Փաստ ինֆո

ՀՀ նախկին փոխվարչապետ և պաշտպանության նախկին փոխնախարար, հանցավոր համագործակցության վերաբերյալ գործով ամբաստանյալ Վահան Շիրխանյանի պաշտպան, փաստաբան Հայկ Ալումյանի բողոքի հիման վրա «Երևան-Կենտրոն» ՔԿՀ այցելած դիտորդները չեն կարողացել ծանոթանալ ամբաստանյալին պահելու պայմաններին: Պաշտպան Ալումյանը բողոքել էր, որ իր պաշտպանյալին հիվանդանոցից տեղափոխելուց հետո տեղավորել են չափազանց խոնավ և նեղ խցում:

Ամեն բան շատ պարզ է՝ պարզունակության աստիճանի, ֆեյսբուքյան իր էջում գրում է փաստաբանը՝ ներկայացնելով դիտորդների չհաջողված այցելության մանրամասները:

«Դիտորդները ցանկանում են հանդիպել պ-ն Շիրխանյանին, քրեակատարողական հիմնարկի աշխատակիցները նրանց պատասխանում են, որ կա դատարանի կողմից սահմանված՝ տեսակցությունների արգելք: Քանի որ դիտորդների տվյալ այցելության նպատակն էր՝ ծանոթանալ պ-ն Շիրխանյանին պահելու պայմաններին /պաշտպանը բողոքել էր, որ տեղավորել են չափազանց խոնավ և նեղ խցում/, ապա դիտորդները պահանջում են իրենց ցույց տալ խուցը: Քրեակատարողները նրանց պատասխանում են, որ խուցը հնարավոր չէ դիտարկել, քանի որ պ-ն Շիրխանյանը խցում է, իսկ նրա հետ տեսակցություններն արգելված են:

Այդ ժամանակ դիտորդներն առաջարկում են կարճ ժամանակով պ-ն Շիրխանյանին տեղափոխել մեկ այլ խուց, որպեսզի իրենք, առանց պ-ն Շիրխանյանին հանդիպելու, դիտեն նրա խցի պայմանները:

Քրեակատարողականները մտնում են պ-ն Շիրխանյանի խուց և հայտարարում, որ «հյուրեր են եկել, պետք է խուցն ազատեք, որ նրանք խուցը տեսնեն»՝ առանց բացատրելու, թե ի՞նչ հյուրեր են, ինչո՞ւ պետք է խուցը նայեն և այլն:

Բնականաբար, պ-ն Շիրխանյանը, ով հիվանդության պատճառով անկողնուց վեր է կենում միայն պաշտպանին տեսակցելիս, հայտարարել է, որ ինքը չի պատրաստվում ինչ-որ հյուրերի համար վեր կենալ մահճակալից, հագնվել ու դուրս գալ:
Ուրախացած քրեակատարողականները վերադառնում են դիտորդների մոտ և հայտնում, որ պարոն Շիրխանյանը չի ցանկանում դուրս գալ խցից, հետևաբար, դիտորդների մուտքը խուց անհնարին է:

Այստեղ են ասում՝ կիսատ ճշմարտություն ասելը սուտ խոսելուց վատ է»,- նշվում է Հայկ Ալումյանի գրառման մեջ:

Լուսանկարը՝ Ֆոտոլուրի

Աղբյուր` Փաստինֆո