Փաստ ինֆո

ՀՀ քննչական կոմիտեն առարկում է ոչ թե կոռուպցիոն հանցագործությունների քննության վերաբերյալ վիճակագրական հաշվետվությունները հրապարակելու, այլ՝ դատախազությանը «մեթոդական ուղեցույց» հաստատելու իրավասություն վերապահելու դեմ: Այս մասին ի պատասխան «Փաստինֆո»-ի հարցման՝ նշեց ՀՀ Քննչական կոմիտեի նախագահի խորհրդական Սոնա Տռուզյանը:

««Դատախազության մասին» օրենքում լրացումներ կատարելու մասին» Հայաստանի Հանրապետության օրենքի նախագծով, մասնավորապես, սահմանվում է, որ ՀՀ գլխավոր դատախազը հաստատում է «մեթոդական ուղեցույց», մինչդեռ «Իրավական ակտերի մասին» ՀՀ օրենքով նախատեսված չէ «մեթոդական ուղեցույց» որպես իրավական ակտի տեսակ և նույն այդ օրենքով ՀՀ գլխավոր դատախազը նորմատիվ իրավական ակտ ընդունելու լիազորություն չունի:

«Մեթոդական ուղեցույց» հաստատելու իրավասություն դատախազությանը վերապահված չէ նաև Սահմանադրությամբ, այսինքն՝ այդ դրույթը հակասահմանադրական է: Դա օրենքով ամրագրելը կնշանակեր վերադարձ խորհրդային դատախազական համակարգին, որին վերապահված էին լայն վերահսկողական լիազորություններ:

Դա հակասում է ՀՀ Սահմանադրության 176-րդ հոդվածի 4-րդ մասին, որի համաձայն՝ դատախազությունը գործում է Սահմանադրությամբ իրեն վերապահված լիազորությունների շրջանակում՝ օրենքի հիման վրա, իսկ նույն հոդվածի 2-րդ մասը հստակ թվարկում է դատախազական գործառույթների շրջանակը, որտեղ նման լիազորություն նախատեսված չէ:

Ինչ վերաբերում է վիճակագրական տվյալները հրապարակելուն, ապա մեր զրուցակիցը նշեց, որ միմիայն ողջունում են հրապարակայնության ապահովումը` հիշեցնելով, որ այդ էջը դատախազության կայքում բացվել է տարիներ առաջ` դատախազության նախաձեռնությամբ` քաղաքացիական հասարակության հետ քննարկումների արդյունքում եւ նրանց առաջարկությամբ: Եւ եթե այսօր անհրաժեշտություն կա օրենքով ամրագրել այդ տվյալների հրապարակումը, ապա Կոմիտեն որեւէ առարկություն այդ մասով, բնականաբար, չունի:

Քննչական մարմինները ինչպես նախկինում, այնպես էլ այսօր դատախազությանը տրամադրում են քննչական աշխատանքի վերաբերյալ վիճակագրական տվյալներ: 2008 թվականի հոկտեմբերի 23-ի N1225-Ն որոշմամբ ՀՀ կառավարությունը հաստատել է մինչդատական վարույթը բնութագրող ցուցանիշների վիճակագրական հաշվետվությունների միասնական ձևերը և դրանց լրացման ու ներկայացման կարգերը, որով ներկայացվում են մինչդատական վարույթին վերաբերող ցուցանիշների համակարգված միասնական վիճակագրություն վարելու, ՀՀ հետաքննության և նախաքննության մարմինների կողմից ներկայացվող քննչական աշխատանքի մասին հիմնական տվյալների ամսական, քննչական աշխատանքի և հանցագործությունների մասին դիմումների ու հաղորդումների քննարկման վերաբերյալ կիսամյակային և տարեկան վիճակագրական հաշվետվությունների ձևերը միասնական դարձնելու, ինչպես նաև դրանք ՀՀ գլխավոր դատախազություն և ՀՀ կառավարությանն առընթեր ՀՀ ոստիկանության ինֆորմացիոն կենտրոն ներկայացնելու ընթացակարգերը:

Ի դեպ՝ նախագծի հիմնավորմամբ դրա հեղինակ արդարադատության նախարարությունը վկայակոչել է ՄԱԿ-ի Գլխավոր ասամբլեայի կողմից 2003 թվականի հոկտեմբերի 31–ին Նյու Յորքում ընդունված Կոռուպցիայի դեմ կոնվենցիային, և հիմնավորումները վերաբերում են կոռուպցիոն բնույթի հանցագործությունների վիճակագրության վարմանը: Մինչդեռ նախագիծը վերաբերում է բոլոր տեսակի հանցագործությունների քննության արդյունքների վերաբերյալ վիճակագրական տվյալներ, համեմատական վերլուծություններ և եզրահանգումներ ներկայացնելուն:
Այսինքն՝ Նախագծի կարգավորման առարկան չի բխում դրա հիմնավորումներից։

Հետաքրքիրն այն է, որ ըստ ամփոփաթերթի` նախագիծն ուղարկվել է գրեթե բոլոր գերատեսչությունները` կարծիքի համար, անգամ`քաղաքաշինության պետական կոմիտե, իսկ ՀՔԾ եւ ՔԿ` ոչ, թեեւ նախագիծն առաջնահերթ նրանց է վերաբերում:

Աղբյուր` Փաստինֆո