Փաստ ինֆո

Քրեական գագաթը հերթական անգամ ցնցեցին աղմկոտ կալանավորումները: Զարգացման ակտիվ ստադիայում է քրեական գործն «բոլոր բոսերի բոս» Զախարի Կալաշովի («Շաքրո Մոլոդոյ») վերաբերյալ, ով ձերբակալվել է անցյալ տարվա հունիսին: Եվ եթե սկզբնապես նա անցնում էր շորթման գործով, ապա ավելի ուշ նրա դեմ նոր գործ հարուցեցին ՌԴ քրեական օրենսգրքի 210-րդ հոդվածի 4-րդ մասով՝ («Հանցագործ հիերարխիայում ամենաբարձր դիրք զբաղեցնող անձի կողմից հանցավոր հանրության կազմակերպում):

Ոչ այնքան վաղուց «վանդակում» հայտնվեց նաև քրեական աշխարհի ևս մեկ գունեղ ներկայացուցիչ, «օրենքով գող» Յուրի Պիչուգինը, նա ինքը՝ «Պիչուգան»: Ընդ որում, ի տարբերություն «Շաքրո Մոլոդոյ»-ի, «Պիչուգա»-ի համար այժմ ձերբակալության առիթ չի եղել, նրան «վերցրել են» վաղուց անցած օրերի գործերի համար:

Պիչուգայի կազմակերպված հանցավոր խմբի ձերբակալված անդամների (Օկտայ Էֆենդիևի, Սերգեյ Վանույտոյի, Ահմեդ Իսաևի, Ալեքսեյ Ռոխլինի, Սերգեյ Սոլդատովի, Հադիսա Ազիզովայի և Մակսիմ Աբուբաքարովի) և նրա առաջնորդի վերաբերյալ քրեական գործ է հարուցվել ՌԴ քրեական օրենսգրքի 210-րդ և 222-րդ հոդվածներով: Նրանք կասկածվում են հանցավոր կազմակերպության ստեղծման, դրան մասնակցելու, ինչպես նաև ապօրինի կերպով զենք-ռազմամթերք ձեռք բերելու, փոխանցելու, տեղափոխելու ու պահելու մեջ:
Կարճ ժամանակ անց հայտնի է դարձել այդ գործի ևս մեկ ֆիգուրանտի՝ Ալեքսանդր Եգորովի ձերբակալության մասին: Եվս երկու կասկածյալներ Մախաչ Ազիզովի ու Վիկտոր Կարպովի նկատմամբ դաշնային հետախուզում է հայտարարվել:
Ինչպես հաղորդում է Ռուսաստանի ՔԿ-ն, Պիչուգինը դեռևս 1994թ. Կոմի Հանրապետության տարածքում ստեղծել է հանցավոր խումբ՝ կազմված նախկին մարզիկներից, իրավապահներից և ԶՈՒ հատուկ ստորաբաժանումներում ծառայություն անցած անձանցից՝ ֆինանսական կամ այլ նյութական շահույթ ստանալուն ուղղված ծանր ու առանձնապես ծանր հանցագործություններ համատեղ կատարելու համար:
Եթե հաշվի առնել նաև, որ հունվարին ուժայինները ցրել են «գողական հավաքույթը» մոսկովյան «Բատոնի» ռեստորանում, որին «հեղինակավոր» «օրինականները» «Պիչուգա»-ն, Վասիլի Խրիստոֆորովը («Վասյա Վոսկրես»), Պաատ Թվալչրելիձեն («Պաատ Մալենկի»), Գեորգի Դիակվնիշվիլին («Գիա Դլիննի») և ուրիշներ հավաքվել էին, որպեսզի քննարկեն նոր բոսի թեկնածությունը, ապա իրադարձությունների այդ շղթան արդեն պատահական չի թվում:

Ակնհայտ է, որ «գողական» աշխարհին նպատակաուղղված թույլ չեն տալիս նոր ղեկավար ընտրել: Դա հաստատել է նաև «Պրեստուպնայա Ռոսիա»-ի աղբյուրը, ով պատմել է վերևից ուժայիններին իջեցված գաղտնի հրահանգի գոյության մասին՝ երկրի գլխավոր «գողի» ընտրությունները չպետք է անցկացվեն 2018թ. անցկացվելիք նախագահականից ավելի շուտ:
Ընդ որում, խանգարում են հենց այսպես կոչված «սլավոնական» թևին:

Ավելի վաղ, 2015թ. ստիպված էր փախուստի դիմել ևս մեկ ազդեցիկ «օրենքով գող» Օլեգ Շիշկանովը («Շիշկան Ռամենսկի»), ում դեմ մեղադրանքներ էին առաջադրել Ռամենսկի օրենսդիր ժողովի պատգամավոր Տատյանա Սիդորովայի ու նրա ընտանիքի անհետացմանն առնչություն ունենալու համար:

Չնայած այն բանին, որ դեռևս ազատության մեջ է «սլավոնների» մեկ այլ վառ ներկայացուցիչ «Վասյա Վոսկրես»-ը, որին ըստ ամենայնի դեռևս ոչինչ չի սպառնում, արդեն հստակ երևում է ուժայինների կողմից «գողական» աշխարհի հենց այդ մասը ճնշելու տենդենցը, և հնարավոր է, որ շուտով մենք նոր ձերբակալություններ կտեսնենք:

Աղբյուր` Փաստինֆո