Փաստ ինֆո

Սիրիական Պալմիրայի հուշարձաններին պատճառված վնասն այնքան զգալի չէ համեմատած ԻՊ գրոհայինների կողմից քաղաքի առաջին գրավումից հետո նրանց պատճառված վնասի հետ:

«ՌԻԱ Նովոստի»-ի հետ հարցազրույցում նման գնահատական է տվել Սիրիայի հնությունների ու թանգարանների դեպարտամենտի գլխավոր տնօրեն Մաամուն Աբդուլքարիմը:

Սիրիական բանակը՝ ռուսաստանյան Օդային տիեզերական ուժերի աջակցությամբ քաղաքն ազատագրել էր 2016թ. մարտի վերջին: Սակայն դեկտեմբերին ահաբեկիչները նորից զավթել էին Պալմիրան և ավերել նրա հուշարձանների մի մասը:

2017թ. փետրվարին Ռուսաստանի պաշտպանության նախարարությունը կադրեր էր հրապարակել, որոնցում երևում էր, որ գրոհայինները ավերել են հնադարյան քաղաքի գլխավոր տեսարժան վայրերը՝ հռոմեական ամֆիթատրոնի ճակատային մասը և տետրապիլոնը (չորս մոնումենտալ դարպաս): 

Սիրիական բանակը և աշխարհազորի մարտիկները՝ ՌԴ Օդային տիեզերական ուժերի աջակցությամբ, երկրորդ անգամ էին ազատագրել Պալմիրան գրոհայիններից:

Ըստ Աբդուլքարիմի, այն աշխատանքը, որ կատարել են փորձագետները մինչև ահաբեկիչների կողմից երկրորդ ներխուժումը, չի ոչնչացվել: «Այդ արդյունքները պատկերավոր ցույց են տալիս, որ Պալմիրայի ազատագրությանը մասնակցած ուժերն առավելագույնս զգուշություն են դրսևորել և առաջնորդվել համաշխարհային ժառանգության հուշարձանների պահպանության ունիվերսալ սկզբունքներով»,- նշել է Աբդուլքարիմը:

Նա հավելել է, որ մոտակա երկու օրվա ընթացքում մասնագետների թիմը կսկսի այցելությունները՝ պարզելու վնասվածքների լրիվ պատկերը: «Սակայն հիմա մենք հանգիստ ենք և չենք վախենում: Մեր ներկայիս զգացողությունները տարբերվում են նրանցից, ինչ որ եղել է դեռևս երեկ չէ առաջին օրը»,- նշել է գործակալության զրուցակիցը:

«Մենք արագ կգնահատենք կորուստները՝ իրավիճակը հասկանալու համար, իսկ հետո կկատարվի ամեն շենքին, ամեն նկարին, քարին ու պատկերին հասցված վնասի գնահատում»,- ասել է նա:

Ընդհանուր առմամբ, ամփոփել է Աբդուլքարիմը, փորձագետների թիմում կներգրավվեն միջազգային գործընկերների հետ մշտական շփման մեջ գտնվող 400 ինժեներ:

«Դրանք երկրներն են, որոնք նույնպես մասնակցում են վերականգնմանը՝ սկսած Ռուսաստանից և վերջացրած Արևմտյան Եվրոպայով ու Ճապոնիայով»,- եզրափակել է նա:

Աղբյուր` Փաստինֆո