Փաստ ինֆո

ՀՀ Սյունիքի մարզի դատարանը՝ դատավոր Անդրանիկ Մնացականյանի նախագահությամբ, բուժվող հիվանդների Հեպատիտ Ց հիվանդությամբ հիվանդանալու աղմկահարույց գործով կայացրել է մեղադրական դատավճիռ:

Այսպես, դատավճռով «Քաջարանի բժշկական կենտրոն»-ի գլխավոր բուժքույր Արմեդա Վանեսյանը մեղավոր է ճանաչվել ՀՀ քրեական օրենսգրքի 277-րդ հոդվածի 2-րդ մասով (սանիտարահամաճարակային կանոնները խախտելը, որն անզգուշությամբ ծանր վնաս է պատճառել), և դատապարտվել 6 ամսվա պայմանական ազատազրկման՝ 1 տարվա փորձաշրջանով:

Բժշկական կենտրոնի ավագ բուժքույր Նորա Կարապետյանը մեղավոր է ճանաչվել ՀՀ քրեական օրենսգրքի 277-րդ հոդվածի 2-րդ մասով և դատապարտվել 1 տարվա պայմանական ազատազրկման՝ 1 տարվա փորձաշրջանով:

«Հեպատիտ C»-ի գործի նախաքննությունն ավարտվել է

Բժշկական կենտրոնի տնօրենի տեղակալ Վիրաբ Մանասյանը մեղավոր է ճանաչվել ՀՀ քրեական օրենսգրքի 277-րդ հոդվածի 2-րդ մասով և դատապարտվել 6 ամսվա ազատազրկման, պատժի ժամկետին հաշվակցվել է արգելանքի տակ գտնվելու ժամկետը` 3 օրը:

Միաժամանակ, ըստ դատավճռի, նրա նկատմամբ նշանակված պատիժը պայմանականորեն չի կիրառվի՝ 1 տարվա փորձաշրջանի սահմանմամբ:
Բժշկական կենտրոնի նախկին տնօրեն Վարդան Ավագյանը մեղավոր է ճանաչվել ՀՀ քրեական օրենսգրքի 277-րդ հոդվածի 2-րդ մասով և դատապարտվել 1 տարվա պայմանական ազատազրկման՝ 1 տարվա փորձաշրջանով:

Բժիշկ-անեսթեզիոլոգ Երվանդ Ավագյանը մեղավոր է ճանաչվել ՀՀ քրեական օրենսգրքի 277-րդ հոդվածի 2-րդ մասով և դատապարտվել ազատազրկման 1 տարի 6 ամիս ժամկետով:

Ե.Ավագյանի նկատմամբ նշանակված պատժի ժամկետին հաշվակցվել է սույն քրեական գործով 2015 թվականի սեպտեմբերի 1-ից մինչև 2015 թվականի սեպտեմբերի 4-ն արգելանքի տակ գտնվելու ժամկետը` 3 օրը, և վերջնական պատիժ է թողնվել կրելու ազատազրկում 1 տարի 5 ամիս 27 օր ժամկետով:

Պատժի կրման սկիզբը պետք է հաշվվի արգելանքի վերցնելու պահից:

Բոլոր ամբաստանյալների նկատմամբ ընտրված խափանման միջոցը` չհեռանալու մասին ստորագրությունը, թողնվել է անփոփոխ` մինչև դատավճռի օրինական ուժի մեջ մտնելը:

Ամբաստանյալներից համապարտության կարգով հօգուտ Հայաստանի Հանրապետության` որպես դատական ծախս, պետք է բռնագանձվի 550.000 ՀՀ դրամ:

2015 թվականի հունվարին տեղեկություն էր ստացվել, որ «Քաջարանի բժշկական կենտրոն» բուժօգնության դիմած մի քանի քաղաքացիների մոտ նշված կենտրոնում բժշկական միջամտության, վիրահատության ենթարկվելուց հետո ախտորոշվել է «հեպատիտ c» հիվանդություն:

Դեպքի առթիվ հարուցվել էր քրեական գործ, որի շրջանակներում իրականացվել էին տարբեր քննչական գործողություններ, նշանակվել շուրջ 5 տասնյակ փորձաքննություններ՝ քրեական գործի համար էական նշանակություն ունեցող հանգամանքների պարզաբանման համար:

Համապատասխան հետազոտություններ էր անցել 2014 թվականի ընթացքում Քաջարանի բժշկական կենտրոնում վիրահատված շուրջ 200 քաղաքացի։ Կատարված քննությամբ հիմնավորվել էր, որ 14 քաղաքացի «հեպատիտ C»-ով վարակվել է նշված բժշկական կենտրոնում համապատասխան բժշկական օգնություն ստանալուց հետո, և որոշում էր կայացվել` նրանց տուժող ճանաչելու մասին։

Նախաքննությամբ պարզվել էր, որ Քաջարանի բժշկական կենտրոնում 2014 թվականի ընթացքում ընդհանուր անզգայացմամբ իրականացված վիրահատությունների ժամանակ միանգամյա օգտագործման համար նախատեսված ներշնչափողային խողովակները, արտածծիչ սարքի խողովակը և ծայրադիրներն օգտագործվել են բազմակի, նշված բժշկական գործիքները և ընդհանուր անզգայացման ժամանակ օգտագործված «լարինգոսկոպն» ախտահանվել են ՀՀ առողջապահության նախարարի մի շարք հրամանների պահանջների խախտումներով:

Արձանագրվել էին նաև սանիտարահամաճարակային ոլորտի այլ խախտումներ, որի արդյունքում 2014 թվականի ընթացքում բժշկական կենտրոնում վիրահատված 14 քաղաքացի հիվանդացել է «հեպատիտ C» հիվանդությամբ:

Աղբյուր` Փաստինֆո