Փաստ ինֆո

2015թ. հունվարի 29-ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով այսօրվա դատական նիստում հարցաքննվեց վկա Արթուր Կարապետյանը:

Ըստ վկայի՝ ինքը նորմալ հարաբերություններ է ունեցել գործով ամբաստանյալների, ինչպես նաև մյուս տուժողների հետ: Նշենք, որ վկա Արթուր Կարապետյանը և գործով ամբաստանյալ Գնել Թևոսյանը միևնույն ննջարանում են քնել։

Դեպքի նախորդ օրը՝ Հայոց բանակի տոնի առթիվ, իրենք Օպերա  են գնացել՝ համերգի, իսկ վերադառնալուց ժամեր անց, ինչպես նշեց վկան, գնացել են քնելու: Սակայն քնելու գնալուց առաջ Կարապետյանը կուրսանտ Հովիկ Հովհաննիսյանի հետ պայմանավորվել է գիշերը պարապեն, քանի որ անբավարար գնահատական են ունեցել:

Ըստ վկայի՝  Հովհաննիսյանն արթնացրել է իրեն գիշերը և մարտկոցի միջանցքում միասին պարապել են: Նրանց հետ է եղել նաև Նորիկ Սահակյանը: Վկան դեպքի օրվա հետ կապված մանրամասները դժվարությամբ էր մտաբերում:

Ուստիև նրա ցուցմունքներում առկա էական հակասություններով պայմանավորված մեղադրող դատախազների միջնորդությամբ հրապարակվեցին նրա  նախաքննական ցուցմունքները: Իսկ նախաքննության ընթացքում վկան հայտնել է, որ Հովհաննիսյանն իրեն քնից արթնացրել է ժամը 01։30-ի սահմաններում։  Գիշերը՝ միջանցքում դաս սովորելու ընթացքում, ցանկացել են սուրճ խմել, սակայն սրճեփն անսարք է եղել, ինչը որձել են նորոգել, սակայն  չի հաջողվել: Միջանցքում դաս սովորելիս է եղել նաեւ Ն.Սահակյանը։  Ժամը 03.00-ի սահմաններում, վկայի պնդմամբ, գնացել է քնելու:

Այդ ընթացքում վկայի խոսքով՝ ինքը միջանցքից բացակայել է մի քանի անգամ, ընդհանուր առմամբ 10 րոպե ժամանակային տևողությամբ:

Նախաքննության ընթացքում վկան նաև նշել էր, որ լվացարանում գտնվելու ընթացքում ձայնել է լսել և, դռանը մոտենալով, Հովիկ Հովհաննիսյանին հարցրել է, թե ինչ ձայներ են, վերջինս էլ պատասխանել է, որ Հայկազի թևերը ընկած իջեցնում էին աստիճանահարթակով և որ Նորիկը Հովիկին ասել է, որ Հայկազն իրեն լավ չի զգում:

Վկան նաև հայտնել էր, որ դասն ավարտելուց հետո գնացել է քնելու եւ այդ ժամանակ Նորիկը միջանցքում չի եղել, իսկ արդեն հաջորդ օրն առավոտյան, երբ արթնացել են՝ Գնել Թևոսյանը ննջարանում է գտնվել, սակայն «ռազվոդին» չի մասնակցել:

Վկան նաև հայտնել էր, որ Գնել Թևոսյանը հաճախակի է բացակայել զորամասից. քանի որ նույն ննջարանում են քնել՝  այդ մասին տեղյակ է եղել:

Նա շաբաթ և կիրակի օրերին տուն է գնացել, բացի այդ՝ եղել է նաև այնպես, որ ճաշին էլ ներկա չի գտնվել: Այս ամենը, ըստ վկայի, Գնելի հոր միջոցով է տեղի ունեցել:

Նախաքննության ընթացքում վկային հարց էր ուղղվել առ այն, որ տվյալներ են ձեռք բերվել, որ վկան տեսել է, թե ինչպես են Հայկազ Բարսեղյանին թևերն ընկած իջեցնում,  ինչին նա  բացասական պատասխան է տվել:

Նա կրկին դատարանում պնդեց, որ չի տեսել, և այդ մասին իրեն հայտնել է Հովիկը, ով չի նշել, թե ովքեր են Հայկազի թևերն ընկած իջեցրել աստիճանահարթակով:

Դատարանում վկան ասաց, որ երբ արթնացել է և գնացել է միջանցք՝ պարապելու,  Գնելը ննջարանում չի նկատել։ 

Նշենք, որ այս հարցի վերաբերյալ վկայի նախաքննական ցուցմունքներում որևէ գրառում չկար, իսկ դատարանում իր հայտարարությունից հետո հնչեցված հարցերին նա մեկը մյուսից տարբերվող պատասխաներ տվեց՝ սկզբում ասաց, որ չի նկատել, հետո թե ննջարանում լուսավորություն չի եղել, իսկ վերջում ասաց թե չի կարող վերհիշել Գնել Թևոսյանը ննջարանում գտնվել է, թե ոչ:

Վկան փոքր ինչ կաշկանդված էր, նա որպես պարզաբանում ասաց, որ չի կարողանում մտքերը հավաքել:

Ամբաստանյալ Նորիկ Սահակյանի հարցերին էլ, թե չի հիշո՞ւմ, որ միասին սուրճ են խմել, պատշգամբում գտնվել են, ծխել են, իր մոտ հեռախոս է եղել, թե ով է իրեն նկարել: Այս բոլոր հարցերին վկան պատասխանեց որ չի հիշում:

Հաջորդ դատական նիստը տեղի կունենա փետրվարի 20-ին:

Աղբյուր` Փաստինֆո