Փաստ ինֆո

«Օֆշորի գործով» այսօրվա դատական նիստում դատարանը մերժեց տուժող Փայլակ Հայրապետյանի ներկայացուցիչ Լուսինե Աղլամազյանի միջնորդությունը դատահաշվապահական փորձաքննություն նշանակելու մասին:

Ըստ տուժող կողմի ներկայացուցչի, գործով ամբաստանյալ Աշոտ Սուքիասյանին պատկանող «Ձորագյուղ» արտադրական կոոպերատիվին Ամերիաբանկի կողմից տրամադրված վարկերի վճարումների և այլնի մասին բանկի կողմից ներկայացված փաստաթղթերում առկա են տարբերություններ:

Մեղադրող Դավիթ Վեքիլյանը առարկել էր միջնորդության դեմ՝ անհիմն լինելու պատճառաբանությամբ: Ըստ մեղադրողի, փորձագետներին առաջադրվելիք հարցերը չեն առնչվում մեղադրանքին, ուստի այն պետք է մերժվի:

Դատարանն ևս գտավ, որ հիմնավոր չեն կողմի փաստարկները, և միջնորդությունը ենթակա է մերժման: Ըստ դատարանի որոշման, առաջադրվելիք հարցերը չեն առնչվում մեղադրանքին, և այն չնշանակելը որևէ կերպ չի կարող ազդել գործի բազմակողմանի ու օբյեկտիվ քննության վրա:

Նշենք, որ գործը գտնվում է դատաքննությունը լրացնելու փուլում, հաջորդ դատական նիստը կկայացվի հենց որ դատարանը ստանա գործում առկա օտարալեզու փաստաթղթերի թարգմանությունները:

Հիշեցնենք, ամբաստանյալ Աշոտ Սուքիասյանը մեղադրվում է ՀՀ քրեական օրենսգրքի 190-րդ հոդվածի 3-րդ մասի 1-ին կետով՝ առանձնապես խոշոր չափերով հանցավոր ճանապարհով ստացված եկամուտներն օրինականացնելը (փողերի լվացումը), 178-րդ հոդվածի 3-րդ մասի 1-ին կետով՝ առանձնապես խոշոր չափերի խարդախություն, և 205-րդ հոդվածի 2-րդ մասով՝ առանձնապես խոշոր չափերով հարկերը վճարելուց չարամտորեն խուսափելը:

Ըստ մեղադրանքի՝ Աշոտ Սուքիասյանը խարդախությամբ ուրիշի առանձնապես խոշոր չափերով գույքի նկատմամբ իրավունք է ձեռք բերել, օրինականացրել հանցավոր ճանապարհով ստացված առանձնապես խոշոր չափերով եկամուտներ, ինչպես նաև չարամտորեն խուսափել է առանձնապես խոշոր չափերով հարկեր, տուրքեր և պարտադիր այլ վճարումներ կատարելուց:

Աղբյուր` Փաստինֆո