Փաստ ինֆո

Ապրիլյան քառօրյա պատերազմի հետեւանքով տարհանված թալիշցիները ժամանակավորապես կհաստատվեն Ալաշան համայնքում: «Արմենպրես»-ի հետ զրույցում ԼՂՀ քաղաքաշինության
նախարարության մամուլի բաժնի պատասխանատու Հունան Թադեւոսյանը նշեց, որ նրանց համար հարմարավետ կեցության պայմաններ կստեղծվեն:

«Արագ հավաքովի երկսենյականոց բնակարանները Արցախ են հասցվել Չինաստանից, պետական բյուջեի միջոցների հաշվին: Ունեն հարմարավետ պայմաններ, ձայնա և ջերմամեկուսացնող
հատկություն, սանհանգույց, խոհանոց»,-ասաց նա:

Թալիշի համայնքապետ Վիլեն Պետրոսյանն էլ լրատվամիջոցի հետ զրույցում ասել է, որ ժամանակավոր կացարաններից 14-ն արդեն հավաքվել են, 6-ը դեռ հավաքման փուլում են:

«Երբ տնակներն ամբողջովին պատրաստ լինեն, կանցկացնեն ջրամատակարարումն ու էլեկտրամատակարարումը, և նոր արդեն դրանք կբնակեցվեն»,-ասել է նա:

Համայնքապետի խոսքով` Ալաշանում պետք է վերաբնակեցվեր թալիշցի 27 ընտանիք, բայց հանգամանքների բերումով այնտեղ բնակեցվել է 37-ը:

«Կան ընտանիքներ, որոնց տեղավորել ենք պահակակետերում, բնակարաններ կան, որտեղ տեղավորել ենք 2 ընտանիքի: Այս տնակները, նախ և առաջ, տրամադրվելու են այն ընտանիքներին, որոնց կեցության պայմանները լավ չեն»,-ասել է Պետրոսյանը՝ հավելելով, որ համայնքում մասամբ լուծված կարելի է համարել թալիշցիների զբաղվածության հարցը:

«Նրանցից շատերը ծառայության են անցել սահմանագծում, շատերն աշխատում են գյուղի փայտածուխի գործարանում, դպրոցում, բուժկետում և այլն»,-հավելեց համայնքապետը:

Թեև Թալիշում տևական ժամանակ է, կրակոցներ չեն հնչում, բայց բնակիչներից շատերը վախենում են վերադառնալ իրենց տները:

«Գյուղում 8 հոգի հերթապահում են: Շարունակվում է գյուղապետարանի և հանդիսությունների սրահի շինարարությունը»,-ասել է Վիլեն Պետրոսյանը:

Աղբյուր` Փաստինֆո