Փաստ ինֆո

Լրագրող Մարկ Ֆրոգատն անգլիական «Մանչեսթեր Յունայթեդի» պաշտոնական կայքի իր միկրոբլոգում գրել է Հայաստանի ազգային հավաքականի կիսապաշտպան Հենրիխ Մխիթարյանի մասին:

«Մենք՝ «Մանչեսթեր Յունայթեդի» երկրպագուներս հնարավորություն ենք ունեցել «Օլդ Թրաֆորդում» տեսնել մի շարք բարձրակարգ ֆուտբոլիստներ և նվաճած տիտղոսներ, քանի որ դա «կարմիր» լինելու մասնիկներից մեկն է:

Հաջողությունների և հիասթափությունների հետ մեկտեղ միշտ եղել են գերաստղեր, որոնց հաճելի էր հետևել: Մեկը միայնակ կարողանում է արդարացնել տոմսի վրա ծախսած գումարը: Մյուսը ստիպում է երկրպագուներին կանգնել և հանդիպմանը հետևել կանգնած: Ֆուտբոլիստ, ով համարվում է «Ա ցուցակի» աստղ:

Լավագույն օրինակն Էրիկ Կանտոնան է: Ես երիտասարդ էի, ու նրա խաղին հետևելու ամենափոքր հնարավորությունը շահած լոտոյի տոմսի պես մի բան էր: Նրանից հետո եղել են Դևիդ Բեքհեմի, Ուեյն Ռունիի, Կրիշտիանու Ռոնալդուի և նույնիսկ Ռոբին վան Պերսիի պես ֆուտբոլիստներ: Երբ Փոլ Սքոուլզը վերադարձավ 2012 թվականին, երկրպագուները նրա խաղը վայելեցին ևս 18 ամիս մինչև կարիերայի վերջնական ավարտը:

Ընթացիկ մրցաշրջանում կա Դավիդ դե Խեա, չնայած դարպասապահները խաղային օրը սիրելու պատճառ չեն հանդիսանում, այլ հարձակվողները, քանի որ ֆուտբոլի գլխավոր իմաստը ստեղծագործել ու գոլեր խփելն է: Այդիսկ պատճառով Զլատան Իբրահիմովիչը դարձել է երկրպագուների սիրելին:

Վերջին ամիսներին թիմի հիմնական կազմում աստիճանաբար ամրապնդվում է  ամառային մեկ այլ ձեռքբերում` Հենրիխ Մխիթարյանը, ով նույնպես հանդիսանում է այն ֆուտբոլիստներից մեկը, որի խաղին երկրպագուները հետևում են հաճույքի, ստեղծագործական մտքի ու խաղի արդյունքի վրա ազդեցություն թողնելու համար: «Եթե Միկին լավ է խաղում, ապա «Յունայթեդը» նույնպես հաջող է հանդես գալիս»,- այսպիսի հայտարարություններ կարելի է հաճախ լսել:

Հեղինակության այսպիսի աճը պայմանավորված է նրանով, որ Մխիթարյանն ունի հիասքանչ գոլեր խփելու սովորություն. դեկտեմբերի լավագույն գոլերի եռյակում միայն Մխիթարյանի գոլերն էին: Հունվարին «Ուիգան Աթլետիկի» դարպասը խփած գոլը նույնպես լավագույնն էր, որը հատկապես արժանի է ուշադրության, քանի որ այն չնչին առավելությամբ շրջանցեց Ուեյն Ռունիի` «Սթոք Սիթիի» դարպասը խփած պատմական տուգանային հարվածին: 

Կիրակի օրը նա խփեց իր հերթական փայլուն գոլը «Լեսթերի» դարպասը, և զարմանալի չի լինի, եթե նա փետրվարին ամսվա լավագույն գոլերից յուրօրինակ հեթ-տրիկ ձևակերպի:

Բացի գրոհը եզրափակելուց, կարելի է բարձր գնահատել Հենրիխի փիլիսոփայությունն ու ֆուտբոլային մոտեցումները: Նա անընդհատ ցանկանում է առաջ շարժվել և գլխացավանք դառնալ մրցակցի համար, և դա հիացնում է տարբեր սերունդների երկրպագուներին, ովքեր տեսել են Ջորջ Բեսթի կամ Ռայան Գիգսի անվախ դրիբլինգները: Դա, անկասկած, հմայք է ավելացնում ֆուտբոլիստի նոստալգիկ երանգներին:

Այդ նույն երկրպագուները, ովքեր հանդիսանում են ֆուտբոլիստի հեղինակության բնորոշողները, նրա պատվին երգում են Սթինգի Englishman in New York-ի երգը: Լսեք մեկ անգամ և ամեն օր կկրնեք այն:

«United Review»-ի կիրակնօրյա համարում 1968 թվականի չեմպիոնների գավաթակիր Փեդի Կրերանդը նշում է, որ ոգևորվում է` տեսնելով Մխիթարյանի խաղը:

«Այդիպիսի արագություն ունեցող ֆուտբոլիստը կարող է լինել ոչ խելացի, բայց Հենրիխ Մխիթարյանի դեպքում դա այդպես չէ: Նա խաղադաշտում շատ մեծ ինտելեկտ ունի: Նրա դինամիկ ոճը մեծ տպավորություն է թողել ինձ վրա»,- գրում է Կրերանդը:

Չնայած, որ դեռ վաղ է Մխիթարյանին դասել «Յունայթեդի» պատմության մեծագույն վարպետների շարքին, հայ ֆուտբոլիստը վստահորեն նշում է իր անունն այս մրցաշրջանի «Ա կարգի» ֆուտբոլիստների ցանկում»:

Աղբյուր` armsport.am