Փաստ ինֆո

«Հայկական վերածնունդ» կուսակցությունը չի փոխել դիրքորոշումը՝ Ազգային ժողովի առաջիկա ընտրություններին մասնակցելու ձևաչափի վերաբերյալ: Ազգային ժողովում խորհրդարանական ճեպազրույցների շրջանակներում լրագրողների հետ հանդիպմանն ԱԺ ՕԵԿ խմբակցության քարտուղար Մհեր Շահգելդյանն ընդգծեց, որ իրենք ընտրություններին մասնակցելու են միայնակ և սեփական ցուցակներով:

«Նորանկախ Հայաստանի պատմությունը ցույց է տվել, որ նախընտրական դաշինքներն արդյունավետ չեն և ընտրություններից հետո դրանք փլուզվում են, քանի որ հիմնականում դրանք գաղափարական հենք չեն ունենում: Դրա համար մենք նպատակահարմար չենք համարում ընտրություններին դաշինքով մասնակցելը»,- «Արմենպրես»-ի հաղորդմամբ՝ ասաց Շահգելդյանը: Անդրադառնալով առաջիկա ընտրություններում ՀՎԿ-ի շանսերին՝ Մհեր Շահգելդյանը նախ նշեց, որ ժողովուրդը պետք է որոշի, թե որ քաղաքական ուժին կամ դաշինքին տա իր ձայնը, սակայն հավելեց, որ իրենց հնարավորությունները բարձր են:

«Մենք ընտրություններին գնում ենք վստահության մեծ պաշարով, քանի որ, կարծում եմ, մենք ունենք մեր ընտրազանգվածը: Դրա մասին են վկայում տեղական ինքնակառավարման մարմինների վերջին ընտրությունները, որոնց արդյունքներով մենք ձայների քանակով երկրորդ կուսակցությունն էինք, ինչի արդյունքում ավելացրել ենք նաև մեր կուսակից համայնքի ղեկավարների թիվը»,- նշեց Շահգելդյանը:

Հայաստանում Ազգային ժողովի հերթական ընտրությունները տեղի կունենան 2017թ. ապրիլի 2-ին: Կուսակցությունները կամ կուսակցությունների դաշինքներն առաջադրման փաստաթղթերը Կենտրոնական ընտրական հանձնաժողով պետք է ներկայացնեն մինչև փետրվարի 16-ը: Նախընտրական քարոզարշավը կմեկնարկի մարտի 5-ին:

Աղբյուր` Փաստինֆո