Փաստ ինֆո

Կենտրոնական ընտրական հանձնաժողովն արտահերթ նիստում մերժեց «Օհանյան-Րաֆֆի-Օսկանյան» դաշինքում ներգրավված «Ժառանգություն» կուսակցության ցուցակով պատգամավորի ութեկնած առաջադրվածների գրանցումը մերժելու մասին դիմումը:

Ինչպես հաղորդում է «Արմենպրես»-ը, ՀՀ ԿԸՀ նախագահ Տիգրան Մուկուչյանը նիստի մեկնարկին հայտնեց, որ նման դիմում ներկայացրել են «Ժառանգություն» կուսակցության Կապանի տարածքային կառույցի ներկայացուցիչներ Աննա Հակոբյանը, Կարեն Ստեփանյանը և Հասմիկ Քոլանջյանը:

«Ներկայացված դիմումով Կենտրոնական ընտրական հանձնաժողովին առաջարկվում է մերժել «Ժառանգություն» կուսակցության ցուցակով պատգամավորի թեկնածու առաջադրված անձանց
գրանցումը այն հիմքով, որ կուսակցության վարչությունը լեգիտիմ չի և չէր կարող Ազգային ժողովի ապրիլի 2-ի ընտրություններին մասնակցելու որոշում կայացնել: Նշվում է, որ կուսակցության կանոնադրության համաձայն` այն պետք է երկու տարին մեկ անգամ համագումար հրավիրի, որի ժամանակ ընտրվում է կուսակցության վարչությունը և խորհուրդը, իսկ կուսակցության վերջին համագումարը տեղի է ունեցել 2014թ. հունիսին: Հետևաբար, նշվում է, որ կուսակցության վարչությունը դադարեցրել է լիազորությունները և որևէ որոշում ընդունելու իրավունք չունի»,- «Արմենպրես»-ի հաղորդմամբ` քննարկման մասնակիցներին դիմումը ներկայացրեց Տիգրան Մուկուչյանը:

Այնուհետև դիմումատու Աննա Հակոբյանին պարզաբանման հնարավորություն ընձեռվեց: Նա նշեց, որ կուսակցության Կապանի տարածքային կառույցի անդամները և Կապանում կուսակցության համակիրները դեմ են եղել, որպեսզի կուսակցությունն ընտրություններին մասնակցի դաշինքով, ուստի որոշել են նման դիմում ներկայացնել Կենտրոնական ընտրական հանձնաժողով և օրենքի շրջանակներում լուծում տալ խնդրին:

ՀՀ ԿԸՀ նախագահ Տիգրան Մուկուչյանը դիմումատուին խնդրեց հստակեցնել, եթե կուսակցությունը որոշում կայացներ ընտրություններին առանձին մասնակցել, իրենք կրկին կհայտարարեին, որ կուսակցության վարչությունը լեգիտիմ չէ, ինչին Աննա Հակոբյանը բացասական պատասխան տվեց: Իսկ ԿԸՀ նախագահի մյուս հարցին, թե այդ ինչպե՞ս է ստացվում, որ ընտրություններին դաշինքով մասնակցելու որոշում կայացրած քաղաքական ուժի վարչությունը ոչ լեգիտիմ, իսկ առանձին մասնակցելու որոշման դեպքում այն կդառնար լեգիտիմ, Աննա Հակոբյանը չկարողացավ հստակ պատասխան տալ:

Տիգրան Մուկուչյանը դիմումատուին նաև հայտնեց, որ եթե ԿԸՀ-ն մերժի «Ժառանգություն» կուսակցության ցուցակով առաջադրված պատգամավորության թեկնածուների գրանցումը, այդ դեպքում ընդհանրապես վտանգի տակ է դրվելու «Օհանյան-Րաֆֆի-Օսկանյան» դաշինքի գրանցումը, քանի որ Ընտրական օրենսգրքով կուսակցությունների դաշինքի գրանցումը կարող է ﬔրժվել է, եթե դաշինքի անդամ կուսակցությունների թիվը նվազում է երկուսով: Աննա Հակոբյանը նշեց, որ իրենք դիմումը ԿԸՀ ներկայացնելուց առաջ հասկացել են, որ «Ժառանգություն»-ը կարող է որոշակի խնդիրների առջև կանգնել, սակայն չեն իմացել, որ վտանգում են դաշինքը:

Նիստի ընթացքում պարզաբանում ներկայացնելու հնարավորություն ստացավ նաև «Ժառանգություն» կուսակցության փոխնախագահ Արմեն Մարտիրոսյանը: Նա վստահեցրեց, որ ընտրություններին դաշինքով մասնակցելու որոշումը որևէ կապ չունի կուսակցության համագումարի հետ, քանի որ նման որոշում ընդունել է կուսակցության խորհուրդը:

«Ես որևէ պատճառ չեմ տեսնում, որ մեր որոշումը չեղյալ համարվի, իսկ Կենտրոնական ընտրական հանձնաժողովը մերժի մեր ցուցակի գրանցումը: Սա եղել է կուսակցության խորհրդի որոշումը: Խորհուրդը մի քանի անգամ նիստ է գումարել, քննարկումների ընթացքում մենք հակված ենք եղել ընտրություններին դաշինքով մասնակցելու տարբերակին, հստակեցրել ենք գործընկերների հնարավոր շրջանակը, իսկ արդեն վերջին նիստի ընթացքում որոշում կայացրեցինք դաշինքով մասնակցել և հստակեցրեցինք մեր ցուցակը»,- եզրափակեց Մարտիրոսյանը:

Նիստին ներկա էր նաև «Օհանյան-Րաֆֆի-Օսկանյան» դաշինքի լիազոր ներկայացուցիչ շ, Ազգային ժողովի պատգամավոր Էլինար Վարդանյանը, ով հրաժարվեց ելույթ ունենալու իրավունքից: ԿԸՀ նախագահ Տիգրան Մուկուչյանն ընթերցեց դիմումի հետ կապված ԿԸՀ որոշման նախագիծը, որի համաձայն Աննա Հակոբյանի, Կարեն Ստեփանյանի և Հասմիկ Քոլանջյանի դիմումը մերժվում է, քանի որ չկան «Ժառանգություն» կուսակցության ցուցակով պատգամավորի թեկնածու առաջադրված անձանց չգրանցելու հիմքեր:

Աղբյուր` Փաստինֆո