Փաստ ինֆո

Եզդիական Լովանթու և Սաբբահու ընտանիքների տղաներն ընդամենը 16 և 14 տարեկան էին, երբ նրանց ստիպում էին կրակել ԻՊ գրոհայինների կողմից մահապատժի ենթարկված մարդկանց մահացած մարմիններին:

Ըստ BBC-ի ռուսական ծառայության, նրանք պատահական հայտնվել էին Իրաքի տարածքում «Իսլամական պետություն» խմբավորման կողմից կազմակերպված դեռահասների համար մարզումային ճամբարում:

Մահապատժի ենթարկվածների վրա կրակոցները ուսումնական ծրագրի միայն մի փոքր մասն էր, պատմում են Լովանթն ու Սաբբահը, ովքեր ներկայումս գտնվում են Գերմանիայում եզդիների համար ապաստանում:

2014թ. աշխարհը սարսափով էր դիտում, թե ինչպես տասնյակ հազարավոր եզդիներ ԻՊ-ի կողմից արգելափակվել էին Սինջար սարում ահավոր շոգ եղանակին՝ առանց սննդի ու ջրի:

Հենց այդ ժամանակ էր, որ իսլամիստները ներխուժել են Լովանթի ու Սաբբահի գյուղը: Գրեթե բոլոր մեծահասակ տղամարդկանց տարել էին, հետո սպանել: Երեխաներին իրենց մայրերի հետ միասին տեղափոխել էին հարևան քաղաք և միայն այնտեղ նրանց բաժանել իրարից:

Մեկ տարուց ավելի դեռահասները մարզվում էին Սիրիայի տարածքում տեղաբաշխված ճամբարում որպես «խալիֆայության ձագուկներ»:

«Մեզ սովորեցնում էին զենք լիցքավորել ու կրակել: Մեզ սովորեցնում էին զինվոր լինել, մենք փորսող էինք տալիս, մեզ սովորեցնում էին կռվել»,- պատմում է Լովանթը:

«Նրանք մեզ իրենց հետ տանում էին մեծ գերեզմանոցներ, որտեղ պառկած էին նրանք, ովքեր, ըստ ԻՊ գրոհայինների, դավաճանել են «Իսլամական պետության» գաղափարին»:

«Մեզ ստիպում էին կրակել այդ մարմինների վրա՝ մարդկանց վրա կրակելուն ընտելանալու համար»,- հավելում է Սաբբահը:

Ոչ ոք չգիտի, թե հատկապես որքան եզդի տղաներ են հայտնվել ԻՊ մարզումային ճամբարներում: Սակայն, իրավապաշտպանների որոշ հաշվարկների համաձայն, խոսքը կարող է գնալ ութ տարեկանից սկսած հարյուրավոր եզդի տղաների մասին:

Ըստ BBC-ի զրուցակիցների, իրենց ճամբարում կային մոտ 120 դեռահասներ: Նրանց մեծամասնությունը ծնունդով Սիրիայից մահմեդականներ էին: Շատերին ճամբարներ էին ուղարկել սեփական ծնողները, որպեսզի նրանցից դաստիարակեն «ջիհադիստների նոր սերունդ»:

Աղբյուր` Փաստինֆո