Փաստ ինֆո

Ազգային ժողովի առաջիկա ընտրություններին մասնակից քաղաքական ուժերի ներկայացուցիչները համակարծիք են, որ անցած տարվա հուլիսին ՀՀ ոստիկանության պարեկապահակետային ծառայության գունդը գրաված զինված խմբի անդամներին հաց տարած Արթուր Սարգսյանի մահվան հանգամանքները պետք է մանրամասն ուսուﬓասիրվեն. եթե կան մեղավորներ, նրանք պետք է պատժվեն օրենքի ողջ խստությամբ:

«Կոնրադ Ադենաուեր» հիմնադրամի նախաձեռնությամբ կազմակերպված քննարկման ընթացքում, անդրադառնալով Արթուր Սարգսյանի մահվան դեպքին, ՀՅԴ կուսակցության ներկայացուցիչ Արթուր Խաչատրյանն ընդգծեց, որ տեղի է ունեցել ողբերգություն, որի հանգամանքները պետք է մանրամասն ուսումնասիրվեն և բացահայտվեն:

«Ես կարծում եմ, որ նրա հիշատակը հարգելու ,այն չպղծելու լավագույն ձևը այդ ողբերգությունը քաղաքական շահերի չծառայեցնելն է: Մենք կոչ ենք անում, որպեսզի Արթուր Սարգսյանի մահվան հանգամանքները մանրամասն ուսումնասիրվեն, ու եթե պարզվի, որ կան մեղավորներ, նրանք պետք է օրենքի ողջ խստությամբ պատժվեն: Մենք նաև կոչ ենք անում զերծ մնալ այս ամենը քաղաքականացնելու փորձերից և դեպքը քաղաքական նպատակներին ծառայեցնելուց»,- «Արմենպրես»-ի հաղորդմամբ՝ ասաց Խաչատրյանը:

Կոնգրես-ՀԺԿ դաշինքի ներկայացուցիչ Արման Մուսինյանն իր ցավակցությունները հայտնեց Արթուր Սարգսյանի մահվան կապակցությամբ՝ համակարծիք լինելով, որ դեպքի հանգամանքները պետք է մանրակրկիտ քննության ենթարկվեն: Մուսինյանը հավելեց, որ Արթուր Սարգսյանը հիվանդություն ուներ, որն անհամատեղելի էր քրեակատարողական հիմնարկում պահվելու պայմանների հետ, ուստի նրա մահվան պատճառը երկրորդ անգամ նրան կալանավորելու որոշումն է, ինչպես նաև դատապարտյալների հիվանդանոցում նրա նկատմամբ հնարավոր անբարեխիղճ վերաբերմունքը:

Մուսինյանը հույս հայտնեց, որ քննությունը կպարզի մեղավորներին և նրանք կստանան իրենց պատիժը:

«Հայկական վերածնունդ» կուսակցության ներկայացուցիչ Վիլեն Խաչատրյանը նույնպես կոչ արեց քաղաքական ուժերին Արթուր Սարգսյանի մահը չշահարկել և իրենց քաղաքական նպատակներին ծառայեցնելու փորձերից զերծ մնալ:

«Ընդհանրապես, նման դեպքերը շահարկելը չի բխում բարոյական սկզբունքներից: Մարդիկ ունեն կոնկրետ վիշտ և նրանց համար լուրջ հոգեբանական ցնցում է այդ թեմայով շահարկում լսելը։ Յուրաքանչյուր ոք այդ թեմայի շուրջ արտահայտվելիս՝ պետք է մտածի, թե ինչ ազդեցություն կարող է դա ունենալ նրա հարազատների վրա։ Այս թեման շոշափողները պետք է լինեն զուսպ ու բարոյականության սահմաններում»,- ասաց Խաչատրյանը։

Անդրադառնալով դիտարկմանը, թե ոմանք Արթուր Սարգսյանի մահվան համար մեղադրում են իշխանություններին՝ Վիլեն Խաչատրյանն ընդգծեց, որ որևէ մեկին մեղադրելու համար անհրաժեշտ տեղեկատվություն չունեն: Միևնույն ժամանակ, նա գտնում է, որ եթե Արթուր Սարգսյանի գործում ներգրավված յուրաքանչյուր օղակ իր տեղում լիներ, հնարավոր կլիներ խուսափել նման ողբերգական դեպքից:

Իշխող Հանրապետական կուսակցության ներկայացուցիչ Հրայր Թովմասյանը, միանալով Արթուր Սարգսյանի մահվան կապակցությամբ հնչող ցավակցություններին, ընդգծեց, որ իր համար ընդունելի չեն նրա մահվան համար իշխանություններին մեղադրելու փորձերը, քանի որ ինչ-որ մեկին մեղադրելու համար ամբողջական տեղեկատվություն դեռ չկա:

«Ինձ համար ևս որպես քաղաքացի շատ հանգամանքներ պարզ չեն, պարզ չէ կալանքի և մահվան պատճառահետևանքային կապը։ Ես հասկանում եմ, որ սա շատ լավ առիթ է իշխանություններին քննադատելու համար։ Միևնույն ժամանակ, ակնհայտ է, որ մենք ունենք խնդիրներ այդ ոլորտում՝ առաջին հերթին խափանման միջոցի հետ կապված, բայց սա պայմանավորված է այն հանգամանքով, որ մյուս խափանման միջոցները մեր օրենսդրության մեջ պիտանի չէին, դրա համար էլ հիմա ներդրվում է պրոբացիոն համակարգը, որը գալու է լուծելու այդ խնդիրները»,- նշեց Թովմասյանը:

Նա հավելեց, որ երկրորդ խնդիրը քրեակատարողական հիմնարկներում բուժծառայության որակն է։ Թովմասյանը համակարծիք է քննարկման մասնակից մյուս քաղաքական ուժերի ներկայացուցիչների հետ, որ գործի բոլոր մանրամասները պետք է հրապարակային ու օբյեկտիվ քննվեն ու եթե կան մեղավորներ, բոլորը պետք է պատժվեն։

Աղբյուր` Փաստինֆո