Փաստ ինֆո

«Համո Սահյան»-ի անվան թիվ 70 դպրոցի նախկին տնօրենի «քաջագործությունները» շարունակվում են բացահայտվել:

Հերմինե Շափաղաթյանը, ով թիվ 70 դպրոցի տնօրենի պաշտոնը զբաղեցրել 2011թ. մինչև 2014 թվականի ապրիլը՝ դպրոցը համարում էր ստանդարտներից դուրս: Այս կերպ նա արտահայտվել էր դեռևս 2013թ. նոյեմբերին` իր իսկ գործով դատական նիստի ժամանակ:

Այժմ նա ամբաստանվում է ՀՀ քրեական օրենսգրքի 178-րդ հոդվածի 2-րդ մասի 2-րդ կետով՝ 5 դրվագով և ՀՀ քրեական օրենսգրքի 178-րդ հոդվածի 1-ին մասով՝ 1 դրվագով:

Ըստ մեղադրանքի՝ Շափաղաթյանը, ուրիշի գույքը խաբեությամբ հափշտակելու նախնական դիտավորությամբ, չունենալով համապատասխան լծակներ և իր խոստումը կատարելու իրական հնարավորություն` մարդկանց աշխատանքի ընդունվելու հարցում օգնելու և աջակցելու պատրվակով, վերջիններիցս վերցրել է գումարներ, սակայն չի կատարել խոստումները և հափշտակել է նրանցից վերցրած գումարները:

Քրեական գործով կա 6 տուժող, ինչը նշանակում է, որ այս անձինք հայտնվել են Շափաղաթյանի ծուղակում: 6 տուժողից 2-ին նա խոստացել է Երևանում գործող դպրոցներից մեկում որպես մանկավարժ աշխատանքի ընդունվելու հարցում օգնել, մի դեպքում վերցնելով 800 000 ՀՀ դրամ, իսկ մյուս դեպքում ՝ 2000 ԱՄՆ դոլար:  Եվս մեկին էլ խոստացել է Երևանի դպրոցներից մեկում լոգոպետի աշխատանք և նրանից վերցրել է 603.790 ՀՀ դրամ:

Մեկ այլ դրվագով էլ Շափաղաթյանը քաղաքացուն խոստացել է հաշվապահի աշխատանք՝ Երևանի դպրոցներից մեկում այս անգամ գործարքը իբրև թե կատարելու համար վերցնելով 1000 ԱՄՆ դոլար:

Եվս երկու քաղաքացուց էլ գումարներ է վերցրել մի դեպքում խոստանալով՝ Երևանի պետական մանկավարժական համալսարանի տարրական կրթության և մեթոդիկայի ֆակուլտետի միանգամից 3-րդ կուրս ընդունել և պահանջել է 1 500 ԱՄՆ դոլար, իսկ մյուս դրվագով էլ Շափաղաթյանը Սփյուռքի նախարարությունում որպես կրտսեր մասնագետ աշխատանքի ընդունվելու հարցում օգնելու համար քաղաքացուց վերցրել է 1 500 ԱՄՆ դոլար:

Նրա նկատմամբ որպես խափանման միջոց է ընտրվել չհեռանալու մասին ստորագրություն:

Քրեական գործը քննվում է Մալաթիա-Սեբաստիա վարչական շրջանների ընդհանուր իրավասության դատարանում:

Ավելի վաղ «Փաստինֆո»-ն տեղեկացրել էր, որ Շափաղաթյանն առաջին անգամ չէ, որ հայտնվում է դատարանում՝ ընդդեմ նրա ներկայացվել է 10-ից ավելի քաղաքացիական հայցեր:

Այդ գործերից մեկով՝ դեռևս 2013թ. «Կոմպյուտերոն» ՍՊԸ-ն հայց էր ներկայացրել ընդդեմ «Համո Սահյան»-ի անվան թիվ 70 դպրոցի:

Հայցվորը դպրոցի տնօրենից պահանջում էր բռնագանձել 3 175 100 ՀՀ դրամ գումար: Բանն այն է, որ թիվ 70 դպրոցի տնօրեն Հերմինե Շափաղաթյանը «Կոմպյուտերոն» ՍՊԸ-ից գնել է 10-ը նոթբուք, համակարգիչները ստացել է անձամբ` պարտավորվելով 90 -օրյա ժամկետում վճարել գումարը։ Սակայն, հայցվորի ներկայացմամբ，նշված ժամկետում գումարը չի վճարվել, որից հետո կնքվել է լրացուցիչ համաձայնագիր` ժամկետը երկարացնելով մինչև հուլիս 31-ը։ Սահմանված երկրորդ ժամկետում ևս գումարը չի վճարվել և հայց ներկայացնելով դատարան հայցվորը պահանջում էր նաև պատասխանողից բռնագանձել տույժեր, դատական ծախսերը, ինչպես նաև հայցվորի ներկայացուցիչ՝ փաստաբան Գևորգ Դավթյանի մատուցած ծառայությունների համար արդեն իսկ վճարված 820 000 ՀՀ դրամը: Ինչ վերաբերում է տույժերին, ապա հայցվորի ներկայացուցիչը նշեց, որ այն քիչ են հաշվարկել` նկատի ունենալով, գործ ունեն դպրոցի հետ:

Այդ գործով դատական նիստի ժամանակ Շափաղաթյանը դատարանում հայտարարեց, որ չի հրաժարվում գումարից և պարտավորվեց վճարել այն:
Թե ի՞նչ էր արել դպրոցի համար գնված այդ նեթբուքերը Շափաղաթյանը այդպես էլ դատարանում չհայտնեց, սակայն իր խոսքով՝ անգամ իր ֆինանսական միջոցներով է փորձել դպրոցը «կարգի բերել, դուռ ու պատուհաններ է փոխել, ավել ու փոշի է գնել»: Ըստ նրա՝ իր մեղավորությունը կայանում է նրանում, որ ծանր «լուծ» է վերցրել իր վրա:

Աղբյուր` Փաստինֆո