Փաստ ինֆո

Ալավերդիում մանկապարտեզից դուրս եկած և Դեբեդ գետում խեղդված 5-ամյա երեխայի մահվան դեպքն ակնհայտ անտարբերության հետևանք է:

Դեպքի վերաբերյալ «Փաստինֆո»-ին նոր տեղեկություններ են հայտնի դարձել: Փոքրիկի ծնողները երեխային մանկապարտեզ են տարել նախ այն պատճառով, որ երեխան խոսելու հետ կապված խնդիրներ է ունեցել, ծնողները մտածել են, որ երեխան կշփվի հասակակիցների հետ, ինչը կօգնի երեխայի խոսքի զարգացմանը:

Թերևս սա լուրջ հիմք պետք է լիներ որպեսզի մանկապարտեզում երեխայի նկատմամբ է՛լ ավելի մեծ ուշադրություն դարձնեին:

Բացի այդ, մեր տեղեկություններով՝ դեպքի օրն առավոտյան մանկապարտեզը երեխաների համար նախատեսված սննդամթերք է ստացել և երբ սննդամթերք բերող բեռնատարը մուտք է գործել մանկապարտեզի տարածք, դարպասները չեն փակվել, ինչի պատճառով երեխան անխոչընդոտ անցել է և դուրս եկել մանկապարտեզի տարածքից:

Ինչպես արդեն տեղեկացրել էինք, դեպքը տեղի է ունեցել փետրվարի 14-ին. առավոտյան երեխան մոր ուղեկցությամբ գնացել է նախադպրոցական ուսումնական հաստատություն, որտեղ և մայրը երեխային հանձնել է նշված հաստատության դաստիարակչուհու հսկողությանը և հեռացել։

Նախնական տվյալներով՝ ժամը 09։30-ի սահմաններում դաստիարակչուհին կազմակերպել է ներկա-բացակա, որին փոքրիկը ներկա է եղել, իսկ ստուգելու գործողությունն ավարտելուց հետո նկատել է, որ երեխան բացակայում է։

Երեխան մանկապարտեզից փախել է և խեղդվել Դեբեդ գետում

Ըստ դաստիարակչուհու՝ այդ մասին հեռախոսազանգով տեղեկացրել է երեխայի մորը, որից հետո սկսվել է երեխային որոնելու գործընթացը, կարճ ժամանակ անց փոքրիկի դին հայտնաբերել է նրա պապը՝ նախադպրոցական ուսումնական հաստատությանը կից հոսող Դեբեդ գետում:

երեխան բերանքսիվայր ընկած է եղել ջրում, ոտքերով դեպի ափամերձ մասը: երեխային անմիջապես տեղափոխել են «Ալավերդու բժշկական կենտրոն», սակայն երեխան արդեն մահացած է եղել:

Ինչպես հայտնել էր Քննչական կոմիտեն, դեպքի առթիվ ՀՀ քննչական կոմիտեի Լոռու մարզային քննչական վարչության Թումանյանի քննչական բաժնում հարուցվել է քրեական գործ՝ ՀՀ քրեական օրենսգրքի 109-րդ հոդվածի 1-ին մասով:

Դեբեդում երեխայի խեղդվելու դեպքով գործ է հարուցվել

Մանկահասակ երեխայի մահվան պատճառը պարզելու նպատակով նշանակվել է դատաբժշկական փորձաքննություն։

Աղբյուր` Փաստինֆո