Փաստ ինֆո

2016թ. հուլիսի 08-ին Շենգավիթում նախկին կնոջը, զոքանչին և աներոջը կացնահարելու գործով այսօրվա դատական նիստը հետաձգվեց. ամբաստանյալի պաշտպան Լիանա Գրիգորյանը դատարանից ժամանակ խնդրեց՝ գործի նյութերին ծանոթանալու համար:

Շենգավիթ վարչական շրջանի ընդհանուր իրավասության դատարանում, նախագահությամբ Դավիթ Բալայանի, այսօր դատարան էր ներկայացել հանրային պաշտպանի գրասենյակի փաստաբան, Լիանա Գրիգորյանը, վերջինս դատարանից ժամանակ խնդրեց՝ քրեական գործով 3 հատորից բաղկացած գործի նյութերին ծանոթանալու նպատակով:

Դատարանը պաշտպանի միջնորդությունը բավարարեց և դատական նիստը հետաձգեց՝ նշանակելով ապրիլի 10-ին:

Ավելի վաղ տեղեկացրել էինք, որ Վլադիկ Մարտիրոսյանը նախկին կնոջ` Թագուհի Մանսուրյանի և նրա ծնողներ Կարինե և Վաչագան Մանսուրյանների հետ ունեցել է անբարյացկամ փոխհարաբերություններ և 2016թ. հուլիսի 8-ին՝ ժամը 01:00-ի սահմաններում, Երևան քաղաքի Ս.Տարոնցի նրբանցքի 7-րդ շենքի բակում իր մանկահասակ երեխային` 31.10.2015թ. ծնված Ն.Մարտիրոսյանին տեսակցելու հարցի շուրջ հերթական անգամ վերջիններիս հետ վիճաբանել է:

Այս ամենից հետո Թագուհի և Կարինե Մանսուրյանները գնացել են ոստիկանության Շենգավիթի բաժին և երբ վերադառնալիս են եղել տուն Մարտիրոսյանն իր երեխային տեսակցելն արգելելու պատճառով, նրանցից վրեժխնդիր լինելու շարժառիթով, ապօրինաբար կյանքից զրկելու դիտավորությամբ, իր հետ նախապես վերցրած կացնով դարանակալել է հիշյալ շենքի շքամուտքում և երբ նույն օրը ժամը 04:30-ի սահմաններում Թագուհի և Կարինե Մանսուրյանները մտել են շենքի մուտք և բարձրացել առաջին հարկում գտնվող իրենց տան ուղղությամբ, Մարտիրոսյանը շքամուտքում հետևի կողմից հարձակվել է Թագուհի և Կարինե Մանսուրյանների վրա, նախ կացնով բազմաթիվ հարվածներ է հասցրել Թագուհի Մանսուրյանի մարմնի տարբեր մասերին` պատճառելով կյանքին վտանգ սպառնացող ծանր վնաս, ապա նույն կացնով, ապօրինաբար կյանքից զրկելու դիտավորությամբ, բազմաթիվ հարվածներ է հասցրել շքամուտքից դեպի 2-րդ հարկ տանող աստիճաններին կանգնած Կարինե Մանսուրյանի գլխին և մարմնի տարբեր մասերին` պատճառելով կյանքի հետ անհամատեղելի մարմնական վնասվածքներ` ապօրինաբար կյանքից զրկելով նրան:

Այս ամենից հետո էլ Մարտիրոսյանը նույն կացնով, բազմաթիվ հարվածներ է հասցրել Թագուհի և Կարինե Մանսուրյանների օգնության կանչի ձայներից տանից դուրս եկած Վաչագան Մանսուրյանի գլխին, ուսին, ձեռքերին` պատճառելով կյանքին վտանգ սպառնացող ծանր վնաս, սակայն իր կամքից անկախ հանգամանքներում Վաչագան Մանսուրյանին ապօրինաբար կյանքից զրկելուն ուղղված գործողություններն ավարտին չի հասցրել, քանի որ աղմուկի ձայներից հարևանությամբ բնակվող Սարգիս Գրիգորյանը դուրս է եկել բնակարանից և գործուն միջոցներ ձեռնարկելով` հետևի կողմից փաթաթվելով՝ Վ.Մարտիրոսյանին հեռացրել է Մանսուրյաններից, խոչընդոտել և կանխել է Վ.Մարտիրոսյանի հանցավոր մտադրության վերջնական իրականացումը:

Բացի այդ, Վլադիկ Մարտիրոսյանը, 2016թ. հունիսի 3-ին՝ ժամը 10:30-ի սահմաններում, ՀՀ ԱՆ ԴԱՀԿ ծառայության վարչական շենքում իր երեխային տեսակցելու հարցի շուրջ վիճաբանել է նախկին կնոջ` Թագուհի Մանսուրյանի հետ, որի ընթացքում սպառնացել է, որ կսպանի, կվերացնի նրան, իսկ երեխան երկու տարեկանը չի բոլորի, այդ սպառնալիքներն իրականացնելու իրական վտանգ է եղել:

Վլադիկ Մարտիրոսյանին մեղադրանք է առաջադրվել ՀՀ քրեական օրենսգրքի 34-104-րդ հոդվածի 2-րդ մասի 1-ին կետով, 104-րդ հոդվածի 1-ին մասով և 137-րդ հոդվածի 1-ին մասով:

Դաժան սպանություն Շենգավիթում. կացնահարել է նախկին կնոջը, զոքանչին և աներոջը (Լուսանկարներ)

Ավելի վաղ «Փաստինֆո»-ն տեղեկացրել էր, որ այս ողբերգական դեպքից առաջ Մարտիրոսյանների և Մանսուրյանների ընտանիքում վիճաբանություններն ու բռնությունները շարունակական բնույթ են կրել:

Այս ընտանիքի հետ կապված միայն 2016թ. հունիս ամսին հարուցված է եղել 5 քրեական գործ, նրանցից յուրաքանչյուրն առանձին-առանձին իրավապահների ուշադրությունն են հրավիրել իրենց ընտանիքում տիրող անառողջ մթնոլորտի վրա, հաղորդումներ ներկայացրել մեկը մյուսի դեմ:

Միայն 2 քրեական գործ հարուցված է եղել փեսայի` Վլադիկ Մարտիրոսյանի հաղորդման հիման վրա զոքանչի դեմ, իսկ երեքն էլ` Վ.Մարտիրոսյանի դեմ` նախկին կնոջ, զոքանչի ու աներոջ հաղորդումների հիման վրա:

Եվ այս ամենից հետո այս ընտանիքում հերթական վիճաբանությունը հանգուցալուծվեց դաժան սպանությամբ:

Աղբյուր` Փաստինֆո