Փաստ ինֆո

«Համախմբում» կուսակցության առաջնորդ, ՀՀ արտաքին գործերի նախկին նախարար Վարդան Օսկանյանն անդրադարձել է ԲՀԿ նախագահ Գագիկ Ծառուկյանի հետ հնարավոր համագործակցությանը:

Փետրվարի 13-ին «Ժառանգություն» կուսակցության և ՀՀ պաշտպանության նախկին նախարար Սեյրան Օհանյանի հետ ԱԺ առաջիկա ընտրություններում դաշինքով մասնակցելու վերաբերյալ համագործակցության համաձայնագրի ստորագրումից հետո լրագրողների հետ զրույցում Վարդան Օսկանյանն ընդգծեց, որ որքան մոտենում է ցուցակները ներկայացնելու օրը, այնքան նվազում է այլ ուժերի հետ նախընտրական դաշինք կազմելու հնարավորությունը:

«Սակայն այդ հնարավորությունը հետընտրական շրջանում մնում է: Երկուսս էլ ընդդիմադիր դաշտում ենք գործում, ունենք մեր ընտրազանգվածը կգնանք ընտրությունների և հաջողության դեպքում կարելի է մտածել այդ մասին»,- «Արմենպրես»-ի հաղորդմամբ` նշեց Օսկանյանը:

Նա հավելեց, որ բաց են համագործակցության համար ընդդիմադիր դաշտում գործող ցանկացած քաղաքական ուժի կամ կուսակցությունների դաշինքի հետ թե ընտրությունների ընթացքում, թե դրանից հետո:

Վարդան Օսկանյանն անդրադարձավ նաև «Երրորդ հանրապետություն» կուսակցության հիմնադիր Վիկտոր Դալլաքյանի հայտարարություններին: Նա ընդգծեց, որ որևէ տեղեկություն չունի այն մասին, որ ԼՂՀ ՊԲ նախկին հրամանատար Սամվել Բաբայանը մասնակցել է «Համախմբում», ՀԴԿ և «Երրորդ հանրապետություն» կուսակցությունների ձևավորելիք դաշինքի համամասնական ցուցակի կազմման աշխատանքներին աշխատանքներին:

«Ես ընդհանրապես ցուցակների կազմման տեխնիկական աշխատանքներին չեմ մասնակցել, բանակցություններին մասնակցություն չեմ ունեցել: Այդ հարցերով մեր աշխատանքային խումբն է բանակցել, իսկ բանակցային խմբում Սամվել Բաբայանը հաստատ չի եղել»,-ասաց Օսկանյանը` հավելելով, որ չգիտի, թե փետրվարի 13-ին հրավիրված ասուլիսում ինչ ցուցակ է հրապարակել Վիկտոր Դալլաքյանը:

Նրա խոսքով` իրենց ամենակարևոր սկզբունքներից մեկն այն է եղել, որ պետք է ստեղծվի բանակցությունների արդյունքում ձևավորված դաշինք` բնական համարելով այն հանգամանքը, որ այդ գործընթացը սկսել են շատ ուժերի հետ, սակայն ժամանակի ընթացքում պակասել են: «Մենք այսօր ստեղծեցինք մեր պահանջներին բավարարող դաշինք: Այն դեռ բաց է, մենք շարունակում ենք բանակցությունները այլ քաղաքական ուժերի հետ: Եթե այդ բանակցությունների արդյունքում դաշինքն ընդլայնվի, ավելի լավ, եթե չէ` մեզ բավարարում է ձևավորված դաշինքը»,- եզրափակեց Օսկանյանը:

«Համախմբում», «Ժառանգություն» կուսակցությունները և ՀՀ պաշտպանության նախկին նախարար Սեյրան Օհանյանն Ազգային ժողովի առաջիկա ընտրություններին դաշինքով մասնակցելու վերաբերյալ համագործակցության համաձայնագիր են ստորագրել: Ավելի վաղ «Համախմբում» կուսակցությունը համագործակցության համաձայնագիր էր ստորագրել «Երրորդ հանրապետություն» և «Հայաստանի դեմոկրատական» կուսակցությունների հետ, որին միանալու պատրաստակամություն էր հայտնել նաև ԱԻՄ առաջնորդ Պարույր Հայրիկյանը:

Սակայն հետագայում նախ Պարույր Հայրիկյանը, ապա ՀԴԿ առաջնորդ Արամ Սարգսյանը և «Երրորդ հանրապետություն» կուսակցության հիմնադիր Վիկտոր Դալլաքյանը հայտարարեցին համագործակցության վերաբերյալ համաձայնագրին իրենց մասնակցությունը դադարեցնելու մասին:

Լուսանկարը՝ Ֆոտոլուրի

Աղբյուր` Փաստինֆո