Փաստ ինֆո

Հանցավոր համագործակցության վերաբերյալ գործով այսօրվա դատական նիստն էլ տեղի չունեցավ՝ դատարան չէր ներկայացվել գործով ամբաստանյալ Վահան Շիրխանյանը, ինչպես նաև դատարան չէր ներկայացել հինգ պաշտպան:

Չներկայացած պաշտպանների թվում էր նաև պաշտպանը, ում արձակուրդ մեկնելու պատճառով անցյալ դատական նիստը հետաձգվել էր: Պաշտպանը հայտնել էր դատարանին, որ մինչև մարտի 10-ը գտնվելու է արձակուրդում:

Դատական նիստի ավարտին՝ լրագրողների հարցին, թե մինչև ե՞րբ լուծում չի ստանալու Վահան Շիրխանյանին դատարան ներկայացնելու խնդիրը, նրա պաշտպան, փաստաբան Հայկ Ալումյանն ընդգծեց, որ Վ.Շիրխանյանի առողջական վիճակը նույնպիսին է, ինչպես որ էր նախորդ նիստի ժամանակ, այսինքն՝ եթե ինչ-որ բան փոխվեր, պետք է փոխվեր նրան ներկայացնողների մոտ:

Պաշտպանը հավելեց, որ տարբեր սարքավորումներ կան, որոնց միջոցով շարժունակությունը կորցրած անձին կարելի է տեղափոխել որևիցե ուրիշ տեղ: «Բայց հիմա այստեղ դեռ քարի դարում են»,- ասաց Հայկ Ալումյանը՝ հավելելով, որ մարդկությունը այս մի քանի հազար տարվա մեջ ահագին առաջ է գնացել այդպիսի տեխնիկական միջոցներ հայտնագործելու հարցում:

Ըստ պաշտպանի, այդպիսի տեխնիկական միջոց չհատկացնելով Վ.Շիրխանյանին դատարան ներկայացնողներն ամեն ինչ անում են, որպեսզի Եվրոպական դատարանին ցույց տան, որ ամեն ինչ նորմալ է Վ.Շիրխանյանի առողջական վիճակի հետ: «Իրականում ինքը չի կարող գալ, թեև շատ ուզում է գալ»,- ասաց փաստաբանը՝ հիշեցնելով, որ Վ.Շիրխանյանն ավելի վաղ ասել է, որ ուզում է գալ դատարան և որ ինքը հայտարարություններ է անելու լրագրողների համար: «Այստեղ եթե կա մի կողմ, որը չի ուզում, որ պրն. Շիրխանյանը հայտնվի այստեղ, ապա դա պետական մարմիններն են»,- ասաց պաշտպանը:

Հայկ Ալումյանը հայտնեց, որ Վահան Շիրխանյանի դիմումի քննության շրջանակներում Եվրոպական դատարանը ՀՀ կառավարությունից պահանջել է Վահան Շիրխանյանի հիվանդության հետ կապված բոլոր փաստաթղթերը ներկայացնել, կառավարությունը ներկայացրել է փաստաթղթեր՝ փորձելով տպավորություն ստեղծել, որ դրանք բոլոր փաստաթղթերն են, մինչդեռ դրանք փաստաթղթերի կեսից ավելի քիչն են: Ըստ Հայկ Ալումյանի, բարեբախտաբար իրենք ունեն դրա ապացույցը և Եվրոպական դատարանին այն ներկայացվել է:
Կառավարությունը փետրվարի 22-ին՝ ՄԻԵԴ հարցերին պատասխանելու վերջնաժամկետի օրը, ներկայացրել է իր պատասխանը: Դրանում կառավարությունը փորձել է հերքել Վ.Շիրխանյանի ներկայացուցիչների մի շարք փաստարկներ, ինչը, կառավարության մոտ, ըստ Հայկ Ալումյանի, լավ չի ստացվել:

Միաժամանակ կառավարությունը ներկայացրել է բժշկական փաստաթղթերը՝ «ձևացնելով իբրև թե դրանք բոլոր փաստաթղթերն են, որոնք այս պահի դրությամբ գոյություն ունեն»: Դրանից հետո սովորական ընթացակարգի համապատասխան, կառավարության ներկայացրած փաստաթղթերը ՄԻԵԴ-ը ներկայացրել է դիմող կողմի փաստաբաններին և առաջարկել կառավարության դիրքորոշման վերաբերյալ ներկայացնել առարկություններ, եթե այդպիսիք կան:

«Փաստաբանները ներկայացրել են առարկությունները և այնտեղ շատ պարզ, հիմնավոր ձևով ներկայացրել են բոլոր այն անհամապատասխանությունները, որոնք առկա են կառավարության դիրքորոշումների մեջ»,- ասաց Հայկ Ալումյանը:

Փաստաբանը նշեց, որ Մարդու իրավունքների պաշտպանի աշխատակազմի ներկայացուցիչների՝ Վահան Շիրխանյանի խուց այցի ընթացքում հերքվել է ՔԿՎ հերթական ապատեղեկատվությունն այն մասին, թե խցում միշտ չորս հոգի է եղել՝ հինգերորդ կալանավորին հապճեպ տեղափոխել են, սակայն չեն հասցրել տեղափոխել նրա մահճակալը:

«Ստի ոտքը կարճ է: Եթե չորս հոգի են եղել, բա մահճակալն ո՞ւմ համար էր»,- ասաց փաստաբանը՝ հիվանդանոցից տեղափոխելուց հետո Վահան Շիրխանյանին այդ խցում տեղավորելը գնահատելով որպես մանր վրեժխնդրություն այն բանի համար, որ ՄԻԵԴ-ին ցույց տալու համար ստիպված են եղել Վ.Շիրխանյանին հիվանդանոց տեղափոխել: Թեև խուցը պատժախուց չէ սովորական նշանակութամբ, սակայն, ըստ Հայկ Ալումյանի, ում ուզում են պատժել, տեղավորում են այդ խցում:

Իրար հետ անհամատեղելի դեղերի նշանակման վերաբերյալ իրենց բողոքի հետ կապված Հայկ Ալումյանը նշեց, որ երբ իրենք ապացուցել են դա, ՔԿՀ-ում սկսել են ասել, որ թեև այդ դեղերն իրար հետ համատեղելի չեն, սակայն դրանք Վահան Շիրխանյանին միաժամանակ երբեք չեն տրվել: Իրականում, սակայն, ըստ Հայկ Ալումյանի, եթե Վ.Շիրխանյանի բժշկական քարտը բերեն դատարան, պարզ կլինի, որ այդ անհամատեղելի դեղերը բոլորն իրար հետ են տրվել:

Աղբյուր` Փաստինֆո