Փաստ ինֆո

Տաքսու վարորդի ներկայությամբ սպանության գործով այսօր հրապարակվեց մեղադրական դատավճիռը:

Երևանի Արաբկիր և Քանաքեռ-Զեյթուն վարչական շրջանների դատարանը՝ դատավոր Արթուր Մկրտչյանի նախագահությամբ, 25-ամյա Տարոն Գալուստովին մեղավոր ճանաչեց ՀՀ քրեական օրենսգրքի 104-րդ հոդվածի 1-ին մասով՝ սպանություն, և դատապարտեց 10 տարվա ազատազրկման:

Մինչ այդ դատական վիճաբանությունների ընթացքում մեղադրող Արա Մնացականյանն իր մեղադրական ճառում միջնորդեց ամբաստանյալին մեղավոր ճանաչել հիշյալ հոդվածով և դատապարտել նրան 12 տարվա ազատազրկման:

Ըստ մեղադրողի, մեղադրանքը լիովին ապացուցված է և մեղսագրվող արարքը ճիշտ է որակված:

Դատախազը որպես անհիմն, մտացածին ու գործի տվյալներից չբխող որակեց պաշտպանական կողմի պնդումներն այն մասին, որ սպանությունը կատարվել է տուժողի կողմից սպանվելու, վնասվելու իրական մտավախությունից ելնելով: Այդ պնդումներն, ըստ նրա, իրական չեն և չեն փաստվում ապացույցներով, այդ թվում՝ տաքսու վարորդի ցուցմունքներով: Վերջինիս ցուցմունքի համաձայն, տաքսի ավտոմեքենայի սրահում չի եղել որևէ վիճաբանություն, կռիվ կամ փոխադարձ կոնֆլիկտ:

Ա.Մնացականյանը նշեց նաև, որ տվյալ դեպքում առկա չէ անձի՝ Տարոն Գալուստովի, կամովին իրավապահ մարմիններին ներկայանալու հանգամանք:

Մեղադրողը նշեց, որ գործում առկա չեն ծանրացուցիչ հանգամանքներ, մեղմացուցիչ հանգամանք է այն, որ ամբաստանյալը նախաքննության ու դատաքննության ընթացքում տվել է խոստովանական ցուցմունքներ:

Որպես անձը բնութագրող հանգամանք մեղադրողը նշեց այն, որ Տարոն Գալուստովը դատապարտված է եղել, ինչն, ըստ նրա, վկայում է անձի հակասոցիալական ուղղվածության մասին:

Ամբաստանյալի պաշտպան, փաստաբան Կարեն Սարդարյանն իր պաշտպանական ճառում միջնորդեց իր պաշտպանյալի նկատմամբ կիրառել ՀՀ քրեական օրենսգրքի 64-րդ հոդվածը՝ օրենքով նախատեսվածից ավելի մեղմ պատիժ նշանակելը:

Պաշտպանը հայտարարեց, որ իր պաշտպանյալը խարդախության զոհ է դարձել, խաբեությամբ նրանից հափշտակել են 25 հազար դոլար կազմող ոսկեղեն: Ըստ Կ.Սարդարյանի, տուժողը հայտարարել է, որ չի պատրաստվում գումարը վերադարձնել, նրա ու ամբաստանյալի միջև վիճաբանություն ու քաշքշուկ է սկսվել, տուժողը սպառնացել է, որ կսպանի ամբաստանյալին ու ցույց տվել ատրճանակը:

Տուժողն ու ամբաստանյալը կալանավայրում են ծանոթացել, տուժողը դատապարտվել է դիտավորությամբ անձին ծանր վնաս պատճառելու համար, ինչն իր հերթին մտավախություն է առաջացրել, որ նա սպառնալիքը կարող է իրականացնել: Ամբաստանյալը տուժողի գոտկատեղից հանել է ատրճանակը ու սպանել նրան, հուզմունքից լաց եղել, ապա վարորդին ասել, որ եթե ինքը չաներ, Լևոնն էր իրեն սպանելու, իր կյանքի համար վախենալով դա արեց:

Ըստ պաշտպանի, մի շարք մեղմացուցիչ հանգամանքներ կան, դրանց թվում են տուժողի հակաօրինական ու հակաբարոյական վարքագիծը, ամբաստանյալի մեղայականով ներկայանալը, հանցագործության բացահայտմանն աջակցելը:

Պաշտպանը նշեց նաև, որ անձի մարված կամ հանված դատվածությունը չի կարող համարվել անձը բացասաբար բնութագրող հանգամանք, ավելին՝ այդ պարագայում անձը համարվում է չդատված:

Պաշտպանը հավելեց, որ եթե վարորդը չի լսել քաշքշուկը, չի նշանակում, որ այն չի եղել: Տաքսու վարորդը ոչ թե հերքել է, այլ չի հաստատել, միաժամանակ նա չի հերքել դրա հնարավորությունը:

Կարեն Սարդարյանն ընդգծեց, որ իր պաշտպանյալը կամովին է ներկայացել դեպքից մեկ օր հետո, իսկ նույն օրը չի ներկայացել, որովհետև գտնվել է ծանր հոգեվիճակում ու ժամանակ է պահանջվել այդ հոգեվիճակից դուրս գալու համար: Բացի այդ, Տարոնը չէր կարող իմանալ, թե այդ ընթացքում նախաքննական մարմինը որքանով է դեպքին իր մասնակցությունը պարզել:

Տարոն Գալուստովն իր հերթին նշեց, որ ցավում է կատարվածի համար, նման բան չպետք է լիներ և որ ինքն իրեն լիովին մեղավոր է ճանաչում: Ամբաստանյալը հայտնեց, որ նույն օրն է ցանկացել կամովին ներկայանալ, սակայն հետ է դարձել, ռիսկ չի արել և հաջորդ օրն է ներկայացել իրավապահ մարմիններին:

Ամբաստանյալը հայտնեց, որ տաքսու վարորդը լարված է եղել, ինքը նրան ասել է՝ մի վախեցիր, չեմ խփի:

Վերջին խոսքում ամբաստանյալը դատարանից խնդրեց մեղմ վարվել:

Լուսանկարը՝ Քննչական կոմիտեի

Աղբյուր` Փաստինֆո