Փաստ ինֆո

Երկու անձի նկատմամբ սպանության փորձ կատարելու մեջ մեղադրվող Բագրատ Թումանյանի գործով այսօրվա դատական նիստում հարցաքննված վկան հայտարարեց, որ նախաքննական ցուցմունքը տվել է ճնշումների ազդեցության տակ:
Տուժողներից մեկը՝ Արմեն Էմբոյանն, վկա Ռ.Թովմասյանի հորաքրոջ որդին է:

Վկան հայտարարեց, որ նախաքննական առաջին ցուցմունքը տվել է իր նկատմամբ ոստիկանությունում գործադրված ճնշման ազդեցության տակ: Ըստ վկայի, իրեն քրեականի աշխատակիցը պարտադրել է ցուցմունք տալ, մասնավորապես, այն մասին, որ

Բագրատ Թումանյանն է եղել կրակողը: Իրեն ասել են՝ եթե մեր ուզածը չգրես՝ կդատվես:

Քրեականի աշխատակիցը եկել է նաև քննիչի մոտ, ներս ու դուրս արել, կարդացել իր ցուցմունքը: Բացի այդ՝ ինքն ուզում էր արագ կատարել քննիչների ասածը ու գնալ հիվանդանոց՝ բժիշկներն իր եղբորը ողջ մնալու հույսեր չէին տալիս:

Որպես ճնշման միջոց իր նպատակին հասնելու ու իրեն վախեցնելու համար ոստիկանության աշխատակիցը հայհոյում էր:

Նախաքննության ընթացքում հաջորդ երկու ցուցմունքները տվել է նույնպես պարտադրանքի ազդեցության տակ՝ իրեն ասվել է՝ եթե փոխես ցուցմունքդ, կդատվես:

Հատուկ քննչական ծառայությունում հարցաքննվելիս նույնպես ինքը չի փոխել իր ցուցմունքը, քանի որ նորից զգուշացվել է՝ կդատվես:

Իսկ հիմա՝ դատարանում, եթե ինքը կրկնի նախաքննական ցուցմունքը, կստացվի, որ ինքը Բագրատի նկատմամբ շառ է անում:

Վկան իր այս հայտարարությունը պնդեց նաև մեղադրողի կողմից սուտ մատնության անելու համար նախազգուշացվելուց հետո:

Ամբաստանյալ Բագրատ Թումանյանի պաշտպան Վարդան Զուռնաչյանը հայտարարեց, որ թեև հակասություններ են եղել իր պաշտպանյալի ու վկայի նախաքննական ցուցմունքների միջև, սակայն նրանց միջև առերես հարցաքննություն չի անցկացվել:

Ուստի հաշվի առնելով վկայի հայտարարությունը ճնշումների մասին, ինչպես նաև հարցաքննության արձանագրության մեջ ներկա գտնված այլ անձանց չարտացոլելու հանգամանքը, պաշտպանը հայտարարեց, որ առաջ է գալիս վկայի բոլոր երեք ցուցմունքների որպես ապացույց օգտագործելու անթույլատրելիության հարցը:

Դատաքննության ու նախաքննության ընթացքում տրված վկայի ցուցմունքներում առկա էական հակասությունների պատճառով հրապարակվեցին նրա նախաքննական ցուցմունքները:

Այսպես դատարանում նա հայտնեց, որ մեքենայից դուրս է եկել այն ժամանակ, երբ դրսում՝ իր եղբոր ու ամբաստանյալի խոսակցության տոնը բարձրացել է:

Վկան դատարանում չհիշեց, թե ո՛րն է եղել դեպքից տասն օր առաջ իր եղբոր ու միջադեպի մասնակից Արմանի միջև լեզվակռվի պատճառը՝ իմացել եմ, բայց չեմ հիշում, ասաց վկան: Ըստ նրա, քաշքշուկի ժամանակ ինքը սայթաքել է, ընկնելիս դեմքով հարվածել ասֆալտին: Իր եղբայր Արմենն իրենից ավելի շուտ էր ընկել՝ նրա որովայնին կրակոց էր արձակվել: Որովայնին արձակված կրակոցից վիրավորվել էր նաև Ռուդոլֆը: Ըստ վկայի, ինքը չէր կարող իմանալ, թե ով է կրակողը:

Մինչդեռ նախաքննական ցուցմունքում վկան հայտնել էր, որ Բագրատի ձեռքում սև գույնի ատրճանակ կար՝ նա կրակեց Արմենի որովայնին, Ռուդոլֆը ասաց՝ Բգո, ի՞նչ ես անում և որովայնին մի կրակոց էլ ինքը ստացավ:

Վկան նախաքննական ցուցմունքում հայտնել էր, որ դեպքին նախորդած միջադեպի պատճառն այն է եղել, որ Արմենը քաշել է Արմանի հագուստից, և վերջինս դրանից սրտնեղել է:

Նախաքննական ցուցմունքում ի տարբերություն դատաքննական ցուցմունքի՝ վկան հայտնել էր, որ խառը կռվի ժամանակ ինքն էլ է հարվածներ ստացել, վայր է ընկել, ընկած վիճակում էլ շարունակել են իրեն ոտքերով հարվածել:

Դատարանում հարցաքննվեց նաև տարածքի բնակչուհի մի վկա, ով տուժող Արմենի ընկերոջ մայրն է: Ըստ վկայի, ինքը մոտեցել է Արմենին՝ օգնելու համար, նրա ճակատն արյունոտ էր, ձայն էլ է լսել, սակայն չի հասկացել, որ կրակոց է:

Երկու վկաներն էլ դատարան բերման էին ենթարկվել: Եվս երկու վկաներ էլ էին բերման ենթարկվել, սակայն նրանք բերման ենթարկվելուց հետո դատարանից հեռացել էին: Դատարանի որոշմամբ նրանք նորից բերման կենթարկվեն, իսկ չներկայացած մյուս վկաներին ոստիկանության միջոցով ծանուցումներ կուղարկվեն:

Ըստ Բագրատ Թումանյանին առաջադրված մեղադրանքի, նա 06.02.2015թ. Երևան քաղաքի 14 փողոցի սկզբնամասում, Արման Վարտանյանի կնոջ աշխատանքային հարցերի շուրջ վիճաբանության մեջ է մտել Ռուդոլֆ Սեդրակյանի, Արմեն Էմբոյանի և Ռազմիկ Թովմասյանի հետ, որի ընթացքում Ա.Էմբոյանին և Ռ.Սեդրակյանին ապօրինաբար կյանքից զրկելու ուղղակի դիտավորությամբ, իր կողմից ապօրինի ձեռք բերված և կրվող հրազենից կրակել է Ռ.Սեդրակյանի և Ա.Էմբոյանի որովայնի առաջային պատի շրջանին, որից հետո վերջիններս թափանցող հրազենային վնասվածքներով տեղափոխվել են Միքայելյանի անվան վիրաբուժության ինստիտուտ, որտեղ բժշկական միջամտության հետևանքով հաջողվել է փրկել նրանց կյանքը:

Բագրատ Թումանյանը մեղադրվում է ՀՀ քրեական օրենսգրքի 34-104-րդ հոդվածի 2-րդ մասի 1-ին և 6-րդ կետերով՝ շատերի կյանքի համար վտանգավոր եղանակով երկու կամ ավելի մարդկանց սպանության փորձ, և 235-րդ հոդվածի 1-ին մասով՝ ապօրինի կերպով զենք ձեռք բերելը, կրելը, պահելը:

Աղբյուր` Փաստինֆո