Փաստ ինֆո

Արարատի և Վայոց Ձորի մարզերի ընդհանուր իրավասության դատարանը՝ դատավոր Գրիգոր Հովհաննիսյանի նախագահությամբ, այսօր անպարտ է ճանաչել և արդարացրել է սուտ մատնության մեջ մեղադրվող Գրիգոր Անդրեասյանին:

Այդ մասին ֆեյսբուքյան իր էջում գրառում է կատարել Գրիգոր Անդրեասյանի պաշտպան Գեորգի Մելիքյան:

Ըստ մեղադրանքի՝ Գրիգոր Անդրեասյանը իր նախաձեռնությամբ, գիտակցելով, որ իր տրամադրած տեղեկատվությունը կեղծ է, խաթարելով իրավապահ մարմիններին նորմալ գործունեությունը և խախտելով Օգսեն Լենդրուշի Մովսիսյանի իրավունքներն ու օրինական շահերը, նրան մեղադրելով միջին ծանրության դիտավորյալ հանցագործության մեջ, ուղղակի դիտավորությամբ կատարել է սուտ մատնություն:

Մասնավորապես, 2015 թվականի օգոստոսի 08-ին ոստիկանության Արտաշատի բաժնում նյութերի նախապատրաստման ընթացքում իր տված բացատրություններով հայտնել է, որ 2015 թվականի օգոստոսի 04-ի լույս 05-ի գիշերն իր կողմից Արարատի մարզի Քաղցրաշեն գյուղի բնակչուհի Սիրուն Կարապետյանի տնամերձ հողամասից զգալի չափերով դեղձի գողությունը համատեղ կատարել են իր մորաքրոջ որդի, Արարատի մարզի Քաղցրաշեն գյուղի բնակիչ Օգսեն Լենդրուշի Մովսիսյանի հետ` վերջինիս նախաձեռնությամբ և առաջարկով:

Գրիգոր Անդրեասյանին մեղադրանք էր առաջադրվել ՀՀ քրեական օրենսգրքի 333-րդ հոդվածի 1-ին մասով:

Փաստաբան Գեորգի Մելիքյանն իր գրառման մեջ նշել է նաև, որ դատավոր Հովհաննիսյանը անթույլատրելի է ճանաչել ապացույցները, նաև հաստատել է բացատրությունը որպես ապացույց օգտագործման անթույլատրելիությունը։

«Իրոք արդար դատավորի արդարացի դատավարության իրականացում, որը պետք է օրինակ ծառայի այլ դատավորների համար։

Շնորհակալություն պարոն Հովհաննիսյանին»,- գրառել է փաստաբանը։

Աղբյուր` Փաստինֆո