Փաստ ինֆո

Սյունիքում նախօրեին տեղի ունեցած աղմկահարույց դեպքով «տուժող» ճանաչված անձը պարզվում է ներկայումս մեկ այլ քրեական գործով ամբաստանյալի կարգավիճակ ունի:

Էդմոն Ասրյանն ամբաստանվում է քաղաքացիների վստահությունը չարաշահելու եղանակով մի շարք անգամներ խարդախություն կատարելու մեղադրանքում:

Մասնավորապես, քրեական գործով անցնում են 13 տուժող և մեկ տուժողի իրավահաջորդ:

Բազմադրվագ այս քերական գործով, հայտնի է դարձել, որ Ասրյանը զանգահարել է մարզի տարբեր համայնքների ղեկավարներին ներկայացել է որպես Սյունիքի մարզի մարզպետի որդի և տարբեր պատճառներով խնդրել է իրեն վճարման տերմինալով փոխանցել 50 000 ՀՀ դրամից մինչև 100 000 ՀՀ դրամ գումար:

Ասրյանի նկատմամբ որպես խափանման միջոց է ընտրվել գրավը՝ և որպես գրավի չափ է սահմանվել 300 000 ՀՀ դրամի չափով:

Սակայն քրեական գործով դատաքննության ընթացքում տուժողներից 9-ը դիմումներ են ներկայացրել դատարան առ այն, որ հաշտվել են Ասրյանի հետ և բողոք չունեն՝ միևնույն ժամանակ խնդրելով իրենց վերաբերյալ մասերով քրեական գործի վարույթը կարճել:

Դատարանը հաշվի առնելով վերոգրյալը և նկատի ունենալով, որ գործով 9 տուժողները ամբաստանյալի հետ հաշտվել են՝ քրեական գործի վարույթը իրենց մասերով կարճել է դադարեցնելով նաև Ասրյանի նկատմամբ քրեական հետապնդումը:

Ավելի վաղ տեղեկացրել էինք, որ երեկ իրավապահներին է ահազանգել Էդմոնի մայրը, ով հայտնել է, որ ոստիկանության Գորիսի բաժնի պետն իր որդուն՝ Էդմոն Ասրյանին, ծեծի է ենթարկել և քաղաքը լքելու համար 2 օր ժամանակ է տվել՝ հակառակ դեպքում սպառնալով «խփել նրան կամ գործ սարքել» գլխին:

Դեպքից հետո երիտասարդը «գլխուղեղի ցնցում հարցականով» ախտորոշմամբ հիվանդանոց է տեղափոխվել:

Ըստ մեզ հայտնի դարձած տեղեկությունների՝ վեճն իրականում ունի կենցաղային պատճառ. երիտասարդը պարբերաբար զանգահարել է ոստիկանությունում աշխատող մի կնոջ, հաղորդագրություններ ուղարկել նրան, ինչի համար էլ նրան նախազգուշացվել է կամ, ինչպես տուժող կողմն է նշում, ծեծի ենթարկվել ոստիկանության աշխատակիցների կողմից։

ՀՀ ՔԿ-ին տեղեկացրեցին, որ բռնության վերաբերյալ հաղորդում փետրվարի 27-ի ուշ երեկոյան ստացել են Սյունիքի մարզի դատախազությունից, և նախապատրաստված նյութերն այսօր ուղարկվել են դատախազություն՝ ըստ քննչական ենթակայության ուղարկելու համար։ Բացառված չէ, որ նյութերն ուղարկվեն ՀՔԾ։

Նյութերն ուղարկվել են Սյունիքի մարզի դատախազություն`ըստ ենթակայության հարցը քննարկելու համար:

Աղբյուր` Փաստինֆո