Փաստ ինֆո

Հայաստանի արդարադատության նախարարությունը ստացել է ՀՀ փաստաբանների պալատի դիմումը կալանավորված անձ Ժիրայր Սեֆիլյանի պաշտպան Մուշեղ Շուշանյանի տեսակցության վերաբերյալ: Այս մասին «Արմենպրես»-ին տեղեկացրին արդարադատության նախարարության տեղեկատվության և հասարակայնության հետ կապերի վարչությունից:

«Արդարադատության նախարարությունը ստացել է ՀՀ փաստաբանների պալատի դիմումը, և արդարադատության նախարար Արփինե Հովհաննիսյանի հանձնարարականով այն ուղարկվել է Քրեակատարողական վարչություն: Վերջինս դիմումում բարձրացված հարցի վերաբերյալ հանդես կգա պարզաբանմամբ»,- հայտնեցին նախարարությունից:

Ժիրայր Սեֆիլյանի փաստաբան Մուշեղ Շուշանյանի հարցով ՀՀ Փաստաբանների պալատի նախագահը փետրվարի 15-ին դիմել է Արփինե Հովհաննիսյանին:

Մուշեղ Շուշանյանի հանդեպ ՔԿՀ աշխատակիցների գործողությունները հակասում են Սահմանադրությանը, օրենքներին ու միջազգային պայմանագրերին

ՀՀ ԱՆ «Արմավիր» քրեակատարողական հիմնարկը փետրվարի 14-ին մերժել է կալանավորված անձ Ժիրայր Սեֆիլյանի պաշտպան Մուշեղ Շուշանյանի տեսակցությունը։ Ըստ փաստաբան Մուշեղ Շուշանյանի՝ ՔԿՀ-ն չի թույլատրել տեսակցությունը պաշտպանյալի հետ, քանի որ փաստաբանը հրաժարվել է իր մոտ գտնվող փաստաթղթերի՝ քրեական գործի առնչությունը պարզելու նպատակով ուսումնասիրության համար տրամադրել ՔԿՀ աշխատակիցներին:

Փաստաբանների պալատը ՀՀ արդարադատության նախարարին ուղղված գրությամբ նշել է, որ ՔԿՀ կողմից վկայակոչված կանոնակարգի նորﬔրի հիման վրա փաստաբանի մոտ քրեական գործի նյութերին չառնչվող այլ փաստաթղթերի հայտնաբերմանն ուղղված գործողությունն անհնար է կատարել առանց բոլոր փաստաթղթերի բովանդակությանը ծանոթանալու։

Նման գործողությամբ ՔԿՀ աշխատակիցները փաստացի հնարավորություն կունենան ծանոթանալու փաստաբանական գաղտնիք պարունակող այլ նյութերին, ինչպես նաև՝ չունենալով անհրաժեշտ գիտելիքներ կամ տեղեկություններ, հայեցողաբար գնահատելու փաստաթղթերի առնչությունը քրեական գործին:

Ըստ ՀՀ փաստաբանների պալատի դիրքորոշման ՔԿՀ աշխատակազմի նման վարքագիծը հակասում է Հայաստանի Հանրապետության Սահմանադրությանը, միջազգային պայմանագրերին և ներպետական օրենքներին։

Լուսանկարը՝ Armenpress-ի

Աղբյուր` Փաստինֆո