Փաստ ինֆո

Փորձաքննություն իրականացնող կազմակերպությունների աշխատանքի տեմպը լուրջ դժգոհություն է առաջացնում: Խնդրի վերաբերյալ բարձրաձայնել է փաստաբան Նորայր Նորիկյանը՝ գրառում թողնելով իր ֆեյսբուքյան էջում:

Ստորև ներկայացնում ենք գրառումն ամբողջությամբ.

Երբ քրեական գործով նշանակություն ունեցող հանգամանքները պարզելու համար անհրաժեշտ են գիտության, տեխնիկայի, արվեստի կամ արհեստի, այդ թվում` համապատասխան հետազոտությունների մեթոդիկայի, բնագավառներում հատուկ գիտելիքներ, վարույթն իրականացնող մարմնի կողմից նշանակվում է փորձաքննություն։

Փորձաքննություն իրականացնող մարմինների կողմից տրված եզրակացությունները դասվում են ապացույցների շարքին, և ըստ էության, դրանք էական նշանակություն ունեն դատական ակտերի վերջնական ելքի վրա։

Ցավոք սրտի, փորձաքննություն իրականացնող կազմակերպությունների աշխատանքի տեմպերը առաջացնում է լուրջ դժգոհություններ դատավարության մասնակիցների մոտ, ստեղծում կասկածանքի ու անվստահության մթնոլորտ, ինչը, վերջին հաշվով, ազդում է նաև քննության ընդհանուր որակի վրա։

Եղել են փորձաքննություններ, որոնք տևել են ընդհուպ մինչև մեկ տարի։

Կոնկրետ իմ մասնակցությամբ այս պահին քննվող երկու քրեական գործերով /ընդորում՝ երկու գործերում էլ առկա է մահվան ելք/ նշանակված փորձաքննություններից մեկը տևել է 7 ամիս, մյուսը՝ յոթ ամսից ավելի է, ինչ նշանակվել է, սակայն եզրակացությունը դեռևս չի ստացվել։

Հատկանշական է, որ անգամ էական էլ չէ, թե կոնկրետ ինչ փորձաքննության մասին է խոսքը։

Փորձաքննություն իրականացնող կազմակերպությունների իրավասու անձինք նշված խնդիրը պատճառաբանում են գերծանրաբեռնվածությամբ։

Պետք է հնարավորինս արագ լուծել հարցը՝ ստեղծելով այնպիսի պայմաններ, երբ մի դեպքում փորձաքննությունները կտրվեն հնարավորինս շուտ, մյուս դեպքում՝ կթեթևացվի փորձաքննական մարմինների աշխատանքի ծանրաբեռնվածությունը՝ վերջ տալով հիշատակված դժգոհություններին։

Հիշեցնենք, որ օրերս այս խնդրին անդրադարձել էր նաև ՀՀ Քննչական կոմիտեի նախագահ Աղվան Հովսեփյանը:

ՔԿ նախագահը նշել էր, որ քննության համար առաջնային խնդիրներից է շարունակում մնալ քրեական գործով էական նշանակություն ունեցող հանգամանքները պարզելու նպատակով նշանակվող փորձաքննությունների կատարման ժամկետները, առանձին դեպքերում նաև՝ որակը։

2016 թվականին Երևանի Մխիթար Հերացու անվան պետական բժշկական համալսարանի բժշկական հոգեբանության ամբիոնի հետ աշխատանքային քննարկումների արդյունքում մշակվել են համագործակցության նոր մեխանիզմներ, որը հնարավորություն է տալիս ավելի սեղմ ժամկետներում և առավել մատչելի գներով կազմակերպել դատահոգեբանական փորձաքննությունների կատարումը։ Բժշկական համալսարանի մասնագետները պատրաստակամություն են հայտնել կատարել քրեական գործերով դատահոգեբանական փորձաքննությունների կատարումը: Նշված ամբիոնի մասնագետների կողմից արդեն իսկ իրականացվել է մի քանի դատահոգեբանական փորձաքննություն, որոնց համար պահանջվել է 45 օր, և միայն մեկ դեպքում է տևել 4 ամիս՝ կապված քրեական գործի բազմածավալ լինելու հետ։

Այդպիսով փաստվել է, որ ԵՊԲՀ-ի հոգեբանության ֆակուլտետի մասնագետների կողմից իրականացված դատահոգեբանական փորձաքննությունների կատարման ժամկետները գոհացուցիչ են: Ներկայումս աշխատանքային քննարկումներ են իրականացվում մանկավարժական պետական համալսարանի համապատասխան մասնագետների հետ՝ նրանց ևս փորձաքննությունների կատարմանը ներգրավելու համար։

Աղբյուր` Փաստինֆո