Փաստ ինֆո

2015թ. հունվարի 29-ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով այսօր հարցաքննվեց 2 վկա:

Ռազմական ինստիտուտի կուրսանտ Հարություն Բալդրյանը դատարանում հայտնեց, որ 2015թ. հունվարի 28-ին ուշ երեկոյան 7 հոգով՝ Վարազդատը Սաֆարյանը, Վաչե Սահակյանը, Մովսես Ազարյանը, էդուարդ Մանուկյանը, Դավիթ Պողոսյանը, Արթուր Վահանյանը և ինքը մարտկոցում հաց են կերել և օղի խմել:

Մասնավորապես՝ խմել են 1 շիշ օղի, շնորհավորել  Վաչե Սահակյանին ծննդյան տարեդարձի կապակցությամբ՝ չնայած որ օրեր առաջ է եղել նրա ծնունդը, ապա ինքը գնացել է քնելու:

Վկայի նախաքննական ցուցմունքների հետ առկա էական հակասությամբ պայմանավորված մեղադրող դատախազի միջնորդությամբ հրապարակվեցին դրանք։ Պարզվեց, որ նախաքննության ընթացքում վկան ասել էր, որինքը և ևս 6 անձինք հավաքվել էին Վաչե Սահակյանի ծնունդը նշելու նպատակով, խմել են 1 շիշ օղի, որի գումարը վկան էր տվել: Իսկ դատաքննության ընթացքում տված ցուցմունքում հայտնել էր, որ սնունդը և օղին բերել էր Վահանյան Արթուրը, իսկ մարտկոցում հավաքվել են ժամը 00.40-ի սահմաններում:

Դեպքի մասին տեղեկացել է հաջորդ օրն առավոտյան։ Հայկազի անկողինը հայտնաբերելով արյան մեջ՝ իրենց հրահանգվել էր փնտրել նրան, ֆիզհրապարակի կողմից ճչոց են լսել և վազելով  Հայկազ Բարսեղյանին հայտնաբերել են կախված վիճակում:

«Իրանք են սպանել (նկատի ունի ամբաստանյալները), թե ոչ տեղյակ չեմ, բայց, երբ ռազմական ոստիկանությունում ցուցմունք է տվել հայտնել է այն, ինչ իրեն հայտնի է եղել»,- ասաց վկան:

Հաջորդիվ հարցաքննվեց վկա Ասատուր Շահնազարյանը։ Վերջինս հայտնեց, որ դեպքից բավական ժամանակ է անցել և ինքը մանրամասները չի հիշում, սակայն հարցերի միջոցով վերհիշեց և դատարանում հայտնեց, որ այդ օրն ինքը վերակարգում է եղել հերթապահության և իր ծառայությունը կատարել է թերությամբ՝ քնել է ծառայության ժամանակ:

Վկայի խոսքով՝ ժամը 06:10 –ի սահմաններում հերթապահությունն ընդունել է, սակայն վերակարգում գտնվելու ժամանակ քնել է և իր վաշտում շարժ է տեղի ունեցել, տղաները առաջին հրետանային մարտկոց են բարձրացել` խմիչք օգտագործելու:

Դեպքի վերաբերյալ վկան հայտարարեց որ վատ մտքերը աշխատում է վանել իրենից քանի որ չի կարողանում կենտրոնանալ:

Վկայի խոսքով ամբաստանյալներից միայն Վարազդատ Սաֆարյանին է ճանաչում, մյուսների և սպանված Հայկազ բարսեղյանի հետ շփում չի եղել:

Վկան հայտնեց նաև, որ դեպքի մասին տեղեկացել է հունվարի 29-ի առավոտյան և երբ հրահանգ է եղել գնալ և Հայկազին փնտրել, ֆիզհրապարակից գորգոռցի ձայներ է լսել, սակայն ինքը չի գնացել և այդ վիճակում Հայկազին չի տեսել՝ համարձակությունը չի հերքել:

Ասատուր Շահնազարյանի նախաքննական ցուցմունքում ևս հրապարկվեց՝ առկա էական հակասությամբ պայմանավորված:

Ըստ նախաքննական ցուցմունքի՝ վկայի հերթապահության ժամանակ մարտկոցում մի խումբ կուրսանտներ ոգելից խմիչք են օգտագործել, որից հետո սուրճ են պատրաստել, ինչի կապակցությամբ ինքը դիտողություն է արել նրանց: Այդ ամենից հետո ինքը քնել է:

Արթնացել է Արթուր Սիմոնյանի ձայնից, քանի որ զորամասի հերթապահն է եկել: Վկան իր նախաքննական ցուցմունքում հայտնել էր, որ գիշերը Արթուր Սիմոնյանը լոգարան է մտել և մի քանի հոգու տեսել է, սակայն, ասում է, որ ոչ մեկի դեմքը չի հիշում, հնարավոր է, որ հիշում է , բայց խուսափում է ասել: Դեպքից հետո բոլորս մեղքի զգացողության ունեինք, որ Հայկազի հետ նման բան է պատահել,- նախաքննության ընթացքում հայտնել էր վկան:

Իսկ առավոտյան իրենց հարցրել են, թե կուրսանտ Հայկազ Բարսեղյանին տեսնող եղել է, իր կողքին կանգնած կուրստանտերից մեկն էլ պատասխանել է, որ այո, Վաչե Սահակյանն էլ մոտեցել է իրենց և հարցրել, թե ի՞նչ են տեսել:

Վկան նախաքննական ցուցմունքում նաև հայտնել էր, որ երբ առավոտյան տեղեկացել են, որ Հայկազ Բարսեղյանին սպանել են, Վարազդատ Սաֆարյանը սկսել է դողդողալ և բոլորից ծխախոտ է ուզել, իրեն փորձել է համոզել, որ ինքը մարտկոցից շուտ է գնացել:

Աղբյուր` Փաստինֆո