Փաստ ինֆո

ԼՂՀ պաշտպանության բանակ զորակոչված և զինհոսպիտալում մահացած նորակոչիկ Նորայր Սահակյանի գործով այսօրվա դատական նիստը հետաձգվեց՝ պաշտպաններ Երեմ Սարգսյանի և Գեղամ Հակոբյանի բացակայության պատճառով: 

Դատական նիստին չէին ներկայացել ամբաստանյալ Մհեր Դավիդյանցի պաշտպան Երեմ Սարգսյանը, ամբաստանյալ Արկադի Չախոյանի պաշտպան Գեղամ Հակոբյանը, ինչպես նաև՝ տուժողի իրավահաջորդի ներկայացուցիչը և ամբաստանյալ Վարուժան Մանասյանը:

Նշենք, որ գործը գտնվում է դատական վիճաբանությունների փուլում և նախորդ դատական նիստում պաշտպանական ճառով հանդես են եկել ամբաստանյալ Կարեն Ջուլհակյանի պաշտպան Նորայր Նորիկյանը և ամբաստանյալ Վարուժան Մանասյանի պաշտպան Կարինե Խաչատրյանը:

Այսօր նախատեսվում էր, որ դատարանը կլսի մյուս երկու պաշտպանների պաշտպանական ճառերը, սակայն նախագահող դատավոր Արթուր Մկրտչյանը պաշտպանների և դատարան չներկայացած ամբաստանյալի նկատմամբ նախազգուշացում հայտարարեց՝ դատարանի նկատմամբ անհարգալից վերաբերմունքի համար:

Ավելի վաղ տեղեկացրել ենք, որ ըստ մեղադրանքի՝ Կարեն Ջուլհակյանը հանդիսանալով պաշտոնատար անձ, ծառայության մեջ գտնվելով ՀՀ ՊՆ N զորամասում որպես գինեկոլոգիական բաժանմունքի ավագ օրդինատոր, կոչումով մայոր,21.12.2012թ.-ին ՀՀ ՊՆ հավաքակայանի բուժկետում որպես հերթապահ բժիշկ հերթապահություն իրականացնելիս, անփույթ վերաբերմունք է ցուցաբերել իր ծառայության նկատմամբ, որն անզգուշությամբ առաջացրել ծանր հետևանք։

Նորակոչիկ Նորայր Սահակյանի մահվան գործով քննությունը կատարվել է մակերեսորեն. պաշտպանները միջնորդում են արդարացնել

Ըստ Մհեր Դավիդյանցին առաջադրված մեղադրանքի՝ նա հանդիսանալով պաշտոնատար անձ, ծառայության մեջ գտնվելով ՊԲ N զորամասում որպես բաժանմունքի պետ, կոչումով լեյտենանտ, 22.12.2012թ. անփույթ վերաբերմունք է ցուցաբերել իր ծառայության նկատմամբ, որն էլ անզգուշությամբ առաջացրել է ծանր հետևանք։
Իսկ Արկադի Չախոյանին մեղադրանք է առաջադրվել այն բանի համար, որ նա, հանդիսանալով պաշտոնատար անձ, ծառայության մեջ գտնվելով ՊԲ N զորամասում որպես թերապևտիկ բաժանմունքի ավագ օրդինատոր, իսկ 20.12.2012թ. նաև զբաղեցնելով թերապևտիկ բաժանմունքի պետի պաշտոնի ժամանակավոր կատարողի պաշտոնը, կոչումով լեյտենանտ, 22.12.2012թ. զորամասում որպես հերթապահ բժիշկ, հերթապահություն իրականացնելիս անփույթ վերաբերմունք է ցուցաբերել իր ծառայության նկատմամբ, որն էլ անզգուշությամբ առաջացրել է ծանր հետևանք։

Վարուժան Մանասյանին էլ մեղադրանք է առաջադրվել այն բանի համար, որ նա ծառայելով ՊԲ հավաքակետում որպես բուժկետի պետ-բուժակ, կոչումով ենթասպա, 21.12.2012թ. գործուղման մեջ գտնվելով որպես շարասյան ավագ և հանդիսանալով պաշտոնատար անձ, անփույթ վերաբերմունք է ցուցաբերել իր ծառայության նկատմամբ, որն անզգուշությամբ առաջացրել է ծանր հետևանքներ։

Կարեն Ջուլհակյանին, Արկադի Չախոյանին և Վարուժան Մանասյանին մեղադրանք է առաջադրվել ՀՀ քրեական օրենսգրքի 376-րդ հոդվածի 2-րդ մասով, իսկ Մհեր Դավիդյանցին՝ 376-րդ հոդվածի 2-րդ մասով և 314-րդ հոդվածով:

Հաջորդ դատական նիստը տեղի կունենա մարտի 10-ին:

Աղբյուր` Փաստինֆո