Փաստ ինֆո

Սպանության փորձի վերաբերյալ գործով այսօրվա դատական նիստը հետաձգվեց՝ ամբաստանյալ Արման Մարջանյանի երեք պաշտպաններից երկուսը ներկա չէին՝ պաշտպաններից մեկի հարազատի մահվան, իսկ մյուսի՝ այլ աշխատանքային ծանրաբեռնվածության պատճառով:

Արման Մարջանյանը հայտնեց, որ ինքը կցանկանար, որ դատական նիստը կայանար բոլոր պաշտպանների մասնակցությամբ: Բացի այդ նիստին ներկա նրա պաշտպան Արման Արզումանյանը հայտարարեց, որ գործից անջատված մասով հայտարարվում է նախաքննության ավարտի մասին: Ըստ պաշտպանի, այդ գործը, որը դատարան կմտնի մոտ 15 օրվա ընթացքում, տրամաբանական է, որ քննվի ներկայումս քննվող գործի հետ մեկ վարույթում, քանի որ երկու գործերն էլ նույն դեպքին են վերաբերում:

Դատարանը համարեց, որ դա նիստի հետաձգման ողջամիտ փաստարկ ու պատճառ չէ՝ հաշվի առնելով, որ դատարան մուտք գործելիք և ներկայումս քննվող գործերը տարբեր փուլերում կլինեն՝ Արման Մարջանյանի գործով արդեն բոլոր տուժողներն ու վկաները հարցաքննվել են: Եվ բացի այդ, անհնարին է կանխագուշակել, թե նոր գործով համակարգիչը ո՛ր դատավորին կընտրի՝ որպես գործը քննող դատավոր:

Անկախ նրանից, թե քանի պաշտպան կմասնակցի և նոր գործը մտել է դատարան, թե ոչ, հաջորդ նիստը կայանալու է, արձանագրեց դատարանը:

Ըստ մեղադրանքի, Արման Մարջանյանն երկու և ավելի անձանց ապօրինաբար կյանքից զրկելու դիտավորությամբ խմբի կազմում իր մոտ եղած ապօրինի հրազենի գործադրմամբ կատարել է սպանության փորձ:

Ա.Մարջանյանին մեղադրանք է առաջադրվել ՀՀ քրեական օրենսգրքի 34-104-րդ հոդվածի 2-րդ մասի 1-ին և 7-րդ կետերով՝ մի խումբ անձանց կամ կազմակերպված խմբի կողմից երկու կամ ավելի անձանց սպանության փորձ, և 235-րդ հոդվածի 1-ին մասով՝ ապօրինի կերպ զենք ձեռք բերելը, պահելը, կրելը:

Աղբյուր` Փաստինֆո