Փաստ ինֆո

ԱՄՆ-ն Լեռնային Ղարաբաղի հակամարտության կարգավորման համար պետք է փոխգործակցի Ռուսաստանի հետ: Ինչպես հաղորդում է «Արմենպրես»-ը, ՏԱՍՍ-ի հետ զրույցում այդ մասին նշել է Միջազգային հարցերով նյու-յորքյան խորհրդի փորձագետ, պրոֆեսոր Քերի Կավանոն, ով նախկինում զբաղեցրել է Եվրասիայում հակամարտությունների կարգավորման գործերով ԱՄՆ հատուկ ներկայացուցչի պաշտոնը:

Խորհրդին կից հակամարտությունների կանխման կենտրոնի հրապարակած հուշագրում նա զգուշացրել է, որ Հարավային Կովկասում նոր բռնության բռնկումը կարող է վտանգի տակ դնել Վաշինգտոնի հարաբերությունները Մոսկվայի, Անկարայի և Թեհրանի հետ:

«ԱՄՆ նախագահ Դոնալդ Թրամփն արդեն հայտարարել է Ռուսաստանի հետ փոխգործակցելու մասին: Լեռնային Ղարաբաղի հակամարտության կարգավորմանն ուղղված համատեղ գործողությունները կարող են լինել մեկնարկային կետ ՝ այլ ոլորտներում երկու երկրների հետագա ջանքերի համար»,- ընդգծել է Կավանոն:

Հուշագրով ԱՄՆ վարչակազմին առաջարկվում է ակտիվ համագործակցել Ռուսաստանի հետ ԵԱՀԿ Մինսկի խմբի շրջանակում:

«Դա ամերիկա-ռուսական գործընկերության ամենանախընտրելի հարթակն է, որտեղ երկու կողմերը փոխգործակցում են հասնելու ընդհանուր, կասկածի տակ չդրվող նպատակների. նվազեցնել ռազմական հակամարտության վերսկսման հնարավորությունները և հասնել խաղաղ կարգավորման»,- գտնում է Կավանոն, ով 1999-2001 թվականներին զբաղեցրել է նաև ԵԱՀԿ Մինսկի խմբի համանախագահի պաշտոնը:

«Կարելի էր կարծել, որ մինսկյան գործընթացն արդյունքներ չի տվել: Սակայն, այն փաստը, որ վերջին ժամանակներս չի եղել լայնամասշտաբ հակամարտություն, ինքն իրենով խոսում է»,- նկատել է Կավանոն:

Փորձագետը վստահ է՝ վստահության և տարածաշրջանում անվտանգության ամրապնդման գործում ավելի վաղ համաձայնեցված քայլերի գործնականում կյանքի կոչման անհրաժեշտության հարցում, այդ թվում՝ ԵԱՀԿ դիտորդների թվի ավելացման և շփման գծում միջադեպերի հետաքննության անկախ մեխանիզմի ստեղծման, ինչը թույլ կտա կրճատել հրադադարի ռեժիմիմիխախտման դեպքերը:

«Այդ հակամարտության կարգավորումը բխում է բոլորի շահերից»,- ավելացրել է Կավանոն:

Լուսանկարը՝ Armenpress-ի

Աղբյուր` Փաստինֆո