Փաստ ինֆո

«Հայկական վերածնունդ» կուսակցության 2-րդ համագումարի ժամանակ Արթուր Բաղդասարյանը ելույթի վերջում ներկա պատվիրակներին «սպառնաց» քերթել կաշիները, եթե լավ չաշխատեն:

«Դուք իմ զորքն եք, ու պայքարի պատասխանատվության կոչ եմ անում: Կաշիներդ քերթելու եմ, եթե լավ չաշխատեք: Պետք է լավ աշխատենք՝ մեր հայրենիքի եւ զավակների համար»,- «Արմենպրես»-ի հաղորդմամբ`ասաց Արթուր Բաղդասարյանը: Կուսակցության նախագահը նշեց, որ ցանկանում է հավատան իրենց ուժին: Նրա խոսքով՝ խորհրդարանական ընտրությունների անցկացումը Հայաստանի համար վճռական նշանակություն ունի։

Հայաստանն այսօր կանգնած է լրջագույն ներքին ու արտաքին մարտահրավերների առջև։

«Մեր թիմն ունակ է լուծելու խնդիրներ ու Հայաստանը դուրս բերել այս խորը անդունդից։ «Հայկական վերածնունդը» իսկապես կայացած քաղաքական ուժ է։ Հայաստանն այսօր նոր թռիչքի կարիք ունի»,- ասաց Արթուր Բաղդասարյանը։

Նա նաև կարծում է, որ 18 տարեկանները բանակում չպետք է ծառայեն: Պետք է ձեւավորվի մասնագիտացված բանակ:

«18-ամյա երեխան չպետք է պաշտպանի Հայաստանի սահմանները։ Պետք է ձեւավորվի մասնագիտացված բանակ: Ինչո՞ւ չենք կարող դա անել, մեր գումարները բավարարում են: Գողությունն ու կողոպուտը պետք է վերացնել»,- ասաց նա:

Բաղդասարյանը նաև նշեց, որ նվազ հասարակական վտանգավորություն ունեցող արարքների համար ազատազրկումը, որպես պատժի միջոց, պետք է վերանա:

«Պետք է ներդնել պատժի այլընտրանքային համակարգ»,-ասաց նա:

Անդրադառնալով արտաքին քաղաքականությանը, Բաղդասարյանն ասաց, որ Հայաստանը պետք է հետևողականորեն զարգացնի իր հարաբերությունները ՌԴ-ի հետ, Իրանի հետ հարաբերությունները խորացնի:

«Մենք փոքր երկիր ենք, բայց պետք է ունենանք մեծ հավակնություններ»,-ասաց նա:

Արթուր Բաղդասարյանն ընտրվել է կուսակցության նախագահ: Նա կղեկավարի նաև քաղաքական ուժի համամասնական ցուցակը ապրիլին կայանալիք խորհրդարանական ընտրություններում:

Լուսանկարը՝ Armenpress-ի

Աղբյուր` Փաստինֆո