Փաստ ինֆո

«Նուբարաշեն» ՔԿՀ-ում քրեական հեղինակություն Արմեն Ալեքսանյանի կողմից կազմակերպված անկարգությունների գործը, ամենայն հավանականությամբ, այսուհետ կանցկացվի «Նուբարաշեն» ՔԿՀ-ում:

Իսկ մինչ այդ, այսօրվա դատական նիստը հետաձգվեց:

Դատական նիստին կողմերից ներկա էր միայն ամբաստանյալ Արմեն Ալեքսանյանի պաշտպան Գարիկ Գալիկյանը, մյուս պաշտպանները, մեղադրող դատախազ Արիս Բարսեղյանը, ինչպես նաև գործով բոլոր 14 ամբաստանյալները բացակայում էին:

Նիստի նախագահող դատավոր Արթուր Օհանյանը տեղեկացրեց, որ դատարանը մի քանի գրություն է ստացել: Մասնավորապես՝ մեղադրող դատախազը դատարանին գրությամբ տեղեկացրել էր, որ մեկ այլ գործով դատական նիստի է Կենտրոն և Նորք-Մարաշ վարչական շրջանների ընդհանուր իրավասության դատարանում, որն ավելի վաղ է նշանակված եղել, ուստիև՝ մեղադրողը խնդրել էր դատական նիստը հետաձգել:

Դատարանը գրություն էր ստացել նաև կալանավորներին ուղեկցող գուրմարտակից, որում նշվում էր, որ կալանավորներինց երկուսը՝ Էդմոնդ Խլոպուզյանը և Ռաֆիկ Ռաֆայելյանը, գտնվում են «Սևան» ՔԿՀ-ում և նրանց դատական նիստին ներկայացնելն անհնար է:

Միևնույն ժամանակ ուղեկցող գումարտակը դատարանին խնդրել էր գործով դատական նիստերն անցկացնել քրեակատարողական հիմնարկում՝ հաշվի առնելով նրանց անցյալը, բացի այդ՝ դատական նիստներին անվտանգություն ապահովվելը:

Իսկ «Նուբարաշեն» ՔԿՀ-ից ստացված գրության համաձայն՝ այս քրեական գործով կալանավորներից մի քանիսի գործերը գտնվում են Վերաքննիչ, Վճռաբեկ դատարաններում:

Այսպիսով, դատական նիստը հետաձգվեց և նշանակվեց մարտի 21-ին և, ամենայն հավանականությամբ, գործով դատական նիստերը կանցկացվեն «Նուբարաշեն» քրեակատարողական հիմնարկում:

«Նուբարաշեն» ՔԿՀ-ում քրեական հեղինակության կողմից կազմակերպված «բունտի» գործով նախաքննությունն ավարտվել է

Ավելի վաղ տեղեկացրել էինք, որ ՔԿՀ-ում դատապարտյալների կողմից «բունտը» հասունացել է այն պատճառով, որ քրեական հեղինակություն համարվող Արմեն Ալեքսանյանի խցում նախատեսված խուզարկություն է եղել:

Քրեական հեղինակությանը բղավել է, թե «դաբրո» կա և կալանավորներին անհնազանդության կոչեր է արել: Կալանավորները տարբեր իրեր են նետել, աղմկել` հարվածելով դռներին, կոտրեն փականների և մի քանի տասնյակ կալանավոր հայտնվել է խցերից դուրս` գործադրելով տարաբնույթ բռնություններ իրավապահ մարմինների աշխատակիցների նկատմամբ, մածուն նետել ՀՔԾ պետի տեղակալի վրա:

Այսպես, ըստ մեղադրանքի` Արմեն Ալեքսանյան ՀՀ ԱՆ «Նուբարաշեն» ՔԿՀ-ում կազմակերպել է բռնության գործադրմամբ, գույքի վնասմամբ և ոչնչացմամբ զուգորդված զանգվածային անկարգություններ, անկարգությունների մասնակիցների կողմից խմբի կազմում զանգվածաբար ջարդվել, վնասվել և ոչնչացվել են խցերի դռների թվով 9 հատ կախովի փականները, թիվ 21,23, 31, 41, 52, 55, 58 և 60 խցերի դռների կերակրադռնակները, թիվ 62 խցի դռան բռնակը և բանալիների թաքստոց հանդիսացող խողովակը, որի հետևանքով ՀՀ ԱՆ «Նուբարաշեն» ՔԿՀ-ին ընդհանուր առմամբ պատճառվել է 58.100 ՀՀ դրամ գույքային վնաս:

Ըստ Արթուր Բարոյանին առաջադրված մեղադրանքի` նա Արտակ Աղանիկյանի, Հայկ Բաբայանի, Մերուժան Գևորգյանի, Օնիկ Ավետիսյանի, Արտակ Ոսկանյանի, Երվանդ Թորոսյանի, Կարեն Ազարյանի, Գրիգոր Հովհաննիսյանի, Անդրանիկ Հակոբյանի, Էդմոնդ Խլոպուզյանի, Արման Իվանյանի և Ռաֆիկ Ռաֆաելյանի հետ մասնակցել է քրեական հեղինակություն համարվող Ա.Ալեքսանյանի կողմից կազմակերպված գույքի վնասմամբ և ոչնչացմամբ զուգորդված զանգվածային անկարգություններին:

Մասնավորապես, Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի վարույթում քննվող քրեական գործով ամբաստանյալ, քրեակատարողական հիմնարկի թիվ 48 խցի կալանավոր, քրեական հեղինակություն համարվող Արմեն Ալեքսանյանը, տեղեկացել է, որ ՀՀ հատուկ քննչական ծառայության և ՀՀ ոստիկանության կազմակերպված հանցավորության դեմ պայքարի գլխավոր վարչության աշխատակիցների կողմից դատարանի որոշման հիման վրա խցում խուզարկություն է նախատեսվում և այն խափանելու նպատակով 2016թ. մայիսի 3-ին՝ ժամը 16:30-ի սահմաններում, քրեակատարողական հիմնարկում պահվող կալանավորված և դատապարտված անձանց հրահրել է իրականացնել զանգվածային անկարգություններ:

Կադրերը՝ Քննչական կոմիտեի

Աղբյուր` Փաստինֆո