Փաստ ինֆո

Ապօրինի կերպով ձեռք բերված «ԱԿ» տեսակի ինքնաձիգից Վ.Ասոյանի սպանության գործով մեղադրողն այսօր միջնորդեց ամբաստանյալ Գագիկ Ղանդիլյանին մեղավոր ճանաչել ՀՀ քրեական օրենսգրքի 104-րդ և 235-րդ հոդվածների առաջին մասերով՝ սպանություն և ապօրինի զենք-ռազմամթերք ձեռք բերել ու պահել, և դատապարտել ընդհանուր առմամբ 11 տարվա ազատազրկման:

Մեղադրողը նշեց, որ քննությամբ հիմնավորվել է, որ Գ.Ղանդիլյանը ապօրինաբար ձեռք է բերել ինքնաձիգ և փամփուշտներ: Տեսնելով տան մոտ նստած տուժողին և հիշելով, որ շուրջ 3 տարի առաջ հեռախոսային խոսակցության մեջ տուժողը հայհոյել ու սպառնացել է իրեն, գնացել է տուն, վերցրել ինքնաձիգն ու փամփուշտները, վերադարձել Ասոյանի տան մոտ ու կրակել նրա ուղղությամբ, կյանքի հետ անհամատեղելի վնասվածքների հետևանքով տուժողը մահացել է:

Մեղադրողը նշեց, որ ամբաստանյալը լիովին իրեն մեղավոր է ճանաչել, հայտնել է, որ իր հետ ոչ ոք չի եղել, ոչ ոք իրեն չի դրդել: Ըստ ամբաստանյալի, ինքը տուժողի ուղղությամբ կրակոցներ է արձակել՝ հիշյալ հեռախոսային խոսակցության ժամանակ տուժողի կողմից հնչեցրած հայհոյանքներից ու սպառնալիքներից իր մոտ առաջացած վախի հետևանքով:

Մեղադրողը խնդրեց դատարանից հաշվի առնել, որ ամբաստանյալն ունի մինչև 14 տարեկան երեք երեխա, նախկինում դատապարտված չի եղել, և որ ամբաստանյալն իրեն մեղավոր է ճանաչել, տվել խոստովանական ցուցմունք և դատարանում զղջացել կատարածի համար:
Տուժողի իրավահաջորդի ներկայացուցիչ, փաստաբան Սեդա Սաֆարյանը պնդեց նախկինում իր հայտնած դիրքորոշումը՝ արարքը ճիշտ չի որակվել, այն պետք է որակվեր ոչ թե ՀՀ քրեական օրենսգրքի 104-րդ հոդվածի 1-ին մասով, այլ հոդվածի 2-րդ մասով, քանի որ առկա են շատերի կյանքի համար վտանգավոր եղանակով ու խուլիգանական դրդումներով սպանություն կատարելու հանգամանքները:

Տուժողի իրավահաջորդի ներկայացուցիչը գտնում է, որ սպանության դրդչություն է եղել՝ ըստ ամբաստանյալի ցուցմունքի, ինքն իմացել է, որ տուժողը հետաքրքրվել ու փնտրել է իրեն, այսինքն՝ կարող է խոսք գնալ նախնական համաձայնության մասին:

Իրավահաջորդի ներկայացուցիչն իր անհամաձայնությունը հայտնեց մեղադրողի միջնորդությանը, որով մեղադրողը միջնորդել էր սպանության համար 11 տարվա, իսկ ապօրինի զենք-ռազմամթերք ձեռք բերել-պահելու համար 2 տարվա ազատազրկման դատապարտել և վերջնական պատիժ 11 տարվա ազատազրկում նշանակել: «Կարելի է ասել զենքի համար պատիժ նշանակելու միջնորդություն չի արվել»,- ասաց փաստաբանը՝ հավելելով, որ մեղադրողի դիրքորոշումը սուբյեկտիվ է և որ նա պատժի մասով գնացել է ակնհայտ մեղմացման:

Շատ մեղմ է մեղադրողի միջնորդած պատիժը, ասաց Սեդա Սաֆարյանը՝ իր հերթին միջնորդելով նրա արարքին ավելի համաչափ, մեղադրանքի հոդվածներով նախատեսված առավելագույն պատիժ նշանակել:

Ս.Սաֆարյանը հիշեցրեց նաև, որ ամբաստանյալը դեպքից հետո փորձել է փախչել՝ նա փորձել է մեկնել Ախալքալաք, սակայն Բավրայի անցակետում ոստիկանները նրան բռնել են ու տեղափոխել ոստիկանության բաժին:

Ամբաստանյալի պաշտպան Սարգիս Խաչատրյանն իր հերթին միջնորդեց հոդվածներով նախատեսված նվազագույն պատիժ նշանակել: Մասնավորապես, պաշտպանը տեսակետ հայտնեց, որ հիմնավոր չէ 11 տարվա ազատազրկում միջնորդել մի մարդու համար, ով առաջին անգամ է դատապարտվում:

Պաշտպանն ընդգծեց, որ ամբաստանյալի հարազատները պատրաստ են տուժողի ընտանիքի կրած ողջամիտ վնասներն ամբողջությամբ հատուցել: Նա միաժամանակ նշեց, որ ամբաստանյալը իր ընտանիքի միակ կերակրողն է, և նշանակված պատիժը պատիժ կդառնա նաև նրա ընտանիքի համար:

Հաջորդ դատական նիստում ամբաստանյալը հանդես կգա վերջին խոսքով, և դատարանը կհեռանա խորհրդակցական սենյակ՝ դատավճիռ կայացնելու:

Աղբյուր` Փաստինֆո