Փաստ ինֆո

Հայաստանի հանրապետության քաղաքացու բնակարանը կարող է խուզարկվել բացառապես ՀՀ դատարանի որոշմամբ՝ սա Սահմանադրական պահանջ է՝ ուղղված ապահովելու ՀՀ քաղաքացու բնակարանի անձեռնմխելիությունը։ Կան պետություններ, որտեղ այլ կարգավորումներ են գործում:

«Փաստինֆո»-ի տեղեկություններով՝ վերջերս Հայաստանը ստացել է Բելառուսի Հանրապետության գլխավոր դատախազության միջազգային քննչական հարցումը՝ Բելառուսում քննվող քրեական գործով ՀՀ քաղաքացու բնակարանում և օժանդակ շինություններում խուզարկություն կատարելու՝ հանցագործության գործիքներ, առարկաներ, փաստաթղթեր հայտնաբերելու նպատակով։

ՀՀ քննչական կոմիտեն մերժել է միջազգային հարցումը կատարելու պահանջը՝ գտնելով, որ դրա կատարումը հակասում է ոչ միայն ՀՀ քրեական դատավարության օրենսգրքի պահանջներին, այլև՝ ՀՀ Սահմանադրությանը և մարդու հիմնարար իրավունքներին։

Խնդիրն այն է, որ հարցմանը կից ուղարկվել էր Բելառուսի դատախազի սանկցիան, ինչը հակասում է ՀՀ Սահմանադրության 32-րդ հոդվածով նախատեսված՝ բնակարանի անձեռնմխելիության իրավունքին, իսկ «Քաղաքացիական, ընտանեկան և քրեական գործերով իրավական օգնության և իրավական հարաբերությունների մասին» 07.10.2002թ. կոնվենցիայի 61-րդ հոդվածի 2-րդ մասի կարգով, «օրինականացնելու» դատավարական ընթացակարգը ՀՀ օրենսդրությամբ նախատեսված չէ։

Ուստիև՝ հարցումը չի կատարվել և վերադարձվել է ՀՀ գլխավոր դատախազություն, սակայն Երևան քաղաքի դատախազը դատարան է դիմել Բելառուսի՝ ՀՀ սահմանադրությանը հակասող քննչական պահանջը օրինականացնելու եւ քաղաքացու բնակարանում խուզարկություն կատարելու թույլտվություն ստանալու համար:

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանն էլ թույլատրել է:

Ինչ է ստացվում՝ ՀՀ քաղաքացու իրավունքները ստորադասվեցին, միայն թե Բելոռուսի հետ գործընկերային հարաբերությունները պահպանվե՞ն այն դեպքում, երբ պետությունը առաջնահերթ պետք է մտածի իր քաղաքացու իրավունքների ապահովման մասին, քան այլ պետությունների պահանջները կատարի:

Ասվածը հատկապես արդիական է Լապշինի վերաբերյալ գործի համատեքստում։

Աղբյուր` Փաստինֆո