որի բավարարումն էլ ավելի է ձգձգելու դատավարությունը՝ հայտնի է, որ փորձաքննությունները մեկ ամիս և ավելի են տևում: Պաշտպանը միաժամանակ նկատեց՝ առավել ևս, որ դեռևս չի հաստատվել դատախազի՝ մեղադրանքը պաշտպանող պատշաճ անձ հանդիսանալու և որպես այդպիսին նման միջնորդություն անելու իրավասություն ունենալու հարցը: Միջնորդությունն ակնհայտ անհիմն է և ունի դատավարության հետ կապ չունեցող ինչ-որ մութ նպատակներ, նշեց Հայկ Ալումյանը:

Պաշտպանական կողմը կոչ արեց չներկայացնել, որ միջնորդությունն արվում է ամբաստանյալների շահերից ելնելով, այստեղ խոսք կարող է գնալ միայն գերատեսչական շահերի մասին:
Փաստաբան Էդուարդ Աղաջանյանն իր հերթին հավելեց, որ դեռ պետք է լուծում ստանան դատարանի ինքնաբացարկի, մեղադրողի բացարկի, պաշտպանների լիազորությունները ճանաչելու, այլ ընթացակարգեր, ուստի այս պահին միջնորդության վերաբերյալ որոշման կայացումը պետք է հետաձգվի:

Այդուհանդերձ, դատարանը որոշեց բավարարել մեղադրող կողմի միջնորդությունը, դատավարությունն անորոշ ժամանակով հետաձգվեց:

«Փաստինֆո»-ի հետ զրույցում Հայկ Ալումյանը դատարանի այս որոշումը գնահատեց որպես անիմաստ, բացարձակ անօրինական՝ ընթացակարգային ու բովանդակային առումներով: Պաշտպանը, մասնավորապես, ընդգծեց՝ ինչպե՞ս կարելի էր Վահան Շիրխանյանի նկատմամբ փորձաքննություն նշանակելու որոշում կայացնել՝ առանց նրա ո՛չ գրավոր, ո՛չ բանավոր կարծիքը լսելու: «Որոշումը բովանդակային առումով անօրինական է, որովհետև դատարանը որոշում է կայացրել պարզելու մի հարց, որը որևէ կողմի կողմից վիճահարույց չի»,- ասաց Հայկ Ալումյանը:

Աղբյուր` Փաստինֆո