Փաստ ինֆո

Հայ Հեղափոխական Դաշնակցություն կուսակցության համամասնական և տարածքային ցուցակները գրեթե պատրաստ են: Այս պահին ցուցակները հստակեցվում են և առաջիկայում կհրապարակվեն: Ազգային ժողովում խորհրդարանական ճեպազրույցների շրջանակներում լրագրողների հետ հանդիպմանն այս մասին հայտնեց ԱԺ ՀՅԴ խմբակցության ղեկավար Արմեն Ռուստամյանը:

«Մենք ժամանակ ունենք և առաջիկայում վերջնական կհստակեցնենք ցուցակները և կհրապարակենք: Մի բան ակնհայտ է, որ մենք ընտրություններին մասնակցելու ենք միայնակ, որևէ դաշինքի մաս չենք կազմելու» -,«Արմենպրես»-ի հաղորդմամբ՝ նշեց Ռուստամյանը:

Նա հավելեց, որ բոլոր տեղերում իրենք ունենալու են իրենց թեկնածուները:

«ՀՅԴ-ն մինչ այս բազմաթիվ ընտրությունների է մասնակցել, և մենք գիտենք, թե մեր թիմում ով ինչ ձայների է տիրապետում այս կամ այն տարածքում: Այս առումով մենք որևէ խնդիր չենք տեսնում: Բոլոր տարածքներում էլ կան անձինք, ովքեր, բացի այն, որ երկար տարիներ ՀՅԴ անդամ են եղել, նաև իրենց տարածքներում հեղինակություն ունեն»,- ասաց Արմեն Ռուստամյանը:
Պատգամավորը նկատեց, որ ՀՅԴ-ն առանձնահատկություն ունի, քանի որ գաղափարական կուսակցություն է և ունի իր կայուն էլեկտորատը:

«Այդ կայունությունն այսօր մեզ շատ պետք է, որովհետև հենց այդ կայունությունն է, որ շատերը չունեն: Դա մեզ հնարավորություն է տալիս մեր ցուցակը ձևավորել՝ հենվելով այդ կայուն էլեկտորատի վրա»,- հավելեց ՀՅԴ խմբակցության ղեկավարը:

ՀՅԴ ցուցակներում կլինեն մարդիկ, ովքեր կուսակցական չեն: Արմեն Ռուստամյանը նշեց, որ իրենք ավելի շատ կարևորում են, որ ունենան համակիրների մեծ թիմ, քան կուսակցության անդամ: Նրա խոսքով՝ ՀՅԴ-ն միշտ էլ համակիրների ավելի մեծ թիմ է ունեցել, քան կուսակցության անդամներն են:

Հայաստանում Ազգային ժողովի հերթական ընտրությունները տեղի կունենան 2017թ. ապրիլի 2-ին: Կուսակցությունները կամ կուսակցությունների դաշինքներն առաջադրման փաստաթղթերը Կենտրոնական ընտրական հանձնաժողով պետք է ներկայացնեն մինչև փետրվարի 16-ը: Նախընտրական քարոզարշավը կմեկնարկի մարտի 5-ին:

Լուսանկարը՝ Armenpress-ի

Աղբյուր` Փաստինֆո