Փաստ ինֆո

Փաստաբանների պալատի հասցեին հնչեցված մեղադրանքներին պալատի աշխատակազմը նախկինում առիթներ ունեցել է արձագանքելու: Այսօր այդ մասին ՀՀ փաստաբանների պալատում ընթացող Խորհրդի անդամների ընտրությունների ժամանակ լրագրողների հետ զրույցում ասաց ՀՀ ՓՊ նախագահ Արա Զոհրաբյանը՝ հավելելով, որ հնչեցված մեղադրանքներն իրականությանը չեն համապատասխանում:

Միևնույն ժամանակ, ՓՊ նախագահը պալատի հաստիքացուցակի հետ կապված նշեց, որ դեռևս 2012թ. առանց Հանրային պաշտպանի գրասենյակի 23 հաստիք է եղել, 2017թ ընդամենը մեկով ավելացել է՝ դառնալով 24:

ՓՊ նախագահի դիտարկմամբ՝ որևէ կառույց չի կարող անթերի աշխատել, այդ թվում նաև՝ Փաստաբանների պալատը, ինքը ևս շատ թերություններ ունի, սակայն յուրաքանչյուր կարծիք, որքան էլ դա իր մեջ ռացիոնալ հատիկ պարունակի, թե՝ ոչ, պետք է ընդունել ի գիտություն և եթե իրոք կան թերություններ, ապա պետք է դրանք շտկել:

Արա Զոհրաբյանը վերհիշեց 2012թ. Խորհրդի անդամների ընտրությունները, որին մասնակցել և ընտրվել է ինքը, ևս «թվում էր, թե համակիրներով ընտրվել էինք, բայց շատ կարճ ժամանակահատվածում տարբեր տեսակետների ուժով հակադրվեցինք միմյանց, ինչը նորմալ գործընթաց է»:

Այսօր ՀՀ Փաստաբանների պալատն ունի 1779 փաստաբան, «ինչը նշանակում է, որ այդքան էլ կարծիք կա և բնական է, որ յուրաքանչյուրն իր պատկերացումներն ունի, ինչը պետք է հարգվի»,- ասաց ՓՊ նախագահը՝ հավելելով, որ լեգիտիմ ընտրված Խորհրդի անդամն ունենալու է իր վստահությունը և ինչպես էլ քննադատեն, ի վերջո նա ընտրված մարդ է:

Ինչ վերաբերում է այս տարի աշնանը ՀՀ փաստաբանների պալատի ընտրություններին իր մասնակցությանը, Արա Զոհրաբյանը նշեց, որ դեռևս որոշում չի կայացրել կինքնառաջադրվի՞, թե՝ ոչ. «2013 թվականին նախընտրական ծրագիր եմ ներկայացրել: Յուրաքանչյուր տարվա ավարտին ինձ համար նշումներ եմ կատարում՝ խոստումներից որոնք եմ կատարել, որոնք՝ ոչ: Երբ որ նախընտրական ծրագրի վերաբերյալ փաստաբաններին կներկայացնեմ վերջնական հաշվետվություն, նաև խորհրդակցելով գործընկերներիս հետ, նոր այդ ժամանակ որոշում կկայացնեմ»,- ասաց նա:

Աղբյուր` Փաստինֆո