Փաստ ինֆո

«Փաստինֆո»-ի տեղեկություններով՝ Վերաքննիչ քրեական դատարանում առաջիկայում կհամալրվեն դատավորի 3 թափուր պաշտոններ, ինչը նշանակում է, որ Արդարադատության խորհուրդը թեկնածություններ է առաջարկել ՀՀ Նախագահին` դատավորների թափուր պաշտոններում նշանակելու վերաբերյալ:

Մեր այս տեղեկությունը հաստատեց նաև ՀՀ դատական դեպարտամենտի Արարողակարգի և հասարակայնության հետ կապերի վարչության պետ Արման Խաչատրյանը:

Արման Խաչատրյանը նշեց նաև, որ Արդարադատության խորհուրդը ՀՀ Նախագահին է ներկայացրել Շենգավիթ վարչական շրջանի ընդհանուր իրավասության դատարանի դատավոր Կարեն Մարդանյանի, Սյունիքի մարզի ընդհանուր իրավասության դատարանի դատավոր Անդրանիկ Մնացականյանի և Լոռու մարզի ընդհանուր իրավասության դատարանի դատավոր Նարինե Հովակիմյանի անունները:

Այսպիսով, ՀՀ դատական օրենսգրքի 144-րդ հոդվածի 5-րդ մասի համաձայն՝ Հանրապետության Նախագահը անձի վերաբերյալ դրական եզրակացությունը ստանալուց հետո` երկշաբաթյա ժամկետում, հանում է նրան ծառայողական առաջխաղացման ցուցակից՝ կա՛մ նշանակելով պաշտոնում, կա՛մ մերժելով նրա նշանակումը:

Նույն օրենսգրքի 142-րդ հոդվածի 4-րդ մասով նախատեսված անձանց կա՛մ նշանակում է պաշտոնում, կա՛մ մերժում է նշանակումը` առանց հանելու ծառայողական առաջխաղացման ցուցակից:

Եթե ծառայողական առաջխաղացման ցուցակի համապատասխան բաժնում կան ընդգրկված այլ անձինք, ապա սույն հոդվածով սահմանված կարգով Արդարադատության խորհուրդը ձեռնամուխ է լինում նոր եզրակացություն կազմելուն: Եթե ծառայողական առաջխաղացման ցուցակի համապատասխան բաժնում այլ անձինք չկան, ապա վճռաբեկ դատարանի նախագահը սույն օրենսգրքի 137-րդ հոդվածով սահմանված կարգով տրված հայտարարության հիման վրա սկսում է նոր առաջադրումներ ծառայողական առաջխաղացման ցուցակի համապատասխան բաժնում ընդգրկվելու համար:

Հիշեցնենք, որ դեռևս նախորդ տարվանից վերաքննիչ քրեական դատարանում կար երկու թափուր տեղ, դատավոր Արարատ Պետրոսյանի լիազորությունները դադարեցվել էին 65 տարին լրանալու կապակցությամբ, իսկ դատավոր Լիլիթ Թադևոսյանը ՀՀ Նախագահի հրամանագրով նշանակվել էր ՀՀ վճռաբեկ դատարանի քրեական պալատի դատավոր:

Այս տարի հունվարի 30-ին էլ լրացավ դատավոր Գրիշա Մելիք-Սարգսյանի 65 տարին, նա ևս գնաց թոշակի:

Ավելի վաղ «Փաստինֆո»-ն տեղեկացրել էր, որ Վերաքննիչ քրեական դատարանի դատավոր Կարինե Ղազարյանը դեռևս մինչև տարեվերջ՝ դեկտեմբերի 17-ը, կշարունակի պաշտոնավարել, այդ օրը կլրանա դատավորի 65- տարին և նա ևս կգնա թոշակի:

Աղբյուր` Փաստինֆո