Փաստ ինֆո

Արաբական Միացյալ Էմիրությունների իշխանությունները հանել են Հարավ-Աֆրիկյան Հանրապետության քաղաքացի Էմլին Քալվերվելին և նրա ուկրաինացի հարսնացու Իրինա Նոգային առաջադրված՝ արտաամուսնական սեքսի մեղադրանքը: Այս մասին, ըստ BBC-ի ռուսական ծառայության, հաղորդում է տեղական News24 պարբերականը:

29-ամյա Քալվերվելը և 27-ամյա Նոգայը ձերբակալվել էին մարտի 8-ին այն բանից հետո, որ աղջիկը գանգատվել էր բժշկին փորի ցավից: Վերջինս պարզել էր, որ աղջիկը հղի է:
Քանի որ երիտասարդները չեն կարողացել ամուսնության վկայական ցույց տալ, նրանք հիվանդանոցում կալանավորվել էին արտաամուսնական սեքսի համար, ինչն ԱՄԷ-ում անօրինական է համարվում:

Դրանից քիչ անց կալանավորվածների ծնողները դիմել են ԱՄԷ իշխանություններին՝ երիտասարդներին ազատ արձակելու խնդրանքով:

Էմլին Քալվերվելի հայրը Mail Online պարբերականին տված հարցազրույցում հայտարարել է, որ սկզբից ինքը շատ ուրախացել է նորությունից, որ ինքը թոռ է ունենալու, սակայն հետո շատ է վախեցել որդու համար:

«Առաջին ընտանեկան հարսանիքին և առաջին թոռան ծնվելուն պատրաստվելու փոխարեն մենք զգում ենք անհանգստություն և սթրես … Այն ամենը, ինչի մասին մենք կարող ենք մտածել, դա այն է, թե ինչպես նրանց այնտեղից դուրս բերենք»,- ասել է նա:

Երիտասարդ տղամարդու մայրը ավելի վաղ նշել է, որ «նրանց միակ հանցագործությունն այն է, որ նրանք սիրում են իրար»:

Էմլին Քալվերվելը վերջին հինգ տարիներին աշխատում էր ԱՄԷ-ում և սկսել է հանդիպել Իրինա Նոգայի հետ 2014թ.:

Աղբյուր` Փաստինֆո