Փաստ ինֆո

Կալանքը կրելու, այդ թվում նաև՝ պատժախցում գտնվելու ընթացքում, Արարատ Խանդոյանի նկատմամբ անմարդկային դաժան վերաբերմունք կամ խոշտանգում չի դրսևորվել: Այս մասին Արարատ Խանդոյանի պաշտպան, «Ընդդեմ իրավական կամայականության» ՀԿ փաստաբան Արա Ղարագյոզյանի դիմումի հիման վրա կատարված ուսումնասիրության արդյունքում եզրահանգել է ՀՀ արդարադատության նախարարության Քրեակատարողական վարչությունը:

Ըստ Քրեակատարողական վարչության, պատժախցում գտնվելու ընթացքում Արարատ Խանդոյանն ապահովված է եղել անկողնային, հիգիենայի պարագաներով, կենտրոնացված ջեռուցման համակարգով, անգամ Խանդոյանի խնդրանքով նրան տրամադրվել է լրացուցիչ էլեկտրական ջեռուցիչ:

Ինչպես «Փաստինֆո»-ի լրագրողին հայտնեց Ա.Խանդոյանի պաշտպան Արա Ղարագյոզյանը, բաց պատուհանից ներս սողոսկող ցուրտն էլ, ըստ Քրեակատարողական վարչության, կատարվել է օդափոխության նպատակով՝ կալանավորված անձանց և դատապարտյալների խնդրանքները հաշվի առնելով: Մասնավորապես, օդափոխություն ապահովելու համար խցի պատուհանի անշարժ փեղկի ապակու ներքևի մի փոքր հատվածը հիմնարկի վարչակազմի կողմից փոխարինվել էր շարժական հաստ շերտ ունեցող ստվարաթղթով, որը կարող էր բացվել և փակվել դատապարտյալների հայեցողությամբ՝ ըստ անհրաժեշտության:

Արա Ղարագյոզյանը մեր հետ զրույցում Քրեակատարողական վարչության այս պատասխանն որակեց որպես զավեշտ, որով նպատակ ունեն պարզապես խուսափել պատասխանատվությունից:

Պաշտպանը միաժամանակ նկատեց, որ ակնհայտ է այս հարցում ՔԿՎ դիրքորոշման փոփոխությունը. եթե նախկինում ՔԿՎ-ն առհասարակ հերքում էր Արարատ Խանդոյանի հայտարարության մեջ նշված փաստերը, ապա հիմա՝ այն բանից հետո, որ Մարդու իրավունքների պաշտպանը ֆիքսել է պատժախցերում տիրող անմխիթար վիճակը, փորձում է իր համար ավելի բարենպաստ պատճառաբանություն գտնել: Պատասխանն առ այն, որ պատուհանի ապակյա փեղկը փոխարինվել է ստվարաթղթով կալանավորների ու դատապարտյալների խնդրանքով և որ նրանք ապահովված են եղել հիգիենայի ու այլ պարագաներով չի համապատասխանում իրականությանը: Իր պաշտպանյալը՝ Արարատ Խանդոյանը, ապահովված չէ եղել անգամ առաջին անհրաժեշտության պարագաներով: «Ինձ այս պատասխանը չի գոհացնում, ես անպայման պարզաբանում եմ պահանջելու»,- ասաց Արա Ղարագյոզյանը:

Աղբյուր` Փաստինֆո