Փաստ ինֆո

Հայկական ընտանիքներում բռնությունների թիվն  աճե՞լ է, թե՞ հասարակությունն ավելի շատ է իրազեկվում  նմանատիպ դեպքերի մասին:

Դեռևս ոչ վաղ անցյալում նման վիճակագրություն չէր վարվում, ինչը հնարավորություն կտար հասկանալու հանցագործության այս տեսակի աճի կամ նվազման մասին, իսկ որպեսզի ցանկացած հանցագործության դեմ արդյունավետ պայքար մղվի գաղտնիք չէ, որ նախ և առաջ անհրաժեշտ է օբյեկտիվ վիճակագրություն ունենալ, և պարզել դրանց առաջացման պատճառները:

2016թ. ընտանեկան բռնությունների քանի դեպք է գրանցվել և ինչ ընթացք է տրվել այս և այլ հարցերի վերաբերյալ «Փաստինֆո» գործակալության գրավոր հարցմանը պատասխանել է Քննչական կոմիտեն:

Ըստ այդմ՝ ՔԿ-ից տեղեկացնում են, որ ՔԿ նախագահի հանձնարարությամբ 2016 թվականին ներդրվել է ընտանեկան բռնության վերաբերյալ գործերի քննության արդյունքների մասին վիճակագրության վարման համակարգ։

Ըստ վիճակագրության՝ 2016թ. ՀՀ քննչական կոմիտեի վարույթում  քննվել է ընտանեկան բռնության վերաբերյալ 359 քրեական գործ,  որոնցից 18-ը՝  ՀՀ քննչական կոմիտեի զինվորական քննչական գլխավոր վարչության վարույթում:

32 նյութերով քրեական գործի հարուցումը մերժվել է, որոնցից 1-ը` արդարացման, իսկ  31-ը` ոչ արդարացման հիմքով:

ՔԿ վարույթում  ընտանեկան բռնության վերաբերյալ 359 քրեական գործերից 10-ը  վերաբերել է սպանությանը՝ ՀՀ քրեական  օրենսգրքի 104-րդ հոդվածին,  2-ը՝ անզգուշությամբ մահ պատճառելուն՝ ՀՀ քրեական օրենսգրքի  109-րդ հոդվածին,  1-ը՝ ինքնասպանության հասցնելուն՝  ՀՀ քրեական  օրենսգրքի 110-րդ հոդվածին,  7-ը՝ դիտավորությամբ առողջությանը ծանր վնաս պատճառելուն՝  ՀՀ քրեական օրենսգրքի 112-րդ հոդվածին։ Գործերի հիմնական մասը՝  222-ը վերաբերել է ծեծին՝ ՀՀ քր. օր-ի 118-րդ հոդվածին,  3-ը՝ ֆիզիկական ուժեղ ցավ կամ հոգեկան ուժեղ տառապանք  պատճառելուն՝ ՀՀ քրեական օրենսգրքի 119-րդ հոդվածին։ Հաշվետու ժամանակահատվածումքննվել է անգամ ընտանիքի անդամի կողմից սեռական շահագործման ենթարկելու երկու քրեական գործ։  Ընդհանուր առմամբ  որպես մեղադրյալ ներգրավվել է 204 անձ, որոնց զգալի մաս՝ 122 հոգի,  18-35 տարեկան, իսկ մյուս մասը՝ 35-ից բարձ:

Մեր հարցին, թե արդյո՞ք մեղադրյալների մեջ կրկնահանցագործներ եղել են թե ոչ, ՔԿ-ից պարզաբանել են, որ 204 անձանցից ընդամենը 5-ն են նախկինում դատապարտված եղել:

Նշենք նաև, որ ներկայացվող հանցագործություններից  թվից  3-ը կատարվել է մոր կողմից, 14-ը՝ հոր կողմից, 3 դեպք էլ՝ խորթ հոր կողմից:

Ինչ վերաբերում է այս գործով տուժողներին, ապա նրանց հիմնական մասը 18-35 տարեկան են,  20 եղել են մինչև 12 տարեկան երեխաներ, 2-ը ՝12-14 տարեկան, 25-ը՝ 14-16 տարեկան, 2-ը՝ 16-18 տարեկան,  80-ը՝ 35 տարեկանից բարձր:

Մեղադրական եզրակացությամբ դատարան է  ուղարկվել 89 քրեական գործ 89 անձի վերաբերյալ:

Աղբյուր` Փաստինֆո