Փաստ ինֆո

ՀՀ կառավարությունը հստակ ներդրումային ծրագրերով ցանկանում է ցույց տալ, որ Հայաստանում ներդրում անելը և գումար աշխատելը հնարավոր է ու շահավետ:

Այդ մասին ԵՊՀ ուսանողների հետ հանդիպմանը նշեց ՀՀ վարչապետ Կարեն Կարապետյանը՝ ավելացնելով, որ գործադիրը քննարկել է 470-ից ավելի ծրագիր, որոնցից 340-ը համարել է իրատեսական: Այդ ծրագրերի ընդհանուր ներդրումային փաթեթը կազմում է 3,2 միլիարդ դոլար, որից 2017 թվականին իրատեսական է համարվում 830 միլիոնը:

«Դա չի նշանակում, որ եթե տարեվերջին 830 միլիոն դոլարի հաշվետվություն չներկայացնենք՝ թերացել ենք, չնայած կարելի է այդպես էլ վերաբերվել, բայց դա այն պոտենցիալն է, այն հորիզոնը, որը մենք մեր առջև դնում ենք:

Ցանկանում եմ տեղեկացնել, որ այս պահին, բացի այդ 3,2 միլիարդ դոլարի ծրագրային փաթեթից, կառավարության տարբեր հարթակների վրա քննարկում ենք ևս 79 ծրագիր, որոնք ունեն 5,3 միլիարդ դոլար ներդնելու հնարավորություն», - «Արմենպրես»-ի փոխանցմամբ, ասաց վարչապետը:

Նրա խոսքով՝ 3,2 մլրդ դոլարի ծրագրերում հստակ տեսնում են ֆինանսական աղբյուրները, որոնք տարբեր են՝ պետբյուջե, վարկ, մասնավոր հատված, դրամաշնորհ, համայնքային բյուջե, իսկ 5,3 միլիարդի փաթեթի ծրագրերին յուրաքանչյուր պոտենցիալ ներդրող կարող է մասնակցել:

«Ինչո՞ւ ենք մենք սրան հատուկ ուշադրություն դարձնում, որովհետև Հայաստանում կար մի տպավորություն, թե այստեղ փող ներդնելը, փող աշխատելը, շահույթ հետապնդելն անհնար է: Մենք այս պահին հստակ ծրագրերով ցույց ենք տալիս հակառակը, և դուք կարող եք մեր կայքէջում տեսնել բոլոր ծրագրերը»,- ընդգծեց Կարեն Կարապետյանը:

Աղբյուր` Փաստինֆո