Փաստ ինֆո

Շիրակի մարզի ընդհանուր իրավասության դատարանը` դատավոր Հ. Մովսեսյանի նախագահությամբ, 25-ամյա Արամ Պողոսյանին հանցավոր է ճանաչել ՀՀ քրեական օրենսգրքի 114-րդ հոդվածի 2-րդ մասով՝ հոգեկան խիստ հուզմունքի վիճակում առողջությանը ծանր վնաս պատճառելը, և նրան դատապարտել ազատազրկման 5 ամիս 26 օր ժամկետով:

Նշանակված պատժին հաշվակցվել է Արամ Պողոսյանին 16.01.2016թ մինչև 12.07.2016թ. արգելանքի տակ գտնվելու 5 ամիս 26 օրը, և նա ազատվել է նշանակված պատժից:

Արամ Պողոսյանի նկատմամբ ընտրված խափանման միջոց գրավը թողնվել է անփոփոխ մինչև դատավճռի օրինական ուժի մեջ մտնելը:

Դատավճիռն օրինական ուժի մեջ մտնելուց հետո 1.000.000 ՀՀ դրամ գրավի գումարը պետք է վերադարձվի այն մուծող անձին:

Ըստ մեղադրանքի, Արամ Պողոսյանը Գյումրի քաղաքի Տ.ճարտարապետ փողոցի 16 Ա շենքի դիմաց իրեն պատկանող Ֆորդ Մուսթանգ մակնիշի ավտոմեքենան կայանելու համար նույն շենքի բնակիչ Վ.Սերոբյանի կողմից դիտողության արժանանալուց հետո, 2016 թվականի հունվարի 16-ին՝ ժամը 9:00-ի սահմաններում, նշված շենքի բակում՝ իր հղի կնոջ ներկայությամբ, վիճաբանել է Վ. Սերոբյանի հետ:

Այդ ընթացքում վերջինիս կողմից գործադրված բռնության, այն է, դիտավորությամբ իրեն հարվածելու, գետին գցելու և կնոջ ներկայությամբ այդ կերպ նվաստացնելու հետևանքով հանկարծակի ծագած հոգեկան խիստ հուզմունքի վիճակում ընկած դիրքից իր վերոնշված ավտոմեքենայի վարորդի համար նախատեսված կիսաբաց դռան դարակից վերցրել է բացված վիճակում այնտեղ դրված ծալովի դանակը և, լարվածությունը լիցքաթափելու, կնոջն ու ապագա երեխային պաշտպանելու նպատակով, մի քանի անգամ դանակով, ինչպես նաև ձեռքերով, հարվածել է Վ. Սերոբյանի մարմնի տարբեր մասերին՝ պատճառելով կրծքավանդակի ձախ կեսի հետին մակերեսի՝ թիակի պրոեկցիայով, ծակած–կտրած թափանցող՝ ձախակողմյան պնևմոհեմոթորաքսով վերքի, կրծքավանդակի ձախ կեսի հետին մակերեսի կտրած վերքի, ձախ արմնկայի հոդի ներսային մակերեսի կտրած վերքի, ձախ գոտկային շրջանի ծակած-կտրած չթափանցող վերքի, ձախից զստոսկրի կատարի շրջանի և ձախ ազդրի դրսային մակերեսի ծակած-կտրած վերքերի, ձախից վերին շրթունքի շրջանի քերծվածքի ու սալջարդ վերքի ձևերով, առողջությանը ծանր վնաս:

Հիմնավորված համարելով, որ Արամ Պողոսյանը հոգեկան խիստ հուզմունքի վիճակում տուժող Վանիկ Սերոբյանի առողջությանը պատճառել է ծանր վնաս, նրան մեղադրանք է առաջադրվել ՀՀ քրեական օրենսգրքի 114-րդ հոդվածի 2-րդ մասով:

Ի դեպ, քրեական գործը հարուցվել է և Արամ Պողոսյանն էլ որպես մեղադրյալ է ներգրավվել ՀՀ քրեական օրենսգրքի 112-րդ հոդվածի 1-ին մասով՝ դիտավորությամբ առողջությանը ծանր վնաս պատճառելը, սակայն նախաքննության ավարտական փուլում որոշում է կայացվել ՀՀ քրեական օրենսգրքի 112-րդ հոդվածի 1-ին մասով առաջադրված մեղադրանքի ծավալը փոփոխելու մասին և նրան կրկին մեղադրանք է առաջադրվել ՀՀ քրեական օրենսգրքի 114-րդ հոդվածի 2-րդ մասով:

Ամբաստանյալը մինչև դատաքննությունը սկսվելը միջնորդել է գործը քննել արագացված դատաքննության կարգով՝ հայտարարելով, որ առաջադրված մեղադրանքում իրեն մեղավոր է ճանաչում (ամբաստանյալի պաշտպանությունն իրականացրել է փաստաբան Թամարա Յայլոյանը):

Մեղադրողը և տուժողը չեն առարկել դատաքննության արագացված կարգ կիրառելու դեմ, վերջինս հայտարարել է նաև, որ հաշտվել է ամբաստանյալի հետ, որևէ բողոք, պահանջ չունի:

Դատարանն էլ որոշում է կայացրել արագացված դատաքննություն անցկացնելու մասին:

Դատարանն ամբաստանյալ Արամ Պողոսյանին պատիժ նշանակելիս պատասխանատվությունը և պատիժը մեղմացնող հանգամանք է համարել մեղայականով ներկայանալը, առաջին անգամ հանգամանքների պատահական զուգորդմամբ միջին ծանրության հանցանք կատարելը և արարքը տուժողի հակաօրինական վարքագծի հետևանքով կատարելը, իսկ անձը բնութագրող հանգամանքներ է համարել նախկինում արատավորված չլինելը, կատարածի համար անկեղծորեն խոստովանելն ու զղջալը, բնակության և աշխատանքի վայրերում դրական բնութագրվելը:

Աղբյուր` Փաստինֆո