Փաստ ինֆո

ՀՀ պաշտպանության նախկին նախարար Սեյրան Օհանյանը հերքում է Արցախի պաշտպանության բանակի նախկին հրամանատար Սամվել Բաբայանի մեծ դերակատարումը Վարդան Օսկանյանի և Րաֆֆի Հովհաննիսյանի հետ իր համագործակցության մեջ:

«Ժառանգություն» և «Համախմբում» կուսակցությունների հետ ԱԺ առաջիկա ընտրություններին դաշինքով մասնակցելու վերաբերյալ համագործակցության համաձայնագրի ստորագրումից հետո լրագրողների հետ զրույցում Օհանյանը, անդրադառնալով «Երրորդ հանրապետություն» կուսակցության առաջնորդ Վիկտոր Դալլաքյանի հայտարարությանը, թե Սամվել Բաբայանը «Համախմբում» կուսակցության լոբբինգն է անում և իրեն ձևավորվելիք դաշինքի ցուցակ է ներկայացրել, Օհանյանն ընդգծեց, որ ինքը Բաբայանի հետ մտերիմ հարաբերությունների մեջ է, բայց ճիշտ չէ այն, որ նա մեծ դերակատարում ունի իրենց համագործակցության մեջ:

Օհանյանը խոսեց նաև Դալլաքյանի հայտարարության մասին, թե Սամվել Բաբայանը կարող է ազդեցություն ունենալ Սեյրան Օհանյանի որոշումների վրա:

«Ես անկախ անձնավորություն եմ, և որևէ մեկը չի կարող ազդել իմ վրա, ինչպես և ես երբեք չեմ փորձել որևէ անհատի կամ կուսակցության վրա ազդել»,- «Արմենպրես»-ի հաղորդմամբ` ասաց Օհանյանը:

Անդրադառնալով Վիկտոր Դալլաքյանի որոշմանը, ով հայտարարել է «Համախմբում» և Հայաստանի դեմոկրատական կուսակցությունների հետ համաձայնգրին մասնակցությունը դադարեցնելու մասին` Օհանյանն ասաց, որ հարգում է բոլորի որոշումները:

«Ես հարգում եմ յուրաքանչյուր անհատի և կուսակցության որոշումները: Ես կարծում եմ, որ նման որոշումները կայացվում են հարգալից քննարկուﬓերի արդյունքում»,- նշեց Օհանյանը:

Սեյրան Օհանյանն ասաց, որ ինչպես բոլոր կուսակցությունները և կուսակցությունների դաշինքները իրենք ընտրություններին մասնակցում են իշխանություն ձևավորելու համար: Նա նկատեց, որ իշխանություն ձևավորողը կլինի այն քաղաքական միավորը, որը կստանա ժողովրդի քվեն:

Հարցին` ընտրություններից հետո անհրաժեշտության դեպքում խորհրդարանում մեծամասնություն ձևավորելու համար կոալիցիա կկազմե՞ն ՀՀԿ-ի հետ, Օհանյանն ընդգծեց, որ իրենք առաջին հերթին պետք է համապատասխան աշխատանք տանեն ժողովրդի քվեին արժանանալու համար:

«Մենք հարգում ենք բոլոր կուսակցությունների և դաշինքների գործունությունը, ես բոլորին մաղթում եմ ազատ և մրցակցային պայքար»,- եզրափակեց Օհանյանը:

Հայաստանում Ազգային ժողովի հերթական ընտրությունները տեղի կունենան 2017թ. ապրիլի 2-ին: Նախընտրական քարոզարշավը կմեկնարկի մարտի 5-ին: Կուսակցություններն ու կուսակցությունների դաշինքներն Ազգային ժողովի ընտրություններին մասնակցելու հայտերը Կենտրոնական ընտրական հանձնաժողով պետք է ներկայացնեն մինչև փետրվարի 16-ը, իսկ տարածքային և համամասնական ցուցակները` փետրվարի 16-26-ը:

Լուսանկարը՝ Armenpress-ի

Աղբյուր` Փաստինֆո