Փաստ ինֆո

Հորը ցավազրկողների հետ նաև բենզին ներարկելու և այդկերպ նրան անզգուշությամբ մահ պատճառելու համար 48-ամյա դուստրը դատապարտվեց 1 տարի ժամկետով ազատազրկման:

Ըստ մեղադրանքի՝ բժշկական մասնագիտական կրթություն ունեցող Կարինե Հովհաննիսյանը, գործով տուժող իր հորը՝ Ռուբիկ Հովհաննիսյանին ցավազրկող դեղամիջոցներ ներարկելու ժամանակ դրսևորել է անփութություն. ցավազրկող դեղամիջոցների հետ միասին, տուժողի ներկայացմամբ և պահանջով, վերջինս ներարկել է նաև սուր հոտ ունեցող լուծույթ:

Ցավազրկողների հետ ներարկել է նաև սուր հոտ ունեցող լուծույթ, որը, պարզվել է, բենզին է

Մասնավորապես, ցավազրկող դեղամիջոցներ լիցքավորելու հետ միասին Ռուբիկ Հովհաննիսյանի ներկայացմամբ և պահանջով Կարինե Հովհաննիսյանը ներարկիչում լիցքավորել է նաև Ռուբիկ Հովհաննիսյանի կողմից նախկինում բնակարան բերված ապակյա, առանց պիտակի սրվակում, բաց վիճակում գտնվող, սուր հոտ ունեցող, այդ պահին իրեն անհայտ բաղադրության լուծույթ, այնուհետև, տվյալ իրադրության պայմաններում հնարավորություն ունենալով և պարտավոր լինելով գիտակցել իր արարքով Ռուբիկ Հովհաննիսյանի կյանքի և առողջության համար վտանգավոր հետևանքների առաջացման հնարավորությունը` չի նախատեսել այն և առանց ստուգելու ու պարզելու սրվակի պարունակությունը` հորը ներարկել է աճուկային աջ հատվածից:

Ըստ Ռուբիկ Հովհաննիսյանի դիակի դատաբժշկական փորձաքննության եզրակացության՝ այդ լուծությունը հանդիսացել է բենզին, որի ազդեցության ֆոնի վրա առաջացած սուր կորոնար անբավարարությունից և սրտամկանի ռեցիդիվող ինֆարկտից Ռուբիկ Հովհաննիսյանը մահացել է:

Գործը քննվել է արագացված ընթացակարգով Կարինե Հովհաննիսյանը առաջադրված մեղադրանքում իրեն մեղավոր է ճանաչել:

Դատարանը գտել է, որ Կարինե Հովհաննիսյանի կողմից, անզգուշությամբ տուժող Ռուբիկ Հովհաննիսյանին մահ պատճառելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 109-րդ հոդվածի 1-ին մասով նախատեսված հանցագործության հատկանիշներին:

Որպես ամբաստանյալի պատասխանատվությունը և պատիժը մեղմացնող հանգամանք, դատարանը հաշվի է առել այն, որ նա առաջադրված մեղադրանքում իրեն մեղավոր է ճանաչել և տվել է խոստովանական ցուցմունքներ:

Աղբյուր` Փաստինֆո