Փաստ ինֆո

Ազգային ժողովի ՀԱԿ խմբակցության ղեկավար Լևոն Զուրաբյանը չի բացառում, որ Ազգային ժողովի առաջիկա ընտրություններից հետո կարող են համագործակցել այլ քաղաքական ուժերի հետ:

Փետրվարի 16-ին լրագրողների հետ հանդիպմանը Զուրաբյանը հիշեցրեց, որ այդ մասին խոսել է նաև ՀԱԿ առաջնորդ Լևոն Տեր-Պետրոսյանը կուսակցության վերջին համագումարի ժամանակ:

«Դա մեր սկզբունքային դիրքորոշումն է: Մենք պատրաստ ենք ցանկացած համագործակցության, սակայն երբեք դաշինքի մեջ չենք մտնի իշխող Հանրապետական կուսակցության հետ, որովհետև մեր հակասությունները շատ մեծ են, որոնց մասին մենք միշտ բաց խոսել ենք»,- «Արմենպրես»-ի հաղորդմամբ` նշեց Զուրաբյանը:

Անդրադառնալով մյուս քաղաքական ուժերի հետ համագործակցության հնարավորությանը` Զուրաբյանը խորհուրդ տվեց այս պահին գուշակություններով չզբաղվել:

«Քաղաքական իրավիճակ է, քաղաքական գործընթացներ են: Ես չգիտեմ որտեղ մենք կլինենք ապրիլի 2-ին ապրիլի 6-ին կամ մայիսի 10-ին: Եթե մենք տեսնենք, որ կա քաղաքական գործընթաց, որ բխում է Հայաստանի շահերից, և մենք իմանանք, որ մեր որոշումով կարող ենք բեկում մտցնել, ինչո՞ւ ոչ: Բայց մենք նախապես պլանավորած ինչ-որ բան չունենք: Իրավիճակը ցույց կտա»,- ընդգծեց Լևոն Զուրաբյանը:

Նա հավելեց, որ իրենք շատ ակտիվ չեն եղել այլ քաղաքական ուժերի հետ դաշինք կազմելու վերաբերյալ բանակցություններում, որովհետև երբեք կողմ չեն եղել արհեստական ճանապարհով ստեղծված դաշինքներին և համարել են, որ ավելի կարևոր է ուղերձը:

«Դու պիտի ժողովրդիդ ուղերձ հղես, ասես լուծումներ, որոնք կարող են շատ դժվար լինել: Դրանք գուցե այնպիսի լուծումներ են, որոնց մասին ոչ մի քաղաքական ուժ չի համարձակվում խոսել` մտածելով, որ դա կարող է իրենց հեղինակության վրա ազդել: Մենք այդ քաղաքական ուժը չենք: Մենք անելու ենք այն, ինչ ճիշտ ենք համարում»,- ընդգծեց Լևոն Զուրաբյանը:

Լուսանկարը՝ Armenpress-ի

Աղբյուր` Փաստինֆո