Փաստ ինֆո

ԱԳ նախարար Էդվարդ Նալբանդյանի խոսքը Հունաստանի ԱԳ նախարար Նիկոս Կոսձիասի հետ համատեղ մամլո ասուլիսին:

Նախարար Նալբանդյանը նշել է, որ սա լավ հնարավորություն է՝ շարունակելու ակտիվ երկխոսությունը, քննարկելու երկու երկրների և ժողովուրդների միջև փոխգործակցության հետագա ամրապնդման ուղիներն ու քայլերը:

Նախ՝ առանձնազրույցի ձևաչափով, ապա՝ պատվիրակությունների մասնակցությամբ, Հունաստանի և ՀՀ ԱԳ նախարարները քննարկել են երկկողմ և բազմակողմ օրակարգի հարցերի լայն շրջանակ:

Կարևորվել է բարձր մակարդակի կանոնավոր փոխայցելությունները, որոնք յուրաքանչյուր անգամ նորովի են հարստացնում երկկողմ օրակարգը և նոր լիցք են հաղորդում տարբեր ձևաչափերում սերտ համագործակցությանը:

Կողմերը միևնույն ժամանակ, համակարծիք են, որ երկու պետությունների փոխգործակցության ներկա մակարդակը զիջում է երկու ժողովուրդների միջև դարերից եկող ջերմ բարեկամական կապերին, ավանդաբար փոխադարձ խոր համակրանքին: Պայմանավորվել են լրացուցիչ ջանքեր գործադրել բոլոր ոլորտներում, ուղղություններով՝ նոր խթան հաղորդելու հարաբերությունների առավել ամրապնդմանը և ընդլայնմանը:

Անդրադարձ է կատարվել քաղաքական, առևտրատնտեսական, ռազմատեխնիկական, կրթության, գիտության, մշակույթի և այլ ոլորտներում փոխգործակցության առավել խորացման ուղիներին:

Քննարկվել են Հայաստան-Եվրոպական միություն հարաբերությունները, դրանց զարգացման ուղղությամբ գործադրվող ջանքերը:

Նաև դիվանագիտական կադրերի ուսուցման և վերապատրաստման ոլորտում համագործակցության մասին փոխըմբռնման հուշագիր է ստորագրվել Հայաստանի Հանրապետության արտաքին գործերի նախարարության և Հունաստանի Հանրապետության արտաքին գործերի նախարարության միջև։ Սա փոխգործակցության նոր ոլորտ է։

Քննարկվել են տարածաշրջանային և միջազգային հրատապ խնդիրներ: Անդրադարձ է կատարվել Կիպրոսի հիմնահարցին: Նախարար Կոձիասը ներկայացրել է դրա շուրջ վերջին զարգացումները:

Է.Նալբանդյանը ներկայացրել է ղարաբաղյան կարգավորման գործընթացի շուրջ ստեղծված իրավիճակը, Հայաստանի և ԵԱՀԿ Մինսկի խմբի համանախագահ պետությունների կողմից գործադրվող ջանքերը՝ ուղղված հիմնախնդրի հանգուցալուծման առաջ մղմանը:

Երկուստեք շեշտվել է, որ առկա խնդիրները չունեն ռազմական լուծում և պետք է կարգավորվեն համաձայնեցված ձևաչափերի շրջանակներում:

Աղբյուր` Փաստինֆո