Փաստ ինֆո

Ծննդկան Մերի Մարգարյանի և նրա դստեր մահվան գործով այսօր երկարատև ընդմիջումից հետո նշանակված դատական նիստը հետաձգվեց՝ մեղադրող դատախազի բացակայության պատճառով:

Մեղադրողը, չնայած նրան, որ ծանուցված էր նիստի օրվա և ժամի մասին, դատական նիստին չէր ներկայացել:

Նիստին ներկայացել էին դատավարության մյուս մասնակիցները և փորձագետ Հասմիկ Ղազինյանը, այսօր նախատեսվում էր փորձագետի հարցաքննությունը:

Նշենք, որ վերջին անգամ գործով դատական նիստ կայացել էր հունվարի 17-ին, սակայն կրկին հետաձգվել էր՝ Երևանի Պերինատոլոգիայի, մանկաբարձության և գինեկոլոգիայի կենտրոնի ղեկավար և Հանրապետության գլխավոր մանկաբարձ-գինեկոլոգ, գործով փորձագետ Ռազմիկ Աբրահամյանի դատարան չներկայանալու պատճառով:

Իսկ այս ընթացքում դատական նիստեր չեն եղել, նախագահող դատավոր Դավիթ Բալայանի վատառողջ լինելու պատճառով:

Հիշեցնենք, որ 2015թ. հուլիսի 27-ին «Շենգավիթ» ԲԿ-ում կեսարյան հատումից հետո «Էրեբունի» ԲԿ տեղափոխված և երկու օր անց մահացած Մերի Մարգարյանի գործով հիմնական մեղադրյալը «Շենգավիթ» ԲԿ-ի բժշկուհի Շուշանիկ Բախշյանն է, ում նկատմամբ որպես խափանման միջոց է ընտրվել գրավը:

Դատաբժշկական հանձնաժողովը պարզել է, որ Մերի Մարգարյանի և նրա նորածին դստեր կյանքը փրկելու հնարավորությունն ավելի մեծ կլիներ, եթե նրան շուտ ծննդալուծեին՝ կեսարյան հատման միջոցով:

Մերի Մարգարյանը 4 օր շարունակ ունեցել է բարձր ջերմություն, սակայն «Շենգավիթ» ԲԿ մանկաբարձ-գինեկոլոգ Շուշանիկ Բախշյանը, ով եղել է հղիի բժշկական օգնություն և սպասարկում իրականացնող բժշկուհին, պարտավոր լինելով նրան հոսպիտալացնել, հրաժարվել և չի կատարել իր պարտականությունները. այս պայմաններում հղիին չհոսպիտալացնելը չի հիմնավորվել:

Բժշկի կողմից ցուցաբերված անբարեխիղճ վերաբերմունքի հետևանքով Մերի Մարգարյանը ծննդալուծումից հետո «HELLP» սինդրոմ համախտանիշ երկկողմանի թոքաբորբ» ախտորոշմամբ 2015թ-ի հուլիսի 29-ին մահացել է, կնոջ մահվան հաջորդ օրը թոքերի և գլխուղեղի այտուցից մահացել է նաև նրա նորածին դուստրը:

Գործով Մյուս մեղադրյալ Անի Բաբելյանն էլ 2015 թվականի հուլիսի 25-ին առավոտյան եղել է հերթապահ մանկաբարձ-գինեկոլոգը, սակայն նա նույն օրը բարձր ջերմությամբ ԲԿ դիմած Մերի Մարգարյանին չի հոսպիտալացրել, ինչի հետևանքով առաջացած բազմաօրգանային անբավարարությունից Մ.Մարգարյանն օրեր անց՝ հուլիսի 29-ին, մահացել է:

Շուշանիկ Բախշյանին և Անի Բաբելյանին մեղադրանք է առաջադրվել ՀՀ քրեական օրենսգրքի 130-րդ հոդվածի 2-րդ մասի հատկանիշներով (Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ):

Լուսանկարը՝ Ֆոտոլուրի

Աղբյուր` Փաստինֆո