Փաստ ինֆո

Երևանի Աջափնյակ և Դավթաշեն վարչական շրջանների դատարանն այսօր մատուցողուհու սպանության աղմկարույց գործով ամբաստանյալ Դավիթ Թամրազյանին մեղավոր է ճանաչել ՀՀ քրեական օրենսգրքի 104-րդ հոդվածի 1-ին մասով՝ սպանություն և 185-րդ հոդվածի 2-րդ մասի 1-ին և 2-րդ կետերով՝ խոշոր չափերի վնաս պատճառելով, հրկիզման եղանակով գույքը դիտավորությամբ վնասելը, և դատապարտել նրան 13 տարվա ազատազրկման:

Ըստ մեղադրանքի, Դավիթ Թամրազյանը անձնապես վիրավորված լինելով իր հետ նախկինում հարաբերությունների մեջ եղած, տվյալ պահին հարաբերությունները խզած տուժողից, նրանից դիտավորությամբ ապօրինաբար կյանքից զրկելու նպատակով, 2013 թվականի մայիսի 7-ին գնացել է աղջկա վարձակալած բնակարան, թե իբրև անակնկալ նվեր ունի տալու: Ապա, ըստ մեղադրական եզրակացության, տուժողին խնդրել է փակել աչքերը, իր մոտ եղած խոհանոցային դանակով կտրել է աղջկա կոկորդը, ինչի հետևանքվ վերջինս տեղում մահացել է:

Բացի այդ, հանցագործության հետքերը թաքցնելու նպատակով, հրկիզել է դեպքի վայր հանդիսացող բնակարանը` բնակարանի սեփականատիրոջը պատճառելով 680.437 ՀՀ դրամի գույքային վնաս:

Նշենք, որ մեղադրողը մեղադրական ճառում միջնորդել էր ամբաստանյալին դատապարտել 14 տարվա ազատազրկման, իսկ ամբաստանյալի պաշտպան Կրոմվել Գրիգորյանը միջնորդել էր իր պաշտպանյալին անմեղ ճանաչել ու արդարացնել՝ սպանությանը Դ.Թամրազյանի մասնակցությունն ապացուցված չլինելու հիմքով:

Ըստ պաշտպանի, գործում չկա ամբաստանյալի մասնակցությունը հիմնավորող գեթ մեկ թույլատրելի ու վերաբերելի ապացույց, սպանության որևէ շարժառիթ էլ չկա: Իսկ ամբաստանյալի նախաքննական ինքնախոստովանական ցուցմունքը, ըստ պաշտպանական կողմի, կորզվել է բռնություններով: Մասնավորապես, ամբաստանյալը հայտարարել է, որ ինքնախոստովանական ցուցմունքը տվել է իր մորն ու քրոջը պաշտպանելու համար:

«Փաստինֆո»-ի լրագրողի հետ զրույցում ամբաստանյալի պաշտպան Կրոմվել Գրիգորյանը նշեց, որ դատավճռի դեմ անպայման բողոք է ներկայացնելու Վերաքննիչ դատարան:

Աղբյուր` Փաստինֆո