Փաստ ինֆո

Անցյալ տարվա հունիսի 1-ին, ցերեկը,  Երևանի Նար-Դոս և Վարդանանց փողոցների խաչմերուկում տաքսիստի սպանության գործով այսօր հարցաքննվեց վկան, ով տուժողին հասցրել էր հիվանդանոց:

Վկան հայտնեց, որ  ինքն իր մեքենայով կանգնած էր  կարմիր լույսի տակ, երբ ՆԻՎԱ մակնիշի ավտոմեքենան եկավ կտրեց իր դիմացը կանգնած մեքենայի դիմացը ու կանգնեց: ՆԻՎԱ-ից դուրս եկավ երկու կամ երեք մարդ՝ նրանցից մեկը՝  մի չսափրված երիտասարդ (ՆԻՎԱ-ի վարորդը), դուբինկայով ու փայտով խփում էր ղեկին նստած տուժողին: Ապա երիտասարդը հանգիստ քայլերով հեռացավ:

 Այդ պահին իր մտքով չէր անցնում, որ տուժողը նաև դանակահարվել է, սակայն հետագայում վնասվածքներից հասկացել է, որ տուժողին դանակահարել են: Բացի այդ տուժողն էլ ասել էր իրեն, որ դանակով իր սրտին են խփել, ապա բացականչել՝  «հաստատ մեռա, վաախ, երեխես»:

 Տուժողը դուռը բացեց ու ընկավ գետին, ինքն էլ տուժողին հորդորելով, որ ուժ գտնի իր մեջ օգնի իրեն, որ կարողանա նրան հիվանդանոց տեղափոխել:  Վկան տուժողին տեղափոխել էր իր մեքենան, տուժողն ընթացքի ժամանակ անընդհատ փորձում էր դուռը բացել ու դուրս նետվել՝ երևի մտածելով, որ այնտեղ է իր փրկությունը: 

Հիվանդանոց տեղափոխելուց հետո մեկ ժամ անց վկային  հայտնել են, որ տուժողը մահացել է: 

Վկայի դատաքննական և նախաքննական ցուցմունքների միջև կային էական հակասություններ:

 Նախաքննության ցուցմունքում վկան հայտնել էր, որ ՆԻՎԱ-ից երկու մարդ դուրս եկավ, նրանք հարձակվեցին ու սկսեցին մահակներով հարվածներ հասցնել տուժողին:  Նախաքննական ցուցմունքում վկան հայտնել էր նաև, որ փախուստի դիմելու ժամանակ նրանցից մեկի ձեռքում նկատել է արյունոտ դանակ:   

Դատական նիստի մասին ծանուցվել էր ևս երկու վկա, որոնցից մեկը տուժողի կինն ու ամբաստանյալի սիրուհին է, սակայն ծանուցագրերը հասնելու մասին դատարանը հավաստագիր չուներ:

Ամբաստանյալի պաշտպան Հովիկ Արսենյանը հայտարարեց, որ կինը, ինչպես և նախաքննության  ժամանակ, կանխամտածված քայլեր է անում, ուստի առաջարկեց նրան բերման ենթարկել: Դատարանը որոշեց վկաներին ևս մեկ անգամ ծանուցել:

Դատարանում հետազոտվեցին երեք հատոր կազմող գործի  գրավոր նյութերն ու իրեղեն ապացույցները:

Գործի նյութերի համաձայն, ամբաստանյալը հունիսի 1-ին ժամը 15.30-ին ինքնակամ ներկայացել է իրավապահ մարմիններին, հայտարարել, որ դանակով հարվածել է տուժողին և ներկայացրել դանակը:

Ըստ դիակի դատաբժշկական փորձաքննության եզրակացության, տուժողի մահը վրա է հասել արյան սուր կորստից՝ կտրող-ծակող գործիքով կրծքավանդակի ձախ կեսի առաջնային մակերեսին, սրտին, սրտապարկին վնասվածքներ ստանալու հետևանքով:

Աղբյուր` Փաստինֆո