Փաստ ինֆո

Նախօրեին Սյունիքի մարզի Գորիս քաղաքում աղմկահարույց դեպք է տեղի ունեցել: Ըստ շրջանառվող լուրերի մարզի նախկին մարզպետ Սուրիկ Խաչատրյանի եղբորորդին՝ Էդգար Խաչատրյանը, Գորիսի բաժնում ոստիկանության աշխատակիցների կողմից ծեծի է ենթարկվել, ինչից հետո նրան տեղափոխել են հիվանդանոց:

«Փաստինֆո»-ի տեղեկություններով՝ իրականում բռնության ենթարկվածը ոչ թե Էդգար Խաչատրյանն է, այլ՝ Էդմոն Սեյրանի Ասրյանը։ Թե ինչ կապ ունի նա Սուրիկ Խաչատրյանի եղբոր՝ Սեյրանի հետ, ձեռնպահ ենք մնում անդրադառնալ՝ հարգելով անձի մասնավոր կյանքի գաղտնիությունը։

Իրավապահներին է ահազանգել Էդմոնի մայրը, ով հայտնել է, որ ոստիկանությքան Գորիսի բաժնի պետն իր որդուն՝ Էդմոն Ասրյանին, ծեծի է ենթարկել և քաղաքը լքելու համար 2 օր ժամանակ է տվել՝ հակառակ դեպքում սպառնալով «խփել նրան կամ գործ սարքել» գլխին:

Դեպքից հետո երիտասարդը «գլխուղեղի ցնցում հարցականով» ախտորոշմամբ հիվանդանոց է տեղափոխվել:

Ըստ մեզ հայտնի դարձած տեղեկությունների՝ վեճն իրականում ունի կենցաղային պատճառ. երիտասարդը պարբերաբար զանգահարել է ոստիկանությունում աշխատող մի կնոջ, հաղորդագրություններ ուղարկել նրան, ինչի համար էլ նրան նախազգուշացվել է կամ, ինչպես տուժող կողմն է նշում, ծեծի ենթարկվել ոստիկանության աշխատակիցների կողմից։

ՀՀ ՔԿ-ին տեղեկացրեցին, որ բռնության վերաբերյալ հաղորդում փետրվարի 27-ի ուշ երեկոյան ստացել են Սյունիքի մարզի դատախազությունից, և նախապատրաստված նյութերն այսօր ուղարկվել են դատախազություն՝ ըստ քննչական ենթակայության ուղարկելու համար։ Բացառված չէ, որ նյութերն ուղարկվեն ՀՔԾ։

Նյութերն ուղարկվել են Սյունիքի մարզի դատախազություն`ըստ ենթակայության հարցը քննարկելու համար:

Նշենք, որ ավելի ուշ լրատվամիջոցներում տեղեկություններ հայտնվեցին, որ ծեծի ենթարկված երիտասարդը Սյունիքի նախկին մարզպետ Սուրիկ Խաչատրյանի եղբորորդին չէ:

«Tert.am»-ի հետ զրույցում Սուրիկ Խաչատրյանի եղբայր Սեյրան Խաչատրյանը հերքում է այդ տեղեկությունը՝ ասելով, որ ծեծի ենթարկված Էդմոն Խաչատրյանն իր որդին չէ:

«Դա մեր որդին չէ, շանտաժի են ենթարկում, դա սրիկայի մեկն ա, խաբեբա ա, էդ էրեխան, ում բռնել են: Նա Ասրյան ա, նա Խաչատրյան չի, նա սուտ է ասում: Դա աֆերիստների միտքն ա, որ Դուք էսօր մեզնով ընկնեք, բայց մենք հավես չունենք, նա մեզ պետք չի: Ներողություն, բարի գիշեր»,- ասել էր Խաչատրյանն ու ցած դրել լսափողը:

«Փաստինֆո»-ի տեղեկություններով Է.Ասրյանի անունը ևս շրջանառվել է մի շարք աղմկոտ հանցագործությունների մեջ։

Աղբյուր` Փաստինֆո